ចម្លាក់ប្រាក់ខ្មែរ ល្បីល្បាញខ្លាំងនៅ ឃុំកំពង់ហ្លួង និងមានទីផ្សារលក់នៅបរទេស

2017-12-14 03:24:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ឃុំកំពង់ហ្លួង ស្រុកពញាឮ ខេត្តកណ្ដាល ត្រូវបានគេចាត់ទុកថាជាភូមិល្បីល្បាញខាងធ្វើ ចម្លាក់ប្រាក់ខ្មែរ និង គ្រឿងអលង្ការ។ វត្ថុសិល្បៈកម្មផលិតពីលោហៈធាតុ មានដូចជា ស្ពាន់ ទង់ដែង និង ប្រាក់ កំពុងពេញនិយមក្នុងចំណោមភ្ញៀវទេសចរក្នុងស្រុក និង អន្ដរជាតិ ដែលបានទៅកម្សាន្តនៅតំបន់នោះ។ សព្វថ្ងៃ មុខរបរនេះ កំពុងមានទីផ្សារ នៅអឺរ៉ុប ថៃ និង ក្នុងតំបន់។

អ្នកស្រី ដេន ម៉ាស់ អាយុ៥៦ឆ្នាំ ប្រធានសមាគមសិប្បកម្មចម្លាក់ប្រាក់ ឃុំកំពង់ហ្លួងនិងឃុំកោះចិន កំពុងបង្ហាញសន្លឹកស្ពាន់ ដែលជាវត្ថុធាតុដើមនៃការធ្វើចម្លាក់ស្ពាន់។ អ្នកស្រីចាប់ផ្ដើមរកស៊ីទិញស្ពាន់ ទិញប្រាក់ ធ្វើចម្លាក់ខ្មែរ នៅឆ្នាំ១៩៨១ ដោយបន្តការងារពីម្ដាយ។

កូនជាងនៅក្នុងរោងជាងរបស់អ្នកស្រី ដេន ម៉ាស់ កំពុងដំបំណែកស្ពាន់ ដើម្បីដំឡើងទៅជាថាស ផ្តិលខាត់ ជើងពាន និងវត្ថុផ្សេងៗទៀតតាមការបញ្ជាទិញ។ ក្នុងមួយថ្ងៃ ជាងអាចដំឡើងថាសស្ពាន់ ផ្ដិលខាត់ ជើងពាន និងវត្ថុផ្សេងៗទៀតដែលមានទំហំប្រហាក់ប្រហែលគ្នា និងដែលមិនទាន់មានក្បាច់រចនានេះ បានចំនួនពី៥ទៅ៧។

នៅក្នុងរោងជាងរបស់អ្នកស្រី ដេន ម៉ាស់ កូនជាងកំពុងដុតចម្លាក់ល្ពៅធ្វើពីស្ពាន់ ដើម្បីឲ្យវាកាន់តែរឹងមាំនិងស្វិត។ ដើម្បីឲ្យចម្លាក់ស្ពាន់ឬប្រាក់ កាន់តែរឹងមាំនិងស្វិត ជាងចម្លាក់ត្រូវដុតចម្លាក់របស់ខ្លួនឲ្យបានច្រើនដង។

ក្រោយពេលដុតរួចហើយ កូនជាងកំពុងត្រួតពិនិត្យក្បាច់ផ្កាភ្ញី និងទ្រង់ទ្រាយគ្រឿងចម្លាក់របស់ខ្លួនឡើងវិញ។ បន្ទាប់មក កូនជាងចាប់ផ្ដើមកែសម្រួលក្បាច់ផ្កាភ្ញីនិងទ្រង់ទ្រាយជាថ្មីម្ដងទៀត ដើម្បីឲ្យគ្រឿងចម្លាក់កាន់តែលេចធ្លោឡើងថែមទៀត។

អ្នកស្រី ដេន ម៉ាស់ កំពុងកាន់បង្ហាញផ្តិលខាត់មានជើងធ្វើពីស្ពាន់ក្រូម៉េ ដែលជាផលិតផលសម្រេច នៅខាងមុខផ្ទះរបស់អ្នកស្រី នៅខេត្តកណ្ដាល។ រហូតមកទល់ពេលនេះ សិប្បកម្មចម្លាក់ស្ពាន់របស់លោកស្រី បាននាំចេញផលិតផលរបស់ខ្លួនទៅកាន់ប្រទេសជាច្រើន ខណៈប្រទេសថៃ ឡាវ និងចិន ជាទីផ្សារធំជាងគេ។

អត្ថបទ ៖ ក្រុមការងារផ្លូវទៅស្រុក

រូបថត៖ Shot on Canon