ស្ត្រីម្នាក់ ទទួលបានសំណង ២ លើក ពី Apple រឿង iPhone X

2017-12-15 03:16:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ត្រីម្នាក់មកពីខេត្តជាំងស៊ូ ប្រទេសចិន ទទួលបានសំណងពីរលើក បន្ទាប់ពី iPhone X របស់ខ្លួន អាចដោះសោដោយប្រើផ្ទៃមុខអ្នករួមការងារជាមួយបាន។

ស្ត្រីដែលមាននាមត្រកូលថា Yan បានប្រាប់ដល់សារព័ត៌មាន Jiangsu Broadcasting Corporation ថាគាត់បានកំណត់ផ្ទៃមុខដើម្បីដោះសោតាមការណែនាំពេលទិញ iPhone X។ យ៉ាងណាក្ដីពេលឲ្យអ្នករួមការងារជាមួយសាកល្បងដោះសោដោយប្រើមុខងារនេះ ឃើញថាអាចដោះបាន ទោះបីជាមុខមនុស្សពីរផ្សេងគ្នាក្ដី។

នៅពេលស្ត្រីខាងលើទាក់ទងទៅ Apple ក្រុមហ៊ុនមិនបានជឿគាត់ ហើយមិនធ្វើអ្វីទាំងអស់។ ហេតុនេះ Yan និងមិត្តរួមការងារ បានទៅកាន់ហាង Apple ដែលនៅក្បែរ ដើម្បីបញ្ជាក់ថាមុខងារស្កេនមុខលើ iPhone X របស់ខ្លួនពិតជាមានបញ្ហា។ ពេលបញ្ជាក់រួច បុគ្គលិក Apple ក៏ជឿថា iPhone X របស់ស្ត្រីរូបនេះពិតជាមានបញ្ហាលើការស្កេនមុខ និងបានផ្ដល់សំណងជាសាច់ប្រាក់សុទ្ធវិញ។

Yan ក៏បានទិញ iPhone X មួយទៀត រួចធ្វើការកំណត់ផ្ទៃមុខសម្រាប់ការដោះសោដូចជាលើកដំបូងដែរ ប៉ុន្តែមិត្តរួមការងាររបស់គាត់នៅតែអាចដោះសោដោយប្រើផ្ទៃមុខរបស់ខ្លួនបានទៀត។ ជាថ្មីម្ដងទៀត Yan ក៏ត្រឡប់ទៅហាង Apple វិញដើម្បីប្រាប់ពីបញ្ហា ហើយបុគ្គលិក Apple ក៏បានផ្ដល់សំណងជាលើកទីពីរ។

គេមិនដឹងថាស្ត្រីខាងលើសម្រេចចិត្តទិញ iPhone X ជាលើកទីបី ឬ យ៉ាងណានោះទេ៕

ប្រភព៖ nextshark ប្រែសម្រួល៖ សុខហេង