គ្រាន់តែដឹងថាប៉ាៗ Jonghyun ស្លាប់ភ្លាម ក្មេងតូច Yoogeun យំស្ទើរគាំង

2017-12-19 02:50:55
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅពេលទទួលដំណឹងថា តារាប្រុសមុខពោរពេញដោយស្នាមញញឹមសម្រាប់អ្នកគាំទ្រ Jonghyun បានលាចាកលោកភ្លាម មហាជនរន្ធត់ចិត្តឥតឧបមា មិនស្មានថារឿងនេះអាចកើតឡើង។

ចំណែកកុមារា ដែលជាតួឯកក្នុងកម្មវិធី "SHINee's Hello Baby” Jung Yoogeun វិញ ក៏មិនខុសពីអ្នកឯទៀតដែរ។ ពេលដឹងថា ប៉ាប៉ា Jonghyun របស់គេទទួលមរណភាពភ្លាម ក្មេងប្រុសរូបនេះ ក្ដុកក្ដួលរន្ធត់ចិត្តឥតឧបមា និងស្ទើរមិនជឿថាវា ជាការពិត។

ព្រឹកថ្ងៃទី ១៩ ខែធ្នូនេះ ម្ដាយរបស់ក្មេងប្រុស Yoogeun បានបង្ហោះសំណេរមួយលើគណនី Instagram ថា៖ "ខ្ញុំមិនចង់ជឿនឹងភ្នែកទាល់តែសោះ ថាវាជាការពិត។ ខ្ញុំភ្ញាក់ខ្លាំងណាស់ចំពោះដំណឹងនេះ។ ចំណែក Yoogeun វិញ រឹតតែស្រឡាំងកាំងជាងខ្ញុំទៀត ហើយគេសួរខ្ញុំរហូត។ ពេលនេះអ្វីគ្រប់យ៉ាង គឺទទេស្អាត ហើយខ្ញុំមិនដឹងថា តើគួរពន្យល់ប្រាប់កូនខ្ញុំយ៉ាងណា? គេសួរខ្ញុំដដែលជាច្រើនដង។ ប៉ា Jonghyun? ហេតុអ្វី? គាត់នៅរស់ទេ ត្រូវអត់? វាមិនមែនជាការពិតទេ មែនទេ? ប៉ាប៉ា Jonghyun បានទៅឆ្ងាយហើយ គឺទៅកន្លែងដែល លោកយាយទួតរបស់កូននៅ... ពេលឮបែបនេះ Yoogeun ស្រាប់តែយំមួយទំហឹង។ គេយំសស្រាក់យ៉ាងណាក៏មិនភ្លេចសួរបញ្ជាក់ម្ដងហើយម្ដងទៀតដែរ។ គេបានព្យាយាមរករូបភាពរបស់ Jonghyun ក្នុងទូរសព្ទដៃរបស់គេ។ ចាប់ពីពេកនេះ បើទោះបីគេនិយាយថានឹក Jonghyun យ៉ាងណា ក៏គេលែងបានជួបប៉ា SHINee រូបនេះទៀតដែរ។ Yoogeun ខ្លោចចិត្តណាស់រហូតគេងមិនលក់។ គេទន្ទេញឈ្មោះ ប៉ា Jonghyun លាយឡំនឹងសម្រែកយំខ្សឹកខ្សួល រហូតដេកលក់"។

បច្ចុប្បន្ន កូនប្រុសរបស់ SHINee រូបនេះមានអាយុ ១១ឆ្នាំហើយ។ ត្រឡប់ទៅកាលពីឆ្នាំ ២០១០ Yoogeun បានចូលរួមក្នុងកម្មវិធី "SHINee's Hello Baby” ពេលមានអាយុ ៤ឆ្នាំ។ កន្លងផុតទៅជាច្រើនឆ្នាំ ក៏ពិតមែន ប៉ុន្តែក្ដីស្រឡាញ់របស់ក្មេងរូបនេះមានចំពោះ ក្រុម SHINee គឺមិនប្រែឡើយ។ ជាមួយគ្នានោះ ឲ្យតែសមាជិក SHINee ធ្វើការ Live លើ Instagram កុមារ Yoogeun តែងចូលមើល និង ខមមិនជារឿយៗ។ ឧទាហរណ៍មានម្ដងនោះ គេបានចូលមើល Live របស់ Jonghyun ហើយបានខមមិន ថា៖ "ប៉ា Jonghyun! ប៉ាអស្ចារ្យណាស់!”។

Yoogeun ពេលនៅតូច

យ៉ាងណាក៏ដោយ អារម្មណ៍ពេលបាត់បងមនុស្សជាទីស្រឡាញ់ពិតជា ខ្លោចផ្សារក្រៃលែង ហើយការបែកគ្នាលើកនេះ គឺបែកជារៀងរហូតគ្មានថ្ងៃត្រឡប់ឡើយ។ សូមវិញ្ញាណក្ខន្ធ Jonghyun ទៅកាន់ទីស្ងប់ចុះ៕

ប្រភព៖ Allkpop ប្រែសម្រួល៖ យី សុធារី