ក្រុម​បាល់ទាត់​សាលា​បឋម​សិក្សា​ និង​អនុវិទ្យាល័យ​ស្វាយ​ជ្រំ​ ក្នុង​ស្រុក​ខ្សាច់​កណ្តាល​ ខេត្ត​កណ្តាល​​បាន​ឈ្នះ​ជើង​ឯក​​ក្នុង​ការ​ប្រកួត​ថ្នាក់​ខេត្ត​ស្ទើរ​រាល់​ឆ្នាំ។ មិន​ត្រឹម​តែ​ប៉ុណ្ណោះ​តំបន់​មួយ​នេះ​សំបូរ​កីឡាករ​ជាប់​ជម្រើស​ជាតិ​ និង​លេង​តាម​ក្លឹប​នានា​ជា​ច្រើន។

ព្រះ​តេជគុណ​ ព្រះ​សិរី​សម្មតិវង្ស​ លន់ សុគន្ធា​ ព្រះ​រាជា​គណៈ​ថ្នាក់​ត្រី​ ព្រះ​ធម្ម​ធម៌​គណ​ខេត្ត​កណ្តាល​ និង​​ជា​ព្រះ​អនុគណ​ស្រុក​ខ្សាច់​កណ្តាល​ ព្រម​ទាំង​ជា​ព្រះ​ចៅ​អធិការ​វត្ត​ស្វាយ​ជ្រំ​​ ឃុំ​ស្វាយ​ជ្រំ​ ស្រុក​ខ្សាច់​កណ្តាល​ ខេត្ត​កណ្តាល​បាន​កំពុង​​ជួសជុល​​កីឡដ្ឋាន​​បាល់ទាត់​​វត្ត​ស្វាយ​ជ្រំ​​ដើម្បី​​ប្រយោជន៍​ដល់​សង្គម​កីឡា។

ឃុំ​ស្វាយជ្រំ​​ ស្ថិត​នៅ​ស្រុក​ខ្សាច់​កណ្តាល​ ខេត្ត​កណ្តាល​ដែល​មាន​កីឡាករ​បាល់ទាត់​ជា​ច្រើន​​បាន​លេង​នៅ​តាម​ក្លិប​នៃ​លីគ​បាល់ទាត់​កំពូល​កម្ពុជា​ និង​ក្រុម​ជម្រើស​ជាតិ​កម្ពុជា។ ឃុំ​មួយ​នេះ​មាន​​ភូមិ​ជា​ច្រើន​ដូច​ជា​ភូមិ​លើ ភូមិ​ក្រោម​ ភូមិ​ស្វាយជ្រំ​ ភូមិ​បារាយណ៍​ ភូមិ​ព្រែក​បង្កង​ ភូមិ​ព្រែក​លួង​ ភូមិ​ព្រែក​អំពិល​ និង​ភូមិ​ព្រែក​ក្រប៉ៅ​ជា​ដើម។