បើ​ទោះ​គេ​ដឹង​ថា​លោក ស៊ីន ច័ន្ទឆាយា ស្លាប់​ដោយ​សារ​ខ្យល់​គ​ដួល ផ្សំ​នឹង​លោក​មាន​ជំងឺ​លើស​ឈាម និង​បេះដូង​ផង​ក្ដី ប៉ុន្តែ​ក្រុម​គ្រួសារ​បាន​ដាក់​ការ​សង្ស័យ​ថា បណ្ដាល​មក​ពី​មូលហេតុ​២​សំខាន់​ៗ​ផ្សេង​ទៀត។

បន្ទាប់​ពី​​ទទួល​​បាន​ដំណឹង​​ស្ដី​ពី​មរណភាព លោក ស៊ីន ច័ន្ទឆាយា  ប្រធាន​សមាគម ស៊ីន ស៊ីសាមុត ដែល​ត្រូវ​ជា​កូន​ប្រុស​បង្កើត​​អធិរាជ​សំឡេង​មាស ស៊ីន ស៊ីសាមុត ភ្លាម​សិល្បករ​សិល្បៈ​ការិនី​ជា​ច្រើន​បាន​​សម្ដែង​អារម្មណ៍​ក្ដុកក្ដួល​ជា​ខ្លាំង និង​ ចូល​រួម​​រំលែក​ទុក្ខ​ដល់​ក្រុម​គ្រួសារ​នៃ​សព។

ប្រធាន​សមាគម ស៊ីន ស៊ីសាមុត លោក ស៊ីន ច័ន្ទឆាយា បាន​ទទួល​អនិច្ចកម្មកាល​ពី​​​ប្រហែល​​១​ម៉ោង​មុន​នេះ ដោយ​សារ​ឧប្បត្តិហេតុ​រអិល​ដួល​​ខ្លួន​ឯង នៅ​ខាង​មុខ​ផ្ទះ​ជួល​ទីតាំង​សមាគម​សព្វ​ថ្ងៃ បន្ទាប់​ពី​លោក​ត្រឡប់​​មក​ពី​ទទួល​ទាន​កាហ្វេ​ជា​ទម្លាប់។ នេះ​បើ​តាម​ប្រធាន​សមាគម​សិល្បករ​ខ្មែរ​លោក សុះ ម៉ាច។