មានរឿងចម្លែកកើតឡើងសពលោក ស៊ីន ច័ន្ទឆាយា ហូរទឹកភ្នែកពេលម្ដាយសែន "ភ្លាឡាវ"

2015-02-02 17:51:34
ចំនួនមតិ 0 | ចំនួនចែករំលែក 0

ចន្លោះមិនឃើញ

មានរឿងចម្លែកមួយពិតជាបានកើតមានក្នុងថ្ងៃបុណ្យសពរបស់លោក ស៊ីន ច័ន្ទឆាយា ពោលគឺកូនទី២របស់អធិរាជសំឡេងមាសលោកតា ស៊ីន ស៊ីសាមុតរូបនេះ នៅសុខៗស្រាប់តែហូរទឹកភ្នែក។ នេះបើតាមលោកយាយ ខាវ ថងញ៉ុត ជាម្ដាយអះអាង។

លោកយាយ ប្រាប់ថា ដំបូងលោកយាយបានធ្វើភ្លាឡាវឲ្យកូនប្រុស ព្រោះដឹងថាកូនប្រុសលោកយាយរូបនេះចូលចិត្ត។ បន្ទាប់មកលោកយាយក៏ទៅដាក់អុជធូបសែនឲ្យ បន្តិចក្រោយមកស្រាប់តែឃើញក្រោមភ្នែកសពលោក ស៊ីន ច័ន្ទឆាយា មានទឹកសើមៗដូចចំហាយទឹកកក។ លោក អះអាងថា នោះគឺជាទឹកភ្នែករបស់កូនប្រុសលោកយាយយំ ហើយមានតែលោកយាយប៉ុណ្ណោះដែលឃើញ អ្នកផ្សេងមិនឃើញឡើយ។

“ឃើញអីចឹងខ្ញុំក៏ប្រាប់ថា កូនឯងមិនបាច់ទឹកភ្នែកហ្អេ ទៅឲ្យបានកន្លែងសុខទៅ ម៉ែដឹងហើយ...ធម្មតាមនុស្សតែកើតគឺស្លាប់ហើយ ម៉ាក់ក៏ដូចគ្នា គ្រាន់តែមុននឹងក្រោយទេ..."។

លោក ស៊ិន ច័ន្ទឆាយា បានទទួលមរណភាពកាលពីថ្ងៃទី២០មករា ២០១៥ ដោយសារដួលបោកក្បាលផ្សំនឹងលោកមានជំងឺលើសឈាម ទឹកនោមផ្អែម និងបេះដូងផង។ យ៉ាងក្រុមគ្រួសារអះអាងថា អ្នកស្នងមរតកឪពុករូបនេះ ស្លាប់តែដោយសារតែរំភើបខ្លាំងពេក ក្នុងនោះទី១ដោយសារ ទើបទទួលប្រាក់បានពីការលក់ចម្រៀងមរតកឪពុកចំនួន៧០បទឲ្យធនាគារអេស៊ីលីដា បានប្រាក់២០០០ដុល្លារ។ នោះគឺជាប្រាក់លើកដំបូងបំផុតបានពីមរតកអ្នកមានគុណ។

“យើងអ្ហា…បានស្គាល់រសជាតិទឹកប្រាក់លើកដំបូងរបស់លោកឪពុកហើយ។ ចំពោះយើង វាច្រើនខ្លាំងណាស់លុយ ២០០០ ដុល្លារ ប៉ុន្មានថ្ងៃទៀត ប៉ាប៉ាទៅបើកលុយហើយ... " លោក ស៊ីន ច័ន្ទឆាយា និយាយមុនស្លាប់ប៉ុន្មានថ្ងៃប៉ុណ្ណោះ។

(រាប់ពីឆ្វេង) លោកយាយ ខាវ ថងញ៉ុតម្ដាយបង្កើត និងអ្នកស្រី ស៊ីន យុត្តណា ជាបងស្រីបង្កើតលោក ស៊ីន ច័ន្ទឆាយា

ឯមូលហេតុដែលធ្វើឲ្យលោករំភើបទី២នោះ តាមលោកយាយ ខាវ ថងញ៉ុតគឺ លោក ឆាយា ជិតបានទៅអាមេរិកលើកដំបូងដែរក្នុងឆាកជីវិត ក្នុងបេសកកម្មសិល្បៈដោយត្រៀមចេញដំណើរនៅរង្វង់មុនចូលឆ្នាំខ្មែរខាងមុខ។ ផ្អែកលើមូលហេតុទាំងពីរនេះ ក្រុមគ្រួសារសន្និដ្ឋានថា ជាចំណែកមួយដែលធ្វើឲ្យសាច់ញាតិរបស់ពួកគេចាកចេញគ្មានថ្ងៃត្រឡប់វិញ។

លោក ស៊ីន ច័ន្ទឆាយា ស្លាប់ក្នុងអាយុ ៥៦ឆ្នាំ។ លោកគឺជាកូនទី២ក្នុងចំណោមបងប្អូន ៤នាក់(ស្រី១ ប្រុស៣) ក្នុងនោះបងស្រីបង្អស់ឈ្មោះ ស៊ីន យុត្តណា អាយុ ៥៩ឆ្នាំបច្ចុប្បន្នរស់នៅជាមួយម្ដាយនាខេត្តស្ទឹងត្រែង។ ប្អូនបន្ទាប់លោកឈ្មោះ ស៊ីន វ៉ាន់ថា ស្លាប់កាលសម័យប៉ុលពត និងប្អូនប្រុសពៅឈ្មោះ ស៊ីន ប្រាសាទសង្វា ស្លាប់កាលពីជាង១០ឆ្នាំមុន៕

អត្ថបទ៖ មូលហេតុគួរឲ្យសង្វេគ២ ក្រុមគ្រួសារចាត់ទុកជាមូលហេតុស្លាប់កូនប្រុស ស៊ីន ស៊ីសាមុត

http://youtu.be/qRWW8w-d6tY

អត្ថបទ៖ ទារិកា