មូលហេតុគួរឲ្យសង្វេគ២ ក្រុមគ្រួសារចាត់ទុកជាមូលហេតុស្លាប់កូនប្រុស ស៊ីន ស៊ីសាមុត

2015-01-27 16:37:41
ចំនួនមតិ 0 | ចំនួនចែករំលែក 0

ចន្លោះមិនឃើញ

បើទោះគេដឹងថាលោក ស៊ីន ច័ន្ទឆាយា ស្លាប់ដោយសារខ្យល់គដួល ផ្សំនឹងលោកមានជំងឺលើសឈាម និងបេះដូងផងក្ដី ប៉ុន្តែក្រុមគ្រួសារបានដាក់ការសង្ស័យថា បណ្ដាលមកពីមូលហេតុ២សំខាន់ៗផ្សេងទៀត។

មូលហេតុទាំងពីរនោះ គឺពាក់ព័ន្ធនឹងការរំភើប អបអរខ្លាំងពេក។ អ្នកស្រី សម សាន្ត វ័យ ៦០ ជាភរិយាសពលោក ស៊ីន ច័ន្ទឆាយា ប្រាប់ថា មុនស្លាប់ប៉ុន្មាន ស្វាមីរបស់អ្នកស្រី ទើបទទួលបានប្រាក់កម្រៃមរតកលោកឪពុករបស់លោកលើកដំបូងក្នុងឆាកជីវិត។ ប្រាក់នោះបានមកពីការទិញបទចម្រៀងមរតកលោក ស៊ីន ស៊ីសាមុត ចំនួន ៧០បទពីធនាគារអេស៊ីលីដា។

“តាមខ្ញុំស្មាន គាត់ប្រហែលជារំភើបពេកចំពោះលុយអេស៊ីលីដា ដែលគេទិញបទចម្រៀងលោកឪពុកគាត់ ហើយគាត់តែងនិយាយថា យើងអ្ហា...បានស្គាល់រសជាតិទឹកប្រាក់លើកដំបូងរបស់លោកឪពុកហើយ។ ចំពោះយើង វាច្រើនខ្លាំងណាស់លុយ ២០០០ ដុល្លារ ប៉ុន្មានថ្ងៃទៀត ប៉ាប៉ាទៅបើកលុយហើយ...អីចឹងខ្ញុំគិតថា គាត់ទំនងសប្បាយចិត្តពេកពីរឿងលុយបានមកពីមរតកឪពុកគាត់លើកដំបូង...”។ អ្នកស្រី សម សាន្ត ថ្លែងទាំងអួលដើមក។

ងាកមកលោកយាយ ខាវ ថងញ៉ុត ជាភរិយាលោកតា ស៊ីន ស៊ីសាមុត ត្រូវជាម្ដាយសពលោក ស៊ីន ច័ន្ទឆាយា នោះថ្លែងដោយធ្វើការសន្និដ្ឋានផ្ទាល់ខ្លួនដែរថា កូនទី២របស់លោកយាយទំនងស្លាប់ដោយសារការត្រេកអរខ្លាំងពេក ក្នុងនោះក្រៅពីការរីករាយចំពោះទទួលបានប្រាក់ពីមរតកឪពុកលើកដំបូង កូនប្រុសរបស់លោកយាយ ក៏ទើបសម្ភាសន៍ជាប់ទៅសហរដ្ឋអាមេរិកលើកដំបូងទៀត ដោយត្រៀមចាកចេញពីប្រទេសក្នុងពេលឆាប់ៗនេះ។

“ប៉ាស្ព័រអីបានហើយ ស៊ីញ៉េអីអស់ហើយតើ ត្រូវទៅខែ៣ខែ៤ ចូលឆ្នាំខ្មែរហ្នឹង ដឹងអីជួបអកុសលអីចឹង។ អីចឹង ខ្ញុំដឹងថាកូនខ្ញុំវាអរ រំភើប ព្រោះច្បាប់កម្មសិទ្ធិបញ្ញាអីបាន ហើយបានទៅអាមេរិកទៀត អីចឹងគឺវាអរហ្នឹងហើយ..."។ លោក យាយ បន្តថា លោកគិតថាកូនប្រុសលោកយាយត្រេកអរព្រោះបានទៅអាមេរិក ទំនងអាចរកបានប្រាក់ខ្លះ ដោះស្រាយជីវភាពដែលខ្វះមុខខ្វះក្រោយរាល់ថ្ងៃ។

លោក ស៊ីន ច័ន្ទឆាយា បានធ្វើមរណកាលនៅថ្ងៃទី២០ មករា ២០១៥ ក្រោយពីលោកបានត្រឡប់មកពីធនាគារអេស៊ីលីដាចាត់ចែងរឿងថវិកាបានពីមរតកឪពុក និងពិសាកាហ្វេរួចហើយដួលពេលបើកទ្វាររបងផ្ទះចូលបានតែប៉ុន្មានជំហាន។ អ្នកស្រី សម សាន្ត រៀបរាប់ហេតុការណ៍ក្នុងថ្ងៃនោះថា លោក ស៊ីន ច័ន្ទឆាយា បានទិញខ្វិតទុំពីរមកឲ្យអ្នកស្រី ព្រោះដឹងថាអ្នកស្រីចូលចិត្ត រួចក៏ចេញទៅធនាគារអេស៊ីលីដា។ លុះពេលត្រឡប់មកវិញ ចូលផ្ទះក៏ជួបគ្រោះអកុសលតែម្ដង។

អ្នកស្រី បន្តថា ពេលស្វាមីដួលនៅខាងមុខផ្ទះ ភ្លាមៗអ្នកស្រីអត់ដឹងឡើយព្រោះជាប់ធ្វើម្ហូបនៅខាងក្រោយ ទាល់តែមានអ្នកដំណើរឆ្លងកាត់ឃើញ ហើយគេមកគោះទ្វារហៅ ទើបអ្នកស្រីចេញមកឃើញស្វាមីដួលទៅហើយ។ "គ្រាន់តែឃើញប៉ុណ្ណឹង ស្លុតអស់រលីងហើយ គាត់ដួលប៉ុណ្ណេះ ខ្ញុំដឹងថាចប់ហើយ ហើយខ្ញុំក៏ចាប់ផ្ដើមជូតខ្លួនឲ្យប្តី បន្តិចមកកូនធំជាងគេក៏មកទាន់ ហើយបីយកទៅពេទ្យ ពេលទៅដល់ ពេទ្យថាស្លាប់បាត់ទៅហើយ...!”។

រឿងរឹតតែគួរកម្សត់នោះ អ្នកស្រីប្រាប់ថា ពេលដឹកសពមកដល់អត់ហ៊ានយកចូលផ្ទះទេ គឺដាក់ត្រឹមមុខផ្ទះ ព្រោះជាផ្ទះជួលគេអត់ហ៊ានយកចូល ទាល់តែប្អូនស្រីម្ចាស់ផ្ទះទូរសព្ទប្រាប់ម្ចាស់ផ្ទះ ហើយគេអនុញ្ញាត ទើបបាននាំសពចូលផ្ទះ។

ក្រុមគ្រួសារសព កំពុងកើតក្ដីបារម្ភចំពោះកត្តាជីវភាព ក្រោយលោក ស៊ីន ច័ន្ទឆាយា មរណភាព ព្រោះលោក គឺជាបុគ្គលរកចំណូលចូលផ្ទះធំបំផុត។ អ្នកស្រី សម សាន្ត ថ្លែងថា កាលៈទេសៈនេះ អ្នកស្រីមានតែបង្ខំចិត្តដំណើរការសាលាបង្រៀនសិល្បៈរបស់ស្វាមីបន្តទៀត ក្រោមជំនួយអតីតកូនសិស្ស និងមិត្តភ័ក្ដិស្វាមីមួយចំនួនទៀត។ "កូនសិស្សគាត់មួយចំនួនប្រាប់ថា គេនៅតែមករៀន ហើយគ្នាគាត់ម្នាក់ទៀតដែលជួយបង្រៀនសិស្សជាមួយគាត់ គេថាមកជួយដែរ។

ក្នុងបុណ្យសព និងបុណ្យខួប ៧ថ្ងៃ និង១០០ថ្ងៃទើបបញ្ចប់ម្សិលមិញនេះ អ្នកស្រី សម សាន្ត ថ្លែងប្រាប់ Sabay ដែលបាននាំបច្ច័យមួយចំនួនទៅចូលបុណ្យថា អ្នកស្រីទទួលបានជំនួយមួយចំនួនដែរ ពីសមាគមន៍សិល្បៈលោក សុះ ម៉ាច មន្ទីរក្រសួងពាក់ព័ន្ធ និងមិត្តភ័ក្ដិស្វាមីមួយចំនួនទៀត។ យ៉ាងណា អ្នកស្រីសូមអំពាវនាវសូមសប្បុរសជនទាំងក្នុង និងក្រៅស្រុកមេត្តាជួយដល់ក្រុមគ្រួសារអ្នកស្រីផង...៕

http://youtu.be/6c18DG8rW6I អត្ថបទ៖ អ្នកសិល្បៈផ្ញើសារ រំលែកទុក្ខមរណភាពកូនប្រុសអធិរាជសំឡេង មាស ស៊ីន ស៊ីសាមុត

អត្ថបទ៖ ទារិកា