៤ចំណុចសំខាន់អ្នកទៅទស្សនាជម្រើសជាតិត្រូវអាន បញ្ចៀសបញ្ហាដល់ខ្លួន
- 2018-09-06 03:24:53
- ចំនួនមតិ 0 | ចំនួនចែករំលែក 0
៤ចំណុចសំខាន់អ្នកទៅទស្សនាជម្រើសជាតិត្រូវអាន បញ្ចៀសបញ្ហាដល់ខ្លួន
ចន្លោះមិនឃើញ
ការប្រកួតរវាងក្រុមបាល់ទាត់ជម្រើសជាតិកម្ពុជា នឹងក្រុមជម្រើសជាតិម៉ាឡេស៊ី នឹងធ្វើឡើងនៅថ្ងៃទី១០ ខែកញ្ញា ឆ្នាំ២០១៨ វេលាម៉ោង ៦:៣០ នាទីល្ងាចនៅពហុកីឡដ្ឋានជាតិ សម្រាប់ការប្រកួតមិត្តភាពអន្តរជាតិ។ ទាក់ទងការប្រកួតនេះអ្នកគាំទ្រគួរណាស់ត្រូវដឹងឲ្យបាន៤ចំណុចនេះយ៉ាងតិច ដើម្បីបញ្ចៀសបញ្ហាដល់ខ្លួនក្នុងការទៅទស្សនា។
១-អាវភ្លៀង ៖ គ្រប់គ្នាប្រហែលជាដឹងហើយថា រដូវនេះតែងមានភ្លៀងធ្លាក់ ដូច្នេះទៅទស្សនាការប្រកួតគួរណាស់យកអាវភ្លៀង ឬ ឆត្រ ទៅជាមួយ ដើម្បីធានាថា ការទស្សនាមានភាពកក់ក្ដៅ។
២-បញ្ចៀសការស្ទះចរាចរណ៍៖ ការប្រកួតដំបូងដែលស្ថិតក្រោមការដឹកនាំរបស់តារាបាល់ទាត់ពិភពលោក Honda ប្រាកដណាស់នឹងមានអ្នកគាំទ្រយ៉ាងច្រើនទៅទស្សនាការប្រកួតនេះ។ ដូច្នេះដើម្បីបញ្ចៀសការស្ទះចរាចរណ៍អ្នកគាំទ្រគួរណាស់ទៅមុនការប្រកួត ម្យ៉ាងទៀតអាចស្វែងរកកន្លែងអង្គុយបានល្អ និងងាយស្រួលទស្សនា។
៣-ប្រយ័ត្នរបស់មានតម្លៃ៖ ជាការពិតណាស់កន្លងមកនៅពេលមានការប្រកួតរបស់ជម្រើសជាតិ ត្រូវបានគេកត់សម្គាល់ឃើញថា មានមនុស្សទៅទស្សនាច្រើន ហើយថែមទាំងមានជន់ឆ្លៀតឱកាសលូកហោប៉ៅជាដើម ដូច្នេះនៅពេលមានមនុស្សច្រើនគួរប្រុងប្រយ័ត្នឲ្យបានខ្ពស់រាល់វត្ថុមានតម្លៃ។
៤-បញ្ឈប់ការវាយតប់គ្នាក្នុងពេលទស្សនា៖ កន្លងមកអ្នកគាំទ្រកម្ពុជានៅពហុកីឡដ្ឋានជាតិ ត្រូវបានគេឃើញថា មានការវាយតប់គ្នារហូតមានកាប់ដោយប្រើកាំបិតឬដាវជាដើម ហើយក៏ត្រូវបានកម្លាំងមានសមត្ថកិច្ចក្របួចចាប់បាន ដើម្បីយកទៅណែនាំ។ រឿងនេះជាចំណុចអវិជ្ជមានធំមួយ ដែលគ្រប់គ្នាមិនត្រូវធ្វើទៀតឡើយ ម្យ៉ាងទៀតការប្រកួតនេះសហព័ន្ធកីឡាបាល់ទាត់កម្ពុជាបានត្រៀមកម្លាំងយ៉ាងច្រើន ដើម្បីបង្ការចំណុចនេះ។
បន្ទាប់ពីការប្រកួតមិត្តភាពនេះទៅកម្ពុជានៅសល់ពីរប្រកួតទៀតគឺជួបក្រុមជម្រើសជាតិទីម័រខាងកើត ថ្ងៃទី១២ ខែតុលា ឆ្នាំ២០១៨ និងប៉ះក្រុមជម្រើសជាតិសិង្ហបុរីថ្ងៃទី១៦ ខែតុលា ឆ្នាំ២០១៨ ដែលពីរប្រកួតនេះធ្វើឡើងវេលាម៉ោង ៦:៣០ នាទីដូចគ្នា នៅពហុកីឡដ្ឋានជាតិ៕