នាយករដ្ឋមន្ត្រីជប៉ុនប្រកាសបិទសាលា ១ខែ ខណៈអូឡាំពិកនៅតូក្យូល្ហិចល្ហៀងថារំសាយតែម្ដង

2020-02-27 11:33:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្ដមនាយករដ្ឋមន្ត្រីប្រទេសជប៉ុន Shizo Abe បានប្រកាសកាលពីថ្ងៃពុធនៅសភាថា ព្រឹត្តិការណ៍កីឡា និងវប្បធម៌នឹងត្រូវរំសាយចំនួន ២សប្ដាហ៍ ដើម្បីប្រយុទ្ធប្រឆាំងនឹងជំងឺខូវិដ-១៩ ខណៈព្រឹត្តិការណ៍អូឡាំពិកទីក្រុងតូក្យូល្ហិចល្ហៀងថារំសាយចោលតែម្ដងនៅឆ្នាំ២០២០។

លោក Abe មានប្រសាសន៍ថា មួយសប្ដាហ៍ ឬ ពីរសប្ដាហ៍ខាងមុខជាកាលៈទេសៈ ដ៏សំខាន់ក្នុងការបញ្ឈប់ការចម្លងជំងឺនេះ ដូច្នេះហើយរដ្ឋាភិបាលពិចារណាថាការជួបជុំធំៗដូចជាកម្មវិធីកីឡា និងវប្បធម៌មានហានិភ័យខ្ពស់ណាស់។

ឯកឧត្ដមនាយករដ្ឋមន្ត្រីក៏មានប្រសាសន៍នៅថ្ងៃព្រហស្បតិ៍នេះថា សាលារៀននៅជប៉ុនចាប់ពីបឋមសិក្សា ទៅវិទ្យាល័យនឹងត្រូវបិទទ្វារអំឡុងខែមីនានេះ។

ចំណែកឯព្រឹត្តិការណ៍អូឡាំពិកនៅរាជធានីតូក្យូវិញ មានការលើកឡើងពីសមាជិកគណៈកម្មការអូឡាំពិកអន្តរជាតិលោក Dick Poundថា ព្រឹត្តិការណ៍ដែលនឹងប្រារព្ធនៅខែកក្កដា ឆ្នាំ២០២០នេះមិនអាចពន្យារពេលទេ ហេតុនេះមានតែរំសាយនៅឆ្នាំនេះ ដោយសារតែជាន់លើកាលវិភាគកម្មវិធីកីឡាដទៃទៀត។

លោកបានបន្តថា រដ្ឋាភិបាលជប៉ុនមានពេល ៣ខែសម្រាប់ពិចារណាថា ព្រឹត្តិការណ៍អូឡាំពិកតូក្យូរំសាយ ឬក៏អត់។ ទាក់ទិននឹងរឿងនេះដែរ ខាងមន្ត្រីរបស់ប្រទេសជប៉ុនឆ្លើយតបថា ជប៉ុននឹងមិនរំសាយទេព្រឹត្តិការណ៍កីឡាអន្តរជាតិនេះ តែបើតាមប្រភពមួយចំនួនបានឲ្យដឹងថា ការហ្វឹកហ្វឺនអ្នកស្ម័គ្រចិត្តសម្រាប់រៀបចំអូឡាំពិកនៅជប៉ុននៅខែមីនា បានរំសាយហើយ។

គួរបញ្ជាក់ផងដែរថា ជប៉ុនគិតមកទល់ពេលនេះ មានអ្នកឆ្លងខូវិដ-១៩ យ៉ាងហោចណាស់ ១៨៦ករណី ហើយស្លាប់ ៣នាក់៕

ប្រភព៖ Channelnewsasia | The Jakarta Post | Kyodo News ប្រែសម្រួល៖ ហ៊ីម រស្មី