ព្រឹត្តិការណ៍ធំៗ អន្រួនពិភពលោក នៅក្នុងឆ្នាំ២០១៧

2017-12-23 04:30:29
ចំនួនមតិ 0 | ចំនួនចែករំលែក 0

ចន្លោះមិនឃើញ

២០១៧ត្រូវបានគេកំណត់ថាជាឆ្នាំមួយក្នុងចំណោម រយៈពេល៣ឆ្នាំដែលព្រឹត្តិការណ៍ពិភពលោកមិនសូវមានភាពរំជើបរំជួលខ្លាំង។ នេះបើតាមការទើបចេញផ្សាយរបស់ទីភ្នាក់ងារព័ត៌មាន AFP ហើយត្រូវបានដកស្រង់ដោយ The Daily Nation។

ខាងក្រោមនេះគឺជាព្រឹត្តិការណ៍ធំៗជុំវិញពិភពលោកពេញមួយឆ្នាំ២០១៧៖

៩/ ឆ្នាំរបស់ Trump

ទីបំផុតនៅថ្ងៃទី ២០ ខែមករា មហាសេដ្ឋីមកពីគណបក្សសាធារណរដ្ឋ បានក្លាយជាប្រធានាធិបតីទី ៤៥ របស់សហរដ្ឋអាមេរិក ដោយបានប្រកាន់យកគោលការណ៍នយោបាយ "អាមេរិកដំបូងសិន"។

លោកប្រធានាធិបតីវ័យ៧១ឆ្នាំ បានដកចេញនូវកិច្ចព្រមព្រៀងអន្តរជាតិមួយចំនួនដូចជា៖អាកាសធាតុ ពាណិជ្ជកម្ម អន្តោប្រវេសន៍ និង អង្គការយូណេស្កូជាដើម។ កាលពីថ្ងៃទី៦ ខែធ្នូថ្មីៗនេះ Trump បានធ្វើរឿងដ៏គួរឲ្យភ្ញាក់ផ្អើលមួយ ដែលកំពុងរញ្ជួយពិភពលោក គឺ ការប្រកាស ទទួលស្គាល់ក្រុងយេរូសាឡឹម ថាជារដ្ឋធានីរបស់ប្រទេសអ៊ីស្រាអែល។

៨/ ការចាកចេញពីសហភាពអឺរ៉ុបរបស់ អង់គ្លេស

នៅថ្ងៃទី ២៩ ខែមីនា ទីក្រុងឡុងដ៍បានចាប់ផ្តើមដំណើរការចាកចេញពីសហភាពអឺរ៉ុប។ ជាលទ្ធផល បន្ទាប់ពីចរចាជាច្រើនខែ នៅថ្ងៃទី៨ ខែធ្នូ អង់គ្លេស និង អឺរ៉ុបបានឈានដល់កិច្ចព្រមព្រៀងដើរបែកគ្នាមែន។

៧ ភាពរង្គោះរង្គើនៅមជ្ឈឹមបូព៌ា

នៅថ្ងៃទី៥ ខែមិថុនា អារ៉ាប៊ីសាអូឌីត និង សម្ព័ន្ធមិត្តរបស់ខ្លួនបានកាត់ផ្តាច់ទំនាក់ទំនងការទូតជាមួយប្រទេសកាតា។

នៅក្នុងវិបត្តិការទូតដ៏ធំបំផុតដែលបានវាយប្រហារតំបន់នេះក្នុងរយៈពេលជាច្រើនឆ្នាំ ពួកគេបានចោទប្រកាន់ក្រុងដូហា ប្រទេសកាតា ថាបានគាំទ្រភេរវករ និងស្និទ្ធិទៅនឹងអ៊ីរ៉ង់ដែលជាសត្រូវនឹងអារ៉ាប៊ីសាអ៊ូឌីត។

៦ មហន្តរាយសេដ្ឋកិច្ច របស់ប្រទេសវេណេហ្ស៊ុយអេឡា

បរវកញ្ញា Stefania Fernandez របស់វេណេហ្ស៊ុយអេឡាក្នុងឆ្នាំ ២០០៩ នៅពេលដែលប្រទេសនេះត្រចះត្រចង់នៅឡើយ

វេណេហ្ស៊ុយអេឡា ធ្លាប់ជាប្រទេសអ្នកមានបំផុតមួយនៅអាមេរិកឡាទីន ប៉ុន្តែត្រូវរងគ្រោះខ្ទេចខ្ទាំ ដែលបច្ចុប្បន្នស្ថានភាពសេដ្ឋកិច្ចនៅប្រទេសនេះអាក្រក់ជាងស៊ីរីទៅទៀត ដោយសារសង្រ្គាមស៊ីវិល។ នៅថ្ងៃទី ៣០ ខែកក្កដា ប្រធានាធិបតីសង្គមនិយម Nicolas Maduro បានអនុម័តរដ្ឋធម្មនុញដ៏ចម្រូងចម្រាស់ ដែលនាំឲ្យមានការតវ៉ា ការបង្រ្កាប និង សំលាប់ជនស៊ីវិលរាប់សិបនាក់។ អតិផរណាវេណេហ្ស៊ុយអេឡាជាង៧០០% ដែលជាកម្រិតដ៏អាក្រក់បំផុតនៅលើ ដែលធ្វើឲ្យ រូបិយប័ណ្ណរបស់ខ្លួនស្ទើរតែគ្មានតំលៃ។

ហិង្សា ឃាតកម្ម អំពើពុករលួយ ការខ្វះខាតស្បៀងអាហារ បានបំផ្លាញប្រទេសស្តុកប្រេងដ៏ធំបំផុតរបស់ពិភពលោកមួយនេះ ចាប់តាំងពីអតីតប្រធានាធិបតី លោក Hugo Chavez ប្រែក្លាយប្រទេសទៅជារបបសង្គមនិយមចាប់ពីឆ្នាំ ១៩៩៩ ដែលត្រូវបានគេចាត់ទុកថា "ជាវីរបុសនៃភាពក្រីក្រ hero for the poor "។ មុនពេលលោកស្លាប់ទៅនៅឆ្នាំ២០១៣ លោកប្រធានាធិបតីបានជ្រើសយក Nicolas Maduro ប្រធានាធិបតីបច្ចុប្បន្នស្នងតំណែងជំនួសលោក។

៥ ការកើនឡើងកម្តៅនៅកូរ៉េខាងជើង

នៅថ្ងៃទី ២៩ ខែវិច្ឆិកាមេដឹកនាំកូរ៉េខាងជើងលោកគីម ជុងអ៊ុនបាននិយាយថាប្រទេសឯកោរបស់លោកជោគជ័យក្នុងការធ្វើតេស្តសាកល្បងមីស៊ីលរយៈចម្ងាយឆ្ងាយដែលអាចបាញ់ទៅដល់ទឹកដីអាមេរិក។

៤ ការសម្លាប់ជនជាតិភាគតិចរ៉ូហ៊ីងយ៉ា នៅមីយ៉ាន់ម៉ា

ជនជាតិភាគតិចរ៉ូហ៊ីងយ៉ា

នៅថ្ងៃទី ២៥ ខែសីហាកងទ័ពនៅក្នុងប្រទេសមីយ៉ាន់ម៉ាដែលជាអ្នកកាន់ពុទ្ធសាសនាបានចាប់ផ្តើមបង្រ្កាបលើក្រុមរ៉ូហ៊ីងយ៉ានៅក្នុងរដ្ឋរ៉ាឃីនភាគខាងលិចប្រទេសនេះ។ ប្រជាជនរ៉ូហ៊ីងយ៉ាជិត ៦៥០ ០០០ នាក់បានភៀសខ្លួនទៅបង់ក្លាដេស។

៣ ដែនដីកាតាឡាន់ទាមទារឯករាជ្យពីអេស្ប៉ាញ

ប្រជាជនកាតាឡាន់បោះឆ្នោតប្រជាមតិទាមទារឯករាជពីអេស្ប៉ាញ

សមាជិកសភា Catalan បានបោះឆ្នោតនៅថ្ងៃទី ២៧ ខែតុលា ដើម្បីប្រកាសឯករាជ្យពីប្រទេសអេស្ប៉ាញ ប៉ុន្តែត្រូវរដ្ឋបាលទីក្រុងម៉ាឌ្រីដច្រានចោល និង បានចាត់ទុកថានេះទង្វើខុសច្បាប់។ អេស្ប៉ាញមិនត្រឹមតែមិនបានផ្តល់ឯករជ្យឲ្យកាតាឡាន់តាមការទាមទារប៉ុណ្ណោះទេ ថែមទាំងលែងឲ្យតំបន់នេះស្វ័យ័តដូចពីមុនទៀតផង។

២ ប្រធានាធិបតីចាស់វស្សាលោកមូហ្គាបេ ធ្លាក់ពីតំណែងពីប្រទេស ហ្ស៊ីមបាវ៉េ

នៅថ្ងៃទី ២១ ខែវិច្ឆិកា លោក Robert Mugabe វ័យ៩៣ឆ្នាំបាន លាលែងពីតំណែងបន្ទាប់ពីបានគ្រប់គ្រងប្រទេសនេះអស់រយៈពេល ៣៧ ឆ្នាំ នៅពេលពួកយោធា និង គណបក្សរបស់លោកបានបោះបង់លោកចោល ដែលត្រូវស្នងតំណែងដោយលោកអនុប្រធានាធិបតី Emmerson Mnangagwa ជំនួសលោក មូហ្គាបេ។

១ IS បរាជ័យតែមិនរលាយ

ប្រទេសអ៊ីរ៉ាក់នៅថ្ងៃទី ៩ ខែធ្នូនេះបានប្រកាសជ័យជំនះនៅក្នុងសង្គ្រាមរបស់ខ្លួនដើម្បីបណ្តេញរដ្ឋអ៊ីស្លាម (IS) ប៉ុន្តែពួកជីហាដ នៅតែជាការគំរាមកំហែង។ នៅក្នុងប្រទេសស៊ីរីឯណេះវិញ ក្រុម IS ក៏បានបាត់បង់ដែនដីភាគច្រើនដែលពួកគេធ្លាប់បានកាន់កាប់ផងដែរ។

នៅជុំវិញពិភពលោករាប់តាំងពីអង់គ្លេសដល់អេហ្ស៊ីប ការវាយប្រហារជាច្រើនថាបានកើតឡើងដោយក្រុមនេះជាអ្នកបង្ក។

ប្រភព៖ www.afp.com ប្រែសម្រួល៖ សុខ លាងហ៊ត