Lampard ស្នើ Willian រឿងមួយ បន្ទាប់ពីបង្ហាញទម្រង់លេងញាក់សាច់យប់មិញ

2018-02-21 11:55:00
ចំនួនមតិ 0 | ចំនួនចែករំលែក 0

ចន្លោះមិនឃើញ

វីរបុរសក្លឹប Chelsea អតីតខ្សែបម្រើ Frank Lampard ក្នុងថ្ងៃនេះ បានសម្ដែងការកោតសរសើរដល់ទម្រង់លេងរបស់ ខ្សែប្រយុទ្ធស្លាប Willian ពេលប៉ះ Barcelona យប់មិញ។ ទោះជាយ៉ាងណា Lampard បានទទូចឲ្យកីឡាករប្រេស៊ីលខិតខំទម្រង់លេងល្អបែបនេះឲ្យបានយូរ។

Lampard បាននិយាយថា៖ "គេលេងបានយ៉ាងល្អឥតខ្ចោះក្នុងប្រកួតយប់មិញ។ នៅពេលមុនប្រកួត ពួកយើងសុទ្ធតែនាំគ្នានិយាយពី Eden Hazard តែ Willian ទៅវិញទេ ដែលលេងបានល្អជាងគេក្នុងប្រកួតហ្នឹង"។

អតីតខ្សែបម្រើបន្ត៖ "គ្រាប់ដែលគេស៊ុតហ្នឹង មានសណ្ឋានដូចគ្រាប់ដែលខ្ញុំធ្លាប់ឃើញគេប្រឹងរៀនស៊ុតជាច្រើនដងនៅពេលកំពុងហ្វឹកហាត់។ គេពិតជាកីឡាករមួយរូបដ៏ល្អ ប៉ុន្តែអ្វីដែលខ្ញុំចង់ឃើញពីគេនោះ គឺបន្តលេងទម្រង់លេងបែបនេះឲ្យកាន់តែយូរកាន់តែល្អ"។

សូមបញ្ជាក់ផងដែរថា Willian មិនសូវត្រូវបានអ្នកចាត់ការ Antonio Conte ដាក់ចូលលេងឲ្យបានជាប់លាប់ប៉ុន្មានទេ ក្នុងរដូវកាលនេះ ប៉ុន្តែបានបង្ហាញទម្រង់យ៉ាងល្អក្នុងប្រកួតយប់មិញ។ កីឡាករប្រេស៊ីល បានបង្កើតឱកាសស៊ុតជាច្រើនលើក ក្នុងនោះស៊ុតប៉ះបង្គោលពីរលើក មុនពេលធ្វើបានសម្រេចនូវគ្រាប់បាល់ដំបូងក្នុងការប្រកួតនៅនាទី ៦៣។

ទោះជាយ៉ាងណា ជាង ១០នាទីក្រោយមក ខ្សែប្រយុទ្ធ Lionel Messi ក៏បានធ្វើការស៊ុតចូលបានសម្រេច តាមស្មើវិញ ធ្វើឲ្យជំនួបជើងទី១ Champions League វគ្គ ១៦ក្រុម រវាងតោខៀវ និងអ្នកមានបុណ្យ Barcelona បញ្ចប់ក្នុងលទ្ធផល ១ទល់នឹង ១៕

ប្រភព៖ Metro ប្រែសម្រួល៖ ហ៊ីម រស្មី