សៅ សុខា៖ ក្លឹបនៅលីគ បើនៅតែបៅដោះពហុកីឡដ្ឋានជាតិ មិនរីកចំរើនទេ

2018-02-26 06:57:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្តម សៅ សុខា ប្រធានសហព័ន្ធកីឡាបាល់ទាត់កម្ពុជា បានបញ្ជាក់ថាក្លឹបនៅលីគកម្ពុជាទាំងអស់ ប្រសិនបើនៅតែចង់យកពហុកីឡដ្ឋានជាតិជាទឹកដីរបស់ខ្លួននោះ វានឹងមិនរីកចំរើនទៅមុខនោះទេ។

ក្នុងឱកាសមហាសន្និបាតសហព័ន្ធកីឡាបាល់ទាត់កម្ពុជានៅព្រឹកមិញនេះ ឯកឧត្តម សៅ សុខា គាំទ្រចំពោះការយកខេត្តណាមួយជាទឹកដីសម្រាប់ក្លឹបនៅលីគកំពូលកម្ពុជា។ ប្រសិនបើក្លឹបទាំងអស់នៅតែចង់បានពហុកីឡដ្ឋានជាតិធ្វើជាទឹកដី ហើយមិនធ្វើកីឡដ្ឋានខ្លួនឯងទេ នោះពួកគេនឹងគ្មានថ្ងៃអ្នកមានអ្នកគាំទ្រច្រើនឡើយ។ ក្លឹបបាល់ទាត់ដែលមិនមានការគាំទ្រទេ នោះក៏មិនអាចរីកចំរើនទៅមុខបានដែរ។

គិតត្រឹមបច្ចុប្បន្ននេះលីគកំពូលកម្ពុជាកំពុងតែរវល់ខ្លាំងរឿងក្លឹបមួយចំនួនមិនទាន់មានកីឡដ្ឋានធ្វើជាទឹកដីនៅឡើយទេ។ កត្តានេះ បានធ្វើឱ្យកម្មវិធីប្រកួតលីគកំពូលកម្ពុជានៅថ្ងៃទី៣ខែមីនាឆ្នាំ២០១៨ អាចនឹងមានការប្រែប្រួល ព្រោះកត្តារៀបចំមិនទាន់នេះ។ ប្រធានសហព័ន្ធកីឡាបាល់ទាត់បានផ្ដល់យោបល់ថាក្លឹបគួរតែរៀបចំកីឡដ្ឋានរបស់ខ្លួន ឱ្យបានរៀបរយ ព្រោះវិស័យកីឡាត្រូវការអ្នកគាំទ្រ ហើយអ្នកគាំទ្រនៅតាមខេត្តក៏ខ្លាំងណាស់ដែរ។

តួយ៉ាងដូចជាយុទ្ធសាស្ត្ររបស់សហព័ន្ធសម្រាប់សាលាតម្រង់ទិសទាំង២៥ខេត្តក្រុង គឺដើម្បីស្វែងរកកីឡាករល្អ និងអ្នកគាំទ្រតាមបណ្ដាខេត្ត។ ប្រសិនបើ១ខេត្តអាចជ្រើសរើសកីឡាករបានល្អ១នាក់ក៏អាចនឹងនិយាយបានតាមថាគ្រប់ហើយសម្រាប់ជម្រើសជាតិកម្ពុជាទៅថ្ងៃអនាគត។ មិនត្រឹមតែស្វែងរកបានកីឡាករល្អនោះទេ យុទ្ធសាស្ត្រសាលាតម្រង់ទិសគ្រប់ខេត្តនេះ នឹងធ្វើឱ្យការគាំទ្រវិស័យកីឡាកាន់តែផុលផុសថែមទៀតនៅទូទាំងប្រទេសកម្ពុជា៕

អត្ថបទ៖ មុន្នីរម្យ