យ៉ាងណាហើយចំណងស្នេហ៍ នេត សុចរិយា ជាមួយគូស្នេហ៍កូនកាត់៣សាសន៍?

2018-03-07 03:05:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីបាត់មុខពីសិល្បៈក្នុងស្រុកប្រមាណជាង ២ឆ្នាំ នេត សុចរិយា ស្រាប់តែលេចមុខវិញតែម្នាក់ឯង មិនឃើញលោក Nathan Gan ជនជាតិសិង្ហបុរី កាត់ម៉ាឡេស៊ី និងអូស្ត្រាលី ជាគូស្នេហ៍សេពគប់គ្នាប៉ុន្មានឆ្នាំមកជាមួយនោះ នាំឲ្យមានការដណ្ដឹងសួរថាតើ ចំណងស្នេហ៍ពួកគេយ៉ាងណាហើយ?

បញ្ហាខាងលើនេះ ចរិយា ឆ្លើយតបថា ទំនាក់ទំនងរបស់នាង និងអតីតថៅកែស្រាផ្ដាច់មុខមួយនៅកម្ពុជានេះ នៅតែធម្មតា មិនមានការប្រែប្រួល ឬប្រេះស្រាំអ្វីឡើយ ពោលគឺនៅល្អដូចដើម។ នាងបន្តថា ២ឆ្នាំដែលនាងបាត់មុខពីសង្គមសិល្បៈខ្មែរ គឺនាង និងគូស្នេហ៍ បានទៅរស់នៅប្រទេសឥណ្ឌូណេស៊ីជាមួយគូស្នេហ៍ ធ្វើកិច្ចការងារនៅទីនោះ។

ដោយឡែក ចំពោះមូលហេតុដែលប្រិយមិត្តឃើញពេលនេះ នាងវិលមកប្រទេសកំណើតវិញតែម្នាក់ឯង ក៏មិនឆ្លុះបញ្ចាំងពីទំនាក់ទំនងពួកនាងមានភាពរកាំរកូសណាមួយដែរ។ "ខ្ញុំមកវិញម្នាក់ឯង ដោយសារត្រូវមករកស៊ីនៅទីនេះ ដោយឡែកគាត់ គាត់មកអត់ទាន់បាន គាត់ជាប់ការងារគាត់ច្រើននៅទីនោះ(ហ្សាកាតា) ហើយខ្ញុំក៏មិនអាចនិយាយបានថា គាត់នឹងមកវិញពេលណាដែរ”។

ជាមួយគ្នានឹងការអះអាងពីទំនាក់ទំនងស្នេហ៍នាងនៅផ្អែមល្ហែមដដែល អតីតពិធីការិនីទូរទស្សន៍រូបនេះ នៅបានបង្ហើបទៀតថា នាងគ្រោងរៀបការក្នុងឆ្នាំនេះ ប៉ុន្តែត្រូវអាក់ខានទៅវិញ។ "តាមពិត ពួកយើងគ្រោងរៀបការក្នុងឆ្នាំនេះតើបង ប៉ុន្តែឥឡូវយើងសម្រេចថាពន្យារពេលសិន ដោយសារត្រូវដំណើរមុខជំនួញខ្ញុំមុនសិន"។

នេត សុចរិយា ទើបប្រកាសពីផែនការអាជីវកម្មថ្មីៗប្រភេទគ្រឿងតុបតែងក្នុងផ្ទះធ្វើពីសូត្រខ្មែរ ដែលបានដាក់ឈ្មោះថា “NATRIYA HOMESILK” មានទីតាំងនៅម្ដុំវិមានឯករាជ្យ។ ហាងនេះ ត្រូវបានបើកដំណើរភ្លាមៗកាលពីសប្ដាហ៍ ពោលគឺក្រោយពីនាងបានបង្ហាញមុខក្នុងស្រុកវិញប៉ុន្មានថ្ងៃប៉ុណ្ណោះ។ ម្ចាស់ហាងវ័យក្មេងបញ្ជាក់ថា នាងគ្រោងនឹងធ្វើពិធីសម្ពោធឆាប់ៗ ហើយថា វេលានោះ គូស្នេហ៍របស់នាងលោក Nathan Gan នឹងមានវត្តមានក្នុងពិធីនោះយ៉ាងពិតប្រាកដ៕

អត្ថបទ៖ ទារិកា