នារីរបាំវ័យក្មេង ម៉ម វណ្ណវត្តី មោទនភាពខ្លាំងពេលនិយាយប្រាប់បរទេសថា ខ្លួនជាខ្មែរ

2018-03-14 07:30:05
ចំនួនមតិ 0 | ចំនួនចែករំលែក 0

ចន្លោះមិនឃើញ

មានសម្រស់ស្រស់ស្អាត ច្រមុះតូចស្រួច បើអ្នកមើលដំបូងអាចច្រឡំថា អ្នករបាំ ម៉ម វណ្ណវត្តី ជាកូនកាត់។ មានឈាមជ័រជាកូនខ្មែរសុទ្ធសាធ វណ្ណវត្តីមានមោទនភាពខ្លាំង ពេលណែនាំថាខ្លួនជាខ្មែរឲ្យអន្តជាតិបានស្គាល់។

ចំណាយពេលហាត់របាំជាង១០ឆ្នាំ និងធ្លាប់បានចេញទៅសម្ដែងជាច្រើនប្រទេសក្នុងលោក កញ្ញា ម៉ម វណ្ណវត្តី ថាគ្មានអ្វីរំភើបជាងការប្រាប់ដល់បរទេសឲ្យស្គាល់ខ្លួនជាខ្មែរនោះទេ។

ស្រីស្រស់សម្រស់មិនចាញ់តារារូបនេះបានប្រាប់ថា នាងចាំបានថា កាលបានចេញទៅសម្ដែងដំបូងក្នុងឆ្នាំ២០០៧ នៅក្នុងប្រទេសអាឡឺម៉ង ហើយនាងបានណែនាំខ្លួនដល់មហាជនបានស្គាល់ថាខ្លួនជាខ្មែរ តែគេមិនស្គាល់ទេ។បន្ទាប់មកក្នុងឆ្នាំបន្តបន្ទាប់នាងក៏បានទៅចូលរួមកម្មវិធីម្តងទៀត ពេលនោះហើយគេប្រាប់ថា គេស្គាល់កម្ពុជា ធ្វើឲ្យនាងសប្បាយចិត្តយ៉ាងខ្លាំង។

«ទៅរាំដំបូងប្រាប់ថាមកមកពីកម្ពុជា ពួកគេមិនស្គាល់ទេ ពេលសួរគេថាស្គាល់ថៃទេ ពេលនោះខ្ញុំប្រាប់គេថា កម្ពុជាជាប្រទេសនៅជិតនោះ កម្ពុជាមានអង្គរវត្ត។ ស្រាប់តែឆ្នាំបន្ទាប់ខ្ញុំទៅប្រទេសនោះម្តងទៀត តែស្គាល់ប្រទេសខ្មែរហើយគេបានមកលេងនៅខ្មែរទៀត ពេលនោះខ្ញុំសប្បាយចិត្តស្ទើស្រក់ទឹកភ្នែក»។

ស្រីស្រស់រូបនេះក៏មានមនុស្សមួយចំនួនយល់ច្រឡំថានាងជាកូនកាត់បរទេសផងដែរ។ ប៉ុន្តែអ្នកគ្រូរបាំរូបនេះ ជាកូនខ្មែរសុទ្ធសាធ។ អ្នករបាំតួនាយរោងដ៏ស្រស់សោភា ថា «កន្លងមកក៏មានអ្នកសួរខ្ញុំថា មានម្តាយឬឪពុកជាជនជាតិអ្វីទេ? ខ្ញុំតបថា គ្រួសារខ្ញុំគ្មានឪពុកម្តាយកាត់ជាតិសាសន៍អ្វីឡើយ គឺខ្មែរសុទ្ធ»។

អ្នករបាំមិនមែនគ្រាន់ចេះតែរាំឯណា អ្នករបាំរូបស្អាត ម៉ម វណ្ណវត្តី មិនត្រឹមតែអាចសម្ដែងរបាំបានយ៉ាងល្អនោះទេតែ នាងការមានជំនាញសិល្បៈផាត់មុខទៀតផង។ នាងថា ជំនាញផាត់មុខនេះអ្នករបាំគ្រប់រូបត្រូវតែចេះ ព្រោះការទៅរាំគ្មានគ្នាច្រើនទេ ហើយការស្លៀកពាក់សម្លៀកបំពាក់បុរាណនេះក៏ត្រូវចំណាយពេលយូរទៀត អីចឹងអ្នករាំត្រូវចេះតុបតែមុខដោយខ្លួនឯង។

ជាកូនស្រីទី១ ក្នុងចំណោមបងប្អូន៤នាក់ ស្រី៣ ប្រុស១ រស់នៅក្នុងរាជធានីភ្នំពេញ នាងមានម្តាយជាជាងកាត់ដេរសម្លៀកបំពាក់បុរាណ ចំណែកឯឪពុកនាងបានចែកឋានបាត់ទៅហើយ។ ក្នុងចំណោមបងប្អូនទាំង ៤ មានតែនាងម្នាក់គត់តែជាអ្នកសិល្បៈ។

វណ្ណវត្តី ធ្លាប់បានចេញសម្ដែងនៅតំបន់អាស៊ី និងអឺរ៉ុបជាច្រើនប្រទេស បច្ចុប្បន្នស្រីស្រស់រូបនេះកំពុងបម្រើការងារនៅក្នុងនាយកដ្ឋានទស្សនីយភាពសិល្បៈ នៃក្រសួងវប្បធម៌ និងវិចិត្រសិល្បៈ។ ក្រោយពីនេះនាងក៏តែងតែទៅជួយបង្រៀនរបាំបុរាណដល់ក្មេងនៅសាលាមធ្យមវិចិត្រសិល្បៈផងដែរ៕