ប្រទេសមានទឹកដីធំបំផុតទាំង ១០ នៅលើពិភពលោក

2018-03-25 03:55:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្លូវរថភ្លើង Trans-Siberian ដែលឆ្លងកាត់ប្រទេសរុស្ស៊ីគឺជាខ្សែរថភ្លើងដែលវែងជាងគេនៅលើពិភពលោក

ប្រទេសធំៗទាំង១០នៅលើពិភពលោក បូកបញ្ចូលគ្នានោះវានឹងគ្របដណ្តប់ផ្ទៃដី ៤៩%នៃផ្ទៃផែនដីសរុប ១៤៩លាន គីឡូម៉ែត្រការ៉េរបស់ពិភពលោក។ ខាងក្រោមនេះ គឺជាប្រទេសធំបំផុតទាំង១០នៅលើពិភពលោក៖

១០ ប្រទេសអាល់ហ្សេរី

ប្រទេសអាល់ហ្សេរីមានផ្ទៃដី ២,៣៨លាន គីឡូម៉ែត្រការ៉េ ជាប្រទេសធំជាងគេទី១០។ ស្ថិតនៅអាហ្វ្រិកខាងជើង ប្រទេសអាល់ហ្សេរីមានឆ្នេរសមុទ្រមេឌីទែរ៉ាណេប្រវែង ៩៩៨ គីឡូម៉ែត្រ។ ៩០% នៃប្រទេសគឺជាវាលខ្សាច់ហើយភាគច្រើននៃតំបន់វាលខ្សាច់ ដែលផ្នែកខ្លះនៃប្រទេសនេះជាប់នឹងវាលខ្សាច់សាហារ៉ា។

៩ ប្រទេសកាហ្សាក់ស្ថាន

កាហ្សាក់ស្ថាន មានផ្ទៃដី ២,៧២លាន គីឡូម៉ែត្រការ៉េ លាតសន្ធឹងលើតំបន់ទំនាប និងតំបន់ខ្ពង់រាប។ អាកាសធាតុត្រជាក់ និង ស្ងួត ប៉ុន្តែមិនទទួលរងឥទ្ធិពលអាកាសធាតុត្រូពិចឡើយ។ អតីតដែនដីសហភាពសូវៀតមួយនេះ គឺជាប្រទេសដ៏ធំបំផុតលើលោកមួយដោយគ្មានព្រំប្រទល់ជាប់នឹងសមុទ្រទេ។

៨ ប្រទេសអាហ្សង់ទីន

អាហ្សង់ទីន មានផ្ទៃដី ២,៧៨លាន គីឡូម៉ែត្រការ៉េ មានប្រជាជនច្រើនបំផុតលំដាប់ទី ៣២ នៅលើពិភពលោក និង ជាប្រទេស ដែលមានអ្នកនិយាយភាសាអេស្ប៉ាញច្រើនជាងគេ លំដាប់ទី៨ របស់ពិភពលោក។ Patagonia ជាកន្លែងដ៏គ្រោះថ្នាក់បំផុតមួយរបស់ពិភពលោក ដោយសារតែអាកាសធាតុដ៏អាក្រក់នៅទីនោះ។ ភ្នំទឹកកកអាចបាក់គ្រប់ពេល។ ភាគខាងត្បូងនៃប្រទេសអាហ្សង់ទីនឈ្មោះថា Cape Horn គឺជាតំបន់ដែលមានខ្យល់ព្យុះកាចសហាវបំផុតនៅលើពិភពលោក។

៧ ប្រទេសឥណ្ឌា

ឥណ្ឌាទាមទារតំបន់កាស្មៀភាគខាងជើងដែលមានជម្លោះជាមួយប្រទេសប៉ាគីស្ថានថាជារបស់ខ្លួន។ តែបើមិនរាប់បញ្ចូលដែនដី កាស្មៀ ឥណ្ឌាមានផ្ទៃដី ៣,២៩លាន គីឡូម៉ែត្រការ៉េ។ អាកាសធាតុប្រទេសនេះក៏ខុសគ្នារាប់តាំងពី ជួរភ្នំហិម៉ាល័យ ទៅដល់ឆ្នេរត្រូពិចនៃឧបទ្វីបខាងត្បូង។

៦ ប្រទេសអូស្រ្តាលី

អូស្រ្តាលី មានផ្ទៃដីធំល្វឹងល្វើយមែនទែន រហូតដល់ទៅ ៧,៦៩លាន គីឡូម៉ែត្រការ៉េ ធំជាងឥណ្ឌាដល់ទៅជាង២ដង។ ភាគច្រើននៃប្រជាជនរស់នៅក្នុងទីក្រុងឆ្នេរសមុទ្រដូចជា នៅស៊ីដនីស្ថិតនៅភាគខាងកើត និង ក្រុង Perth នៅភាគខាងលិច។ ប្រទេសនេះ ក៏ ជាតំបន់មួយដែលក្តៅជាងគេមួយនៅលើពិភពលោក។

៥ ប្រទេសប្រេស៊ីល

ប្រទេសដែលធំជាងគេនៅអាមេរិកខាងត្បូងមានផ្ទៃដីជាង ៨,៥១ លានគីឡូម៉ែត្រការ៉េ ប្រេស៊ីលមានព្រៃធំបំផុតនៅលើលោក គឺ តំបន់ព្រៃអាម៉ាហ្សូន។ អ្នករុករក និង អ្នកវិទ្យាសាស្ដ្រធ្លាប់បានរកឃើញអរិយធម៌មនុស្សដែលមិនធ្លាប់បានទាក់ទងជាមួយពិភពខាងក្រៅនៅព្រៃអាម៉ាហ្សូនផងដែរ។ ប្រទេសប្រេស៊ីលមានឆ្នេរសមុទ្រអាត្លង់ទិចដ៏វែងអន្លាយ ៨ពាន់ គីឡូម៉ែត្រ។

៤ ប្រទេសចិន

ចិនមានផ្ទៃដី ៩,៦លាន គីឡូម៉ែត្រការ៉េ។ ចិនមានព្រំប្រទល់ជាប់ប្រទេសចំនួន១៤។ ពីខេត្តមួយទៅខេត្តមួយក្នុងប្រទេសចិន ទាំងការរស់នៅរបស់ប្រជាជន និង អាកាសធាតុខុសគ្នាស្រលះ។ ជាប្រទេសដែលមានប្រជាជនច្រើនបំផុតនៅលើពិភពលោក ១,៣៥ ប៊ីលាន នាក់ និង មានជនជាតិភាគតិចចំនួន ៥៦ក្រុមផ្សេងៗគ្នា។ អត្រាអ្នកធ្វើជាវេជ្ជបណ្ឌិតមានច្រើន ឬ ១,៩ ក្នុងចំណោមមនុស្ស ១០០០ នាក់។ អាចនិយាយបានថា វេជ្ជបណ្ឌិតចិន ច្រើនជាងប្រជាជនសរុបរបស់ប្រទេសកាតាទៅទៀត។

៣ សហរដ្ឋអាមេរិក

សហរដ្ឋអាមេរិក មានផ្ទៃដី ៩,៦៣លាន គីឡូម៉ែត្រការ៉េ។ លក្ខខ័ណ្ឌអាកាសធាតុបានចែករដ្ឋនៅអាមេរិកជា៣តំបន់អាកាសធាតុធំៗ។ ភាគខាងលិចជាតំបន់ភ្នំ។ ចន្លោះតំបន់ភ្នំនិងទន្លេ មីស៊ីស៊ីពីជាតំបន់ទំនាបលាតសន្ធឹងពីប្រទេសកាណាដាទៅម៉ិចស៊ិចកូដែលជាតំបន់មានជីជាតិបំផុតនៅលើពិភពលោក។ ចុងក្រោយគឺតំបន់ឆ្នេរ។

២ ប្រទេសកាណាដា

កាណាដា មានផ្ទៃដី ៩,៩៨៤លាន គីឡូម៉ែត្រការ៉េ មានព្រំប្រទល់ស្ថិតនៅចន្លោះមហាសមុទ្រអាកទិក និង សហរដ្ឋអាមេរិច។ ប្រទេសនេះមានឆ្នេរសមុទ្រប្រវែង ២០២ ០៨០ គីឡូម៉ែត្រ ដង់ស៊ីតេប្រជាជន ៤ នាក់ ក្នុង១គីឡូម៉ែត្រការ៉េ។ បានន័យថា ប្រទេសនេះសល់ដីធំទូលាយទៀតសម្រាប់ប្រជាជន ៣៥ លាននាក់របស់ខ្លួន។

១ ប្រទេសរុស្ស៊ី

ប្រទេសរុស្ស៊ីមានទំហំ ១៧,១ លាន គីឡូម៉ែត្រការ៉េ ជាប្រទេសធំជាងគេបំផុតនៅលើលោក។ ប្រទេសតូចៗជាច្រើនស្ថិតនៅក្រោមអតីតសហភាពសូវៀតបានប្រកាសឯករាជ្យរៀងខ្លួន និង យកដីទៅវិញបាន ៧លាន គីឡូម៉ែត្រការ៉េផង ប្រទេសនេះនៅតែធំល្វឹងល្វើយ៕

ប្រភព៖ Worldatlas ប្រែសម្រួល៖ សុខ លាងហ៊ត