ផ្គូផ្គងកីឡាករខ្មែរ និងថៃនៅ Thai Fight ២នាក់នេះអាក្រក់មើលបំផុត

2018-03-26 02:11:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹត្តិការណ៍ពិភពប្រដាល់សេរីថៃ Thai Fight បានក្លាយជាសង្វៀនដ៏ល្បីល្បាញបំផុតដែលជាកន្លែងកីឡាករល្បីៗចង់លេចមុខវ៉ៃនៅទីនោះដើម្បីឆាប់បានកេរ្តិ៍ឈ្មោះល្បីល្បាញ។ សង្វៀននេះតែងតែយកកីឡាករប្រដាល់កម្ពុជាទៅវ៉ៃ ប៉ុន្តែជារឿយៗត្រូវបានគេមើលឃើញថា ការផ្គូផ្គងហាក់មិនសូវមានតម្លាភាពឡើយពោលគឺថៃមានប្រៀបរហូត។

កីឡាករ ផាន់ គ្រាន់

អ្នកលេងគុនខ្មែរ ផាន់ គ្រាន់ និង ឡុង សុវណ្ណឌឿន ក្នុងចំណោមកីឡាករកម្ពុជាជាច្រើនដែលត្រូវបានផ្គូផ្គងឲ្យប៉ះជើងខ្លាំងថៃដែលមើលទៅមិនស័ក្តិសមគ្នាទាល់តែសោះ។ ការផ្គូផ្គងបែបនេះមិនមែនដើម្បីគុណភាព និងប្រជាប្រិយភាពសម្រាប់កម្មវិធីឡើយ ប៉ុន្តែដើម្បីតែឈ្នះម្យ៉ាងគត់។ កុំនិយាយឡើយដល់អ្នកជំនាញ ឬគ្រូបង្វឹកប្រដាល់ដែលអាចមើលឃើញពីកង្វះតម្លាភាពក្នុងការផ្គូផ្គង សូម្បីតែក្មេងក៏មើលឃើញថា មិនសមគ្នាដែរ។

ផាន់ គ្រាន់ Vs Saiyok Pumpanmuang

ផាន់ គ្រាន់ តាមពិតវ៉ៃក្នុងប្រភេទទម្ងន់៦០ទៅ៦៣គីឡូក្រាមប៉ុណ្ណោះពេលនោះ ប៉ុន្តែដោយសារគីឡូរបស់គេឡើងខ្លាំងក៏ឈានដល់វ៉ៃទម្ងន់៧០គីឡូក្រាម។ ពេលនោះកីឡាករកម្ពុជាហាក់ដូចធ្លាក់ចុះសមត្ថភាព និងទម្ងន់ឡើងខ្លាំង ខណៈការឡើងសង្វៀនក៏មិនសូវញឹកញាប់។ ស្ថិតិនៃការវ៉ៃក៏តិច និងអាវុធសម្លាប់ដៃគូក៏នៅស្ទើរ និងជាពិសេសវ៉ៃនៅទឹកដីរបស់គេដែលមិនពាក់ហ្កង់ថែមទៀត។

កីឡាករ Saiyok

ពេលនោះ លោក អេ ភូថងបាននិយាយក្រោយការប្រកួតថា ៖«វ៉ៃជាមួយនរណាមិនវ៉ៃ បែរជាទៅវ៉ៃជាមួយ Sai Yok។ ផាន់ គ្រាន់ ប៉ះ Sai Yok ប្រៀបដូចជាទៅឲ្យគេវ៉ៃអីចឹង ពីព្រោះនរណាក៏ដឹងដែរថា Sai Yok ជាកីឡាករប្រដាល់ថៃម្នាក់ដែលស្ថិតក្នុងចំណោមកំពូលកីឡាករប្រដាល់ប្រចាំប្រទេសថៃ»។

Saiyok ពេលនោះកំពុងឡើងជើងខ្លាំង។ គិតចាប់តាំងពីឆ្នាំ២០០៨ដល់ពេលវ៉ៃជាមួយ ផាន់ គ្រាន់ ថ្ងៃទី២៣ ខែកក្កដា ឆ្នាំ២០១៦រូបគេវ៉ៃជាមួយបរទេសរាប់ភ្លេច និងភាគច្រើនបំផុតទទួលបានជោគជ័យ។ កីឡាករវ៉ៃម្នាក់នេះមានប្រវត្តិប្រកួតរាប់រយដង និងឈ្នះខ្សែក្រវាត់ជាច្រើនទៀតផង។ រូបគេបានផ្តួល ផាន់ គ្រាន់ដោយផ្លែកែងក្នុងទឹកទី១។

ឡុង សុវណ្ណឌឿន vs Saensatharn P.K Saenchaimuaytha

ឡុង សុវណ្ណឌឿន និងកីឡាករថៃ Saensatharn មានប្រវត្តិប្រកួតមិនលើសខ្វះគ្នាប៉ុន្មានឡើយដោយសារមានបទពិសោធច្រើនឆ្នាំដូចគ្នា។ កីឡាករគុនខ្មែរធ្លាប់ឈ្នះ១១០ដង ចាញ់១៧ដង និងស្មើ៨ ខណៈអ្នកលេង Mauy Thai ធ្លាប់ឈ្នះ១២៨ដង ចាញ់២៩ និងស្មើ៥។

ឡុង សុវណ្ណឌឿន (រូបថត៖ សុវណ្ណឌឿន)

យ៉ាងណា បើនិយាយពីសមត្ថភាពវិញខុសគ្នាឆ្ងាយណាស់ដែលមិនសមជាគូវ៉ៃគ្នាឡើយ។ ឡុង សុវណ្ណឌឿន ជាកីឡាករម្នាក់ដែលមិនមានអាវុធសម្លាប់ច្បាស់លាស់ឡើយ។ ភាគច្រើនរូបគេប្រើអាវុធចម្រុះដោយកម្លាំងបាយ បច្ចេកទេសមិនសូវមាន និងមិនមានគោលជំហររឹងមាំឡើយ។

ផ្ទុយទៅវិញ Saensatharn មានប្រៀបទាំងស្រុងលើកីឡាករកម្ពុជារូបនេះ។ រូបគេមានកម្ពស់ខ្ពស់ជាង គោលជំហរវ៉ៃរឹងមាំល្អ ចេញក្បាច់សម្លាប់ដូចជាកណ្តាប់ដៃ កែង និងជង្គង់ល្អឥតខ្ចោះតែម្តងដែលធ្វើឲ្យរូបគេក្លាយជាកំពូលអ្នកប្រដាល់ជួរមុខម្នាក់នៅប្រទេសថៃ។ រូបគេបានផ្តួល ឡុង សុវណ្ណឌឿន ទឹកទី១ដោយកែង៕