៣ស្នៀត ប្រើខ្លាំងដៃរបស់អ្នកលក់ដី ផ្ទះ និងអ្នកគួកជេរឡាន ប្រយ័ត្នចាញ់បោក

2018-03-28 06:09:26
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅកម្ពុជាមានរបររកស៊ីជាច្រើនប្រភេទ ប៉ុន្តែរបរមួយចំនួន បានប្រើប្រាស់យុទ្ធសាស្ត្រប្លែកៗគ្នា ដើម្បីរកអតិថិជន។ ក្នុងនោះមានរបរធំៗបី កំពុងលេចធ្លោខ្លាំង និងបង្កហានិភ័យដល់ប្រជាពលរដ្ឋផងដែរ។ ចង់ដឹងច្បាស់ និងរកដំណោះស្រាយបែបណា សូមតាមដានដូចខាងក្រោម៖

១. យុទ្ធសាស្ត្រលក់ដីឡូតិ៍

នៅកម្ពុជាមានក្រុមហ៊ុនជាច្រើនប្រកាសលក់ដីឡូតិ៍ភ្លូកទឹកភ្លូកដីនៅតាមជាយក្រុង ជាមួយតម្លៃថោកៗ បង់រំលស់មិនចាំបាច់មានលុយកក់មុន គ្មានការប្រាក់ជាដើម។ នេះជាយុទ្ធសាស្ត្រដ៏ពេញនិយមបំផុតរបស់អ្នកលក់ដើម្បីអូសទាញអ្នកមានចំណូលល្មមៗឲ្យទិញ។

អ្នកជំនាញអចលនទ្រព្យ ឧកញ៉ា សៀ ឫទ្ធី បានប្រជាពលរដ្ឋគួរប្រុងប្រយ័ត្នរឿងដី ប្រកាសលក់ថោកៗពេញហ្វេសប៊ុក តម្លៃត្រឹម១ម៉ឺនដុល្លារ ២ម៉ឺនដុល្លារ គ្មានការប្រាក់ គ្មានលុយកក់ ប្រយ័ត្នយកលុយឱ្យគេទទេៗ។

ជាក់ស្ដែង លោកឧទាហរណ៍ថាអ្នកលក់មានដីមួយឡូត៍ពុះលក់នៅក្នុងប្លង់មេមិនបានដាក់ថា កន្លែងណាលូ? កន្លែងណាផ្លូវទេ? ហើយនៅពេលដែលរដ្ឋចេញច្បាប់មកត្រូវថយ ត្រូវកាត់ អ្នកដែលប៉ះពាល់គឺអ្នកទិញនោះហើយ។ ដូច្នេះនៅពេលមានបញ្ហាតើទៅសួរអ្នកណា? តើអ្នកណាជាអ្នកដោះស្រាយ?

២. យុទ្ធសាស្ត្រលក់ផ្ទះ

បច្ចុប្បន្ន ការដាក់លក់ផ្ទះឲ្យអតិថិជនដោយមិនបាច់កក់ប្រាក់ គ្រាន់តែបង់រំលស់ជាមួយអត្រាការប្រាក់ ០% (គ្មានការប្រាក់) បានក្លាយជាការយុទ្ធសាស្ត្រទីផ្សារដ៏ពេញនិយមបំផុតរបស់ក្រុមហ៊ុនអភិវឌ្ឍន៍លំនៅឋានមួយចំនួនធំ ។

ត្រង់ចំណុចនេះ លោក គីម ហ៊ាង ដែលជាអ្នកជំនាញអចលទ្រព្យ បានរៀបរាប់ថា បុរីដែលលក់ឲ្យអតិថិជន ដោយមិនបាច់កក់ប្រាក់ និងបង់រលស់ជាមួយអត្រាការប្រាក់ ០% គឺជាយុទ្ធសាស្ត្រទីផ្សាររបស់ក្រុមហ៊ុនដែលបានគិតគូរួចជាស្រេច។

លោកថា៖ « បុរីណាដែលឲ្យអតិថិជនចូលនៅ មិនបាច់កក់លុយ មិនមានការប្រាក់ ទាំងអស់នេះ សុទ្ធតែគេ (ក្រុមហ៊ុនសាងសង់) បូកហើយៗ។ ទោះអតិថិជនចូលនៅក៏ដោយ ក៏ផ្ទះនោះនៅតែជាផ្ទះរបស់អ្នកសាងសង់ដដែលហ្នឹង ហើយអតិថិជនមិនមានអីជាកម្មសិទ្ធិនោះទេ មានតែខោអាវមួយវ៉ាលីហ្នឹង បើអត់លុយបង់ឲ្យគេថ្ងៃណា នោះគេនឹងដេញចេញពីផ្ទះថ្ងៃហ្នឹង»។

ដើម្បីជៀសវាងករណីទិញដី ឬផ្ទះ កុំឲ្យចាញ់បោកគេ អ្នកជំនាញឲ្យគន្លឹះស្វែងយល់ដូចខាងក្រោម៖

ត្រូវសិក្សាផ្លូវច្បាប់ឱ្យបានច្បាស់លាស់ ថាតើដី ឬផ្ទះនៅតំបន់នោះ ស្ថិតនៅក្នុងដីប្រភេទណា? ជាគម្រោងអភិវឌ្ឍរបស់រដ្ឋាភិបាលឬទេ? តើមានច្បាប់អនុញ្ញាតឱ្យពុះលក់ឬក៏អត់? តាមរយៈការស៊ើបសួរពីអាជ្ញាធរ និងមេភូមិ មេឃុំជាដើម។
ប្រជាពលរដ្ឋត្រូវសិក្សាមើលថា ជាក្រុមហ៊ុនអ្វី? មានចុះបញ្ជីច្បាស់លាស់ឬក៏អត់?
ត្រូវពិចារណាថា ដី ឫផ្ទះលក់ថោកៗគ្មានការប្រាក់ គ្មានប្រាក់កក់នោះ ឲ្យប្រាកដប្រជា បើទោះវាតម្លៃថោកក៏ដោយ។

៣. យុទ្ធសាស្ត្ររបស់អ្នកគួកជេរឡាន

ទាក់ទងរបរគួកជេរឡានវិញ អ្នកជំនាញម្នាក់បានបង្ហើបជាល្បិចទិញឡានបានថោក ហើយអាចទុកលក់បានចំណេញខ្ពស់។

លោក រិទ្ធី ជាអ្នកគួកជេរឡាន ឲ្យដឹងថា អ្នកគួកជេរមានល្បិចមួយគឺការមកទិញបណ្តាក់គ្នា ម្នាក់តថ្លៃ ម្នាក់ឲ្យតម្លៃថោក រួច ៤-៥ នាក់ទៀត មកចរចាឲ្យតម្លៃដូចៗគ្នា។ ពេលនោះបើម្ចាស់ឡានលង់ទន់ចិត្ត ប្រាកដជាព្រមលក់ចេញ បើទោះបីដឹងថាខាតច្រើនក៏ដោយ។ នេះជាល្បិចមួយ ព្រោះមុនពេលមកទិញ អ្នកទាំងនោះបានប្រាប់គ្នារួចជាស្រេចទៅហើយ។

លោកថា ស្នៀតនេះ ទោះបីអ្នកខ្លះដឹងតែនៅតែមានអ្នកចាញ់កលជាហូរហែ។ បើយល់ល្អ ម្ចាស់ឡានគួរលក់ឲ្យអ្នកប្រើប្រាស់ដូចគ្នាបើមិនចង់ខាតច្រើន ឬរកអ្នកគួកជេរដោយឲ្យលុយទឹកតែបន្តិចបន្តួច។

ចំណែកលោក ហេងថាត់ ជាអ្នកគួកជេរឡានមួយរូបដែរក៏ប្រាប់ដូចគ្នានេះដែរថា ជាទូទៅអ្នកគួកជេរឡានមួយគ្រឿង ចំណេញបានពី ២០០ ដុល្លារ ទៅ ៥០០ ដុល្លារ ឬច្រើនជាងនេះ ទៅតាមគុណភាពនិងស៊េរីឡានពេញនិយម។

"អ្នកគួកជេរតែងមានល្បិចអីចឹងហើយ។ នាំគ្នាទៅសួរទិញហើយឲ្យតម្លៃទាប ដើម្បីទុកលក់ចេញបានចំណេញច្រើន"។ លោក ហេងថាត់ បន្ថែម។

លោកថា មុនពេលលក់ចេញម្ចាស់ឡានគួរដើរជ្រែទីផ្សារឲ្យបានច្បាស់សិន ជៀសវាងគេធ្វើស៊ីបាន៕