ស្លុតចិត្ត បើដឹងចំនួនលុយ Mariah Carey សប្បាយចាយលើរបស់ទាំងនេះ

2018-08-30 03:33:36
ចំនួនមតិ 0 | ចំនួនចែករំលែក 0

ចន្លោះមិនឃើញ

តាំងពីដើមមក តារាចម្រៀង Mariah Carey ទទួលបានភាពល្បីល្បាញខ្លាំង ដោយសារតែទេពកោសល្យនៃការច្រៀងរបស់នាង។ បច្ចុប្បន្ននេះដែរ ជាមួយនឹងភាពជោគជ័យលើវិស័យចម្រៀងរបស់នាងនេះ បានធ្វើឲ្យនាងទទួលចំណូលបានពីវិស័យមួយនេះ ហូរហៀររាប់មិនអស់។

ជាតារាដែលទទួលបានភាពជោគជ័យខ្លាំងបែបនេះហើយ ប្រាកដណាស់ថា Mariah Carey មិនខ្លាចនឹងចំណាយប្រាក់សន្ធឹកសន្ធាប់ដើម្បីបំពេញចិត្តរបស់នាងនោះ។

១. ចំណាយ ៧០ លានដុល្លារ សម្រាប់ទិញធានារ៉ាប់រងសំឡេង និងជើងរបស់នាង

ក្នុងការឡើងទៅសម្ដែងនៅតន្ត្រីទេសចរណ៍ឲ្យមានភាពរលូន តារាចម្រៀងរូបនេះ បានទិញកញ្ចប់ធានារ៉ាប់រងសំឡេងដ៏ក្រអួនក្រអៅរបស់នាងចំនួន ៣៥ លានដុល្លារ និង ៣៥ លានដុល្លារផ្សេងទៀត ជាកញ្ចប់រ៉ាប់រងជើងរបស់នាងឲ្យមានភាពសិចស៊ីទាក់ទាញ។

២. ទិញភូមិគ្រឹះមួយកន្លែងនៅតំបន់ Beverly Hills (១២,៩៩៥ លានដុល្លារ)

តារាចម្រៀង Mariah Carey បានចំណាយលុយទិញភូមិគ្រឹះមួយកន្លែងអស់ ១២,៩៩៥ លានដុល្លារ។ ភូមិគ្រឹះនេះដែរ សាងសង់ឡើងលើផ្ទៃដីទំហំ ៩៦០ ម៉ែត្រការ៉េ ដោយក្នុងនោះមានបន្ទប់គេងចំនួន ៨ បន្ទប់ទឹក ៤។ នៅខាងក្រៅ មានទីលានលេងបាល់បោះមួយ និងកន្លែងដាក់ឡាន ដែលអាចផ្ទុកឡានបានដល់ទៅ ២០ ឯណោះ។

៣. ទិញកន្លែងស្នាក់នៅមួយកន្លែង (៩ លានដុល្លារ)

កាលពីឆ្នាំ ១៩៩៩ តារាចម្រៀងរូបនេះ បានទិញកន្លែងស្នាក់នៅមួយកន្លែងនៅ Franklin Tower ក្នុងតំបន់ Manhattan។ នាងបានទិញកន្លែងស្នាក់នៅមួយនេះ ខណៈវាស្ថិតក្នុងការជួសជុលនៅឡើយ។ កន្លែងស្នាក់នៅនេះដែរ មានបន្ទប់គេង ៤ បន្ទប់ទឹក ៤ និងផ្ទះបាយដែលមានផាសុកភាពមួយ។

៤. ជួលយន្តហោះឯកជនក្នុងមួយសប្ដាហ៍ (៩០ ម៉ឺនដុល្លារ)

តារាចម្រៀងរូបនេះ មិនចំណាយប្រាក់ទិញយន្តហោះសម្រាប់ខ្លួននាងនោះទេ ផ្ទុយទៅវិញ នាងសុខចិត្តចំណាយប្រាក់ ៩០ ម៉ឺនដុល្លារសម្រាប់មួយសប្ដាហ៍ក្នុងការជួលយន្តហោះជាលក្ខណៈឯកជនរបស់នាង។

៥. នាំឆ្កែសំណព្វរបស់នាងទៅស្ប៉ាខ្លួន (៤៥ ០០០ដុល្លារ ក្នុង ១ ឆ្នាំ)

សម្រាប់តារាចម្រៀង Britney Spears ចំណាយជាង ២៩ ០០០ដុល្លារលើសត្វចិញ្ចឹមរបស់នាងរៀងរាល់ឆ្នាំ ប៉ុន្តែចំពោះតារាចម្រៀង Mariah Carey វិញ ការចំណាយលើសត្វចិញ្ចឹមរបស់នាងគឺលើស Britney Spears ទៅទៀត។

៦. ចំណាយលើការធ្វើសក់ ធ្វើក្រចក ផាត់មុខ និងជួលអ្នករៀបចំសម្លៀកបំពាក់ (៨៥ ០០០ដុល្លារ)

ចំនួនទឹកប្រាក់ដែលតារាស្រីរូបនេះចំណាយលើការថែរក្សាសម្រស់របស់នាងត្រូវបានបែកធ្លាយ។ ក្នុងការជួលអ្នករៀបចំសម្លៀកបំពាក់របស់នាង ត្រូវចំណាយ ៦៥ ៣៩១ ដុល្លារ អ្នកធ្វើសក់ចំនួន ៩ ៦០០ ដុល្លារ អ្នកជំនាញផាត់មុខ ៧ ២០០ដុល្លារ និងអ្នកធ្វើក្រចក ចំនួន ២ ៤០០ដុល្លារ។

៧. ទិញរថយន្តម៉ាក Rolls Royce Phantom Drophead Coupe (៤៩២ ០០០ ដុល្លារ)

រថយន្តម៉ាក Rolls Royce Phantom Drophead Coupe នេះជាប្រភេទរថយន្តមួយដែលចាត់ទុកជារថយន្តលឿនជាងគេក្នុងពិភពលោក។ តារាចម្រៀងស្រីរូបនេះ ទិញក្នុងតម្លៃ ៤៩២ ០០០ដុល្លារ ជាមួយស៊េរីឆ្នាំ ២០១៧។ ក្រៅពីរថយន្តទំនើបមួយនេះ នាងក៏ជាម្ចាស់រថយន្តម៉ាកផ្សេងទៀតដែរ ដូចជា ម៉ាក Maybach 62, Porsche Cayenne និង Mercedes។

៨. ជួលបន្ទប់សណ្ឋាគារសម្រាប់ដាក់វ៉ាលីរបស់នាង (១០ ០០០ ទៅ ១៥ ០០០ដុល្លារ)

ជាតារាល្បីមួយរូប Mariah តែងតែយកវ៉ាលីមកជាច្រើនសម្រាប់ដាក់អីវ៉ាន់របស់នាង នៅពេលធ្វើការប្រគំតន្ត្រីទេសចរណ៍ ចូលរួមកម្មវិធី ឬក៏ធ្វើដំណើរកម្សាន្តម្ដងៗ។ ខុសពីមនុស្សទូទៅដែលដាក់វ៉ាលីក្នុងបន្ទប់គេងជាមួយគ្នា តារាចម្រៀងស្រីរូបនេះ បានជួលបន្ទប់ដាច់ដោយឡែកសម្រាប់តែដាក់វ៉ាលីរបស់នាងតែប៉ុណ្ណោះ។

៩. ទិញកាបូបម៉ាកដែលនាងចូលចិត្ត

ខណៈអ្នកគាំទ្រព្យាយាមមើលបន្ទប់សម្លៀកបំពាក់របស់នាង គ្រប់គ្នាកោតសរសើរចំពោះកាបូបម៉ាកល្បីៗដែលនាងបានទិញ រាប់ចាប់ពីម៉ាក Chanel រហូតដល់ Louis Vuitton ប៉ុន្តែសម្រាប់តារាចម្រៀងរូបនេះផ្ទាល់ កាបូបដែលនាងចូលចិត្តប្រើជាងគេគឺម៉ាក Hermes Birkin ដែលអាចមានតម្លៃចាប់ពី ១២ ០០០ រហូតដល់ ២០០ ០០០ដុល្លារឯណោះ៕

ប្រភព៖ Kenh14 ប្រែសម្រួល៖ អន សុភក្ត្រា