កម្ចីឥណទានមានមុខពីរ បើប្រើត្រូវធ្វើឲ្យជីវភាពល្អប្រសើរ

2018-09-10 04:10:53
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រឹះស្ថានមីក្រូហិរញ្ញវត្ថុត្រូវបានគេមើលឃើញថាកំពុងរីកដុះដាលច្រើននាពេលបច្ចុប្បន្ននេះ ហើយត្រូវបានអ្នកជំនាញធ្វើការលើវិស័យហិរញ្ញវត្ថុ និងស្ថានប័នអន្តរជាតិខ្លះចាត់ទុកថាគ្រឹះស្ថានទាំងនេះ បានរួមចំណែកក្នុងការកាត់បន្ថយភាពក្រីក្រតាមរយៈការផ្តល់នូវសេវាឥណទានខ្នាតតូចចាំបាច់ដល់ប្រជាពលរដ្ឋក្រីក្រ។

ឯកសារអាជីវកម្មរបស់ធនាគារពិភពលោកកាលពីឆ្នាំ២០០៥ បានលើកឡើងដែរថាការទទួលបានសេវាហិរញ្ញវត្ថុ ធ្វើឲ្យប្រជាកសិករ ឬអ្នកធ្វើអាជីវកម្មខ្នាតតូចមានឱកាសរកចំណូលបានច្រើនជាងការខ្ចីប្រាក់ក្រៅប្រព័ន្ធ។

បើនិយាយដល់ឆ្នាំ២០០៥ វិញធនគារពិភពលោកលើកឡើងថាកម្ចីបានពីបុគ្គលឯកជនមានការប្រាក់មិនទាបជាង១០ភាគរយនោះទេក្នុងមួយខែ ខណៈកម្ចីពីមីក្រូហិរញ្ញវត្ថុនាពេលនោះមានត្រឹម៣,៥ភាគរយក្នុងមួយខែ។

អត្រាការប្រាក់កាន់តែ ធ្លាក់ទាបទៀតនៅពេលដែលរដ្ឋាភិបាលតាមរយៈធនាគារជាតិបានដាក់របារការប្រាក់។ កាលពីខែមិនា ឆ្នាំ២០១៧ រដ្ឋាភិបាលបានកំណត់អត្រាការប្រាក់មិនឲ្យលើសពី១៨ភាគរយក្នុងមួយឆ្នាំសម្រាប់កម្ចីនៅតាមគ្រឹះស្ថានផ្តល់ប្រាក់កម្ចីស្របច្បាប់។

(អ្នកស្រី ឆៃ គឿន កំពុងរៀបចំកន្លែងលក់គុយទាវរបស់ខ្លួន)

ងាកមកពិនិត្យលើបទពិសោធន៍របស់អតិថិជនវិញ អ្នកស្រី ឆៃ គឿន និងស្វាមី នៅឆ្នាំ២០១២ សម្រេចចិត្តខ្ចីប្រាក់ពីធនាគារមួយចំនួន២០០០ដុល្លារ សម្រាប់បើករបរលក់គុយទាវ និងបាយ។ ការសម្រេចចិត្តបែបនេះ ក្រោយពីអ្នកទាំងពីរមើលឃើញថាការធ្វើស្រែតែមួយមុខមិនអាចធ្វើឲ្យជីវភាពល្អប្រសើរនោះទេ។

តាមរយៈការប្រើប្រាស់កម្ចីចំគោលដៅ អ្នកស្រុកទ្រាំង ខេត្តតាកែវ ពីរនាក់ស្វាមី ភរិយា ខាងលើ បានយកប្រាក់២០០០ដុល្លារនេះដំណើរការអាជីវកម្មរបស់ខ្លួន និងបានរីកចម្រើនជាបន្តបន្ទាប់រហូតដល់អាចមានលទ្ធភាពទិញភេសជ្ជៈផ្សេងៗដាក់បន្ថែមក្នុងហាងបាយ គុយទាវរបស់ខ្លួន និងមានលទ្ធភាពទិញម៉ូតូប្រើប្រាស់ផ្ទាល់ខ្លួន ហើយថែមទាំងមានលទ្ធភាពឲ្យកូនបានរៀនសូត្រផងដែរ។

ក្នុងព្រឹត្តិបត្ររបស់ខ្លួនចុះឆ្នាំ២០០៥ ដដែលធនគារពិភពលោកអះអាងថាប្រជាពលរដ្ឋក្រីក្រត្រូវបានមើលរំលងដោយគ្រឹះស្ថានហិរញ្ញវត្ថុធំៗ ហើយថាជាការពិតពលរដ្ឋក្រីក្រក៏ត្រូវការសេវាឥណទានខ្នាតតូច ការធានារ៉ាប់រង ប្រាក់សន្សំ និងការផ្ទេរប្រាក់ជាដើម។

ធនាគារពិភពលោកបន្តថាវិស័យមីក្រូហិរញ្ញវត្ថុបានរួមចំណែកជួយពលរដ្ឋក្រីក្របង្កើតប្រភពចំណូល និងបានជួយឲ្យអ្នកទាំងនោះអាចចាកចេញពីការរករស់តែមួយថ្ងៃៗ ទៅជាការបង្កើតផែនការសម្រាប់អនាគតបាន។

ភស្តុតាងជាច្រើនបង្ហាញថាការទទួលបានសេវាមីក្រូហិរញ្ញវត្ថុបានជួយឲ្យពលរដ្ឋក្រីក្រអាចទទួលបានសេវាសុខភាពល្អប្រសើរជាងមុន អាចឲ្យកូនៗបានចូលរៀន និងអាចពង្រីកអាជីវកម្មគ្រួសារជាដើម។ នេះបើតាមធនគារពិភពលោកដដែល។

(លោក គឹម លីនដូ ប្រធានផ្នែកហានិភ័យ និងប្រតិបត្តិនៃគ្រឹះស្ថានមីក្រូហិរញ្ញវត្ថុរ៉ូយ៉ាល់ ម៉ាយក្រូហ្វាញនែន)

សម្រាប់លោក គឹម លីនដូ ប្រធានផ្នែកហានិភ័យ និងប្រតិបត្តិនៃគ្រឹះស្ថានមីក្រូហិរញ្ញវត្ថុរ៉ូយ៉ាល់ ម៉ាយក្រូហ្វាញនែន លើកឡើងប្រហាក់ប្រហែលនឹងទឡ្ហីករណ៍ខាងលើដែរថាការប្រើប្រាស់កម្ចីចំគោលដៅដើម្បីបង្កើតប្រាក់ចំណូលគឺជួយឲ្យអ្នកធ្វើអាជីវកម្មខ្នាតតូចមានលទ្ធភាពពង្រីករបរខ្លួនបន្ថែម និងបង្កើនប្រាក់ចំណូល។

លោកបន្តថាស្ថាប័នអាចវាយតម្លៃបានថាអតិថិជនប្រើប្រាស់កម្ចីបានចំគោលដៅឬអត់ដោយផ្អែកតាមរយៈការសងត្រឡប់វិញទៀងទាត់ និងការណ៍ដែលអតិថិជនបានពង្រីកអាជីវកម្មរបស់ខ្លួនបន្ថែមក្រោយបានទទួលកម្ចីឬយ៉ាងណា។

លោកបប្ថែមថា៖ «មីក្រូហិរញ្ញវត្ថុជាកាតាលីករមួយសំខាន់ក្នុងសង្គមជាតិរបស់យើង តាមរយៈការផ្តល់នូវប្រាក់កម្ចីដែលស្របទៅតាមលទ្ធភាពនិងតម្រូវការជាក់ស្តែងទាំងក្នុងគ្រួសារ និងពង្រីកមុខរបរ...ការផ្តល់ឥណទានពីគ្រឹះស្ថានមីក្រូហិរញ្ញវត្ថុទាំងមូលហ្នឹងយើងឃើញថាបានរួមចំណែកយ៉ាងខ្លាំងក្លាក្នុងវិស័យសេដ្ឋកិច្ចទាំងមូល...អតិថិជនគួរប្រើប្រាក់កម្ចីឲ្យចំគោលដៅ ចាំបាច់ជាក់ស្តែង ដូចជាការពង្រីកមុខរបរ បង្កើនប្រាក់ចំណូល នោះគេហៅថាកម្ចីមួយដែលមានគុណភាព»។

(លោក ង៉ែត ជូ ទីប្រឹក្សាជាន់ខ្ពស់ក្រុមហ៊ុនអ៊ីមើជីងម៉ាឃីតខលសាល់ធីង ពេលផ្តល់បទសម្ភាសន៍ជាមួយSabay)

សម្រាប់លោក ង៉ែត ជូ ទីប្រឹក្សាជាន់ខ្ពស់ក្រុមហ៊ុនអ៊ីមើជីងម៉ាឃីតខលសាល់ធីង ថាជាការពិតការទទួលបានសេវាហិរញ្ញវត្ថុគឺជាចំណែកមួយជួយឲ្យពលរដ្ឋក្រីក្រអាចបង្កើតចំណូលតាមរយៈការបង្កើតអាជីវកម្មណាមួយសម្រាប់គ្រួសារ។ ត្រង់ចំណុចនេះលោកថា ការទទួលបានកម្ចីគឺជាយន្តការមួយក្នុងចំណោមយន្តការផ្សេងទៀតក្នុងការរួមចំណែកកាត់បន្ថយភាពក្រី។

ទោះយ៉ាងណាលោកថាបើតាមរបាយការណ៍កាលពីឆ្នាំ២០១៣ អ្នកខ្ចីប្រាក់សម្រាប់ប្រើប្រាស់ផ្ទាល់ខ្លួន ឬសម្រាប់សេវាខុសភាព និងសេវាអប់រំរបស់កូនចៅមានជាង៥០ភាគរយខណៈអ្នកខ្ចីសម្រាប់អាជីវកម្មមានតែជាង៤០ភាគរយ។

លោកបញ្ជាក់ថាអ្នកជាង៥០ភាគរយបានប្រើប្រាស់កម្ចីសម្រាប់តម្រូវការផ្ទាល់ខ្លួន ដោយសម្អាងលើប្រភពចំណូលដែលខ្លួនមានស្រាប់។

យ៉ាងណាមិញលោកថាថ្វីត្បិតអ្នកខ្លះខ្ចីប្រាក់ពីគ្រឹះស្ថានមីក្រូហិរញ្ញវត្ថុដើម្បីការសិក្សារបស់កូន ឬថែទាំសុខភាពក៏ជារឿងល្អប្រសើរមួយដែរ ជាជាងអ្នកទាំងនោះទៅចងការពីបុគ្គលឯកជនដែលមានអត្រាការប្រាក់ខ្ពស់ ហើយនេះ ក៏ជាការវិនិយោគមួយដែរ តែជាការវិនិយោគរយៈពេលវែង។

លោកបន្ថែមថា៖ «មានន័យថាជាង៥០ភាគរយហ្នឹងមិនបានយកទៅរកចំណូលទេ អ៊ីចឹងមានតិចជាង៥០ភាគរយយកទៅរកចំណូល អ៊ីចឹងសួរថាគ្រឹះស្ថានមីក្រូហិរញ្ញវត្ថុបានជួយរួមចំណែកកាត់បន្ថយភាគក្រីក្រទេគឺថាបាន តែមិនទូលំទូលាយណាស់ណាដែរ»។

លោកបន្តថា៖ «ដើម្បីចូលរួមកាត់បន្ថយភាពក្រីក្របានតោងយល់ថាទាល់តែប្រជាពលរដ្ឋយកប្រាក់ហ្នឹងទៅវិនិយោគទៅបង្កើតមុខរបរ បង្កើនចំណូលដើម្បីបង្កើតផលចំណេញច្រើនជាងអ្វីដែលគាត់ត្រូវចំណាយលើការប្រាក់...អាហ្នឹងដែលអាចជួយជីវភាពគាត់»។ ទាក់ទឹងនឹងចំណុចខ្លះរបស់លោក ង៉ែត ជូ បានលើកឡើងហាក់មានចំណុចស៊ីសង្វាក់គ្នាជាមួយ នាយកប្រតិបត្តិសមាគមគ្រឹះស្ថានមីក្រូហិរញ្ញវត្ថុកម្ពុជា លោក យុន សុវណ្ណា ដែលបានលើកឡើងថាក៏មានករណីអ្នកខ្ចីប្រាក់ដើម្បីដោះស្រាយបញ្ហាចាំបាច់ក្នុងគ្រួសារ ដូចជាការវិនិយោគលើកាអប់រំរបស់កូនចៅ ដែលលោកហៅថានេះជាការវិនិយោគរយៈពេលវែង។ ការខ្ចីបែបនេះ លោកថាអ្នកខ្ចីមានប្រភពចំណូលផ្សេងដែលអាចមានលទ្ធភាពសងមកគ្រឹះស្ថានផ្តល់ប្រាក់កម្ចីវិញ គ្រាន់តែថាមិនមានលទ្ធភាពភ្លាមៗក្នុងចំណាយក្នុងរង្វ់សាច់ប្រាក់ដុំប៉ុណ្ណោះ។

លោក យុន សុវណ្ណា នៅតែអះអាងថាគ្រឹះស្ថានស្ថានមីក្រូហិរញ្ញវត្ថុបានរួមចំណែកជាមួយរដ្ឋាភិបាលក្នុងការកាត់បន្ថយភាពក្រីក្រតាមយៈការផ្តល់កម្ចីសម្រាប់លើកកម្ពស់សុខុមាលភាព និងជំរុញសកម្មភាពអាជីវកម្មរបស់ពលរដ្ឋជាដើម។

( លោក យុន សុវណ្ណា នាយកប្រតិបត្តិសមាគមគ្រឹះស្ថានមីក្រូហិរញ្ញវត្ថុកម្ពុជាពេលសម្ភាសន៍ជាមួយ Sabay)

លោកបន្ថែមថា៖ «ត្រូវចងចាំថាបំណុលគឺ ជាកាតព្វកិច្ចត្រូវសងត្រឡប់ទៅវិញ ត្រូវចងចាំថាត្រូវមានប្រភពចំណូលច្បាស់លាស់ មានការរំពឹងទុកថារកចំណូលសងត្រឡប់ទៅវិញ ជៀសវាងការប្រើបំណុលដែលមិនបង្កើតផលិតភាព»។

លោកបន្តថាដើម្បីឲ្យការប្រើប្រាស់កម្ចីមានប្រេសិទ្ធិភាព អ្នកខ្ចីត្រូវប្រើកម្ចីក្នុងគោលដៅច្បាស់លាស់ដូចជា ប្រើប្រាស់កម្ចីសម្រាប់បង្កើតចំណូល ឬបន្ថែមចំណូលជាដើម។ លោកឲ្យដឹងថាបើប្រជាពលរដ្ឋដែលមានគំនិតធ្វើអាជីវកម្ម តែនៅមានមន្ទិលលើគំនិតរបស់ខ្លួនគួររកគ្រឹះស្ថានមីក្រូហិរញ្ញវត្ថុណាដែលមានផ្តល់សេវាប្រឹក្សាយោបល់ មុននឹងខ្ចីសម្រាប់បង្កើតអាជីវកម្ម។

ប្រហាក់ប្រហែលនឹងការលើកឡើងរបស់នាយកប្រតិបត្តិសមាគមគ្រឹះស្ថានមីក្រូហិរញ្ញវត្ថុខាងលើដែរ អ្នកស្រី ឆៃ គឿន បញ្ជាក់ថាការប្រើប្រាស់កម្ចីចំគោលដៅគឺជារឿងសំខាន់ ដើម្បីជៀសវាងវ័ណ្ឌកនឹងបំណុល។ ការខ្ចីបុលពីធនគារ ឬមីក្រូហិរញ្ញវត្ថុដើម្បីដោះបំណុលឯកជន អ្នកស្រីថានឹងធ្វើឲ្យអ្នកខ្ចីលង់ខ្លួនកាន់តែជ្រៅក្នុងរឿងបំណុល។

គួរបញ្ជាក់ថាមីក្រូហិរញ្ញវត្ថុបានផ្តល់កម្ជីទៅប្រជាពលរដ្ឋជាង១,៨លាននាក់គិតត្រឹមឆ្នាំ២០១៦ និងមានដាក់ប្រាក់សន្សំចំនួនជាង១,៥លាននាក់ក្នុងរយៈពេលដូចគ្នា។ កម្ចីដែលមីក្រូហិរញ្ញវត្ថុផ្តល់ឲ្យមានលើវិស័យកសិកម្ម៣៣,៣ភាគរយ កម្ចីគ្រួសារចំនួន២៨,៤ភាគរយ អាជីវកម្ម ជួយដូរ ១៨,៥ភាគរយ និងវិស័យមួយចំនួនផ្សេងទៀតដែលមានតិចជាង១០ភាគរយ។ នេះបើតាមរបាយការណ៍របស់ធនាគារជាតិឆ្នាំ២០១៦។

សម្រាប់ឆ្នាំ២០១៧វិញ របាយការណ៍ធនាគារជាតិថាចំនួនអ្នកដាក់ប្រាក់សន្សំនៅគ្រឹះស្ថានមីក្រូហិរញ្ញវត្ថុទាំង៧មានដល់១,៨លាននាក់ ខណៈអ្នកខ្ចីពីគ្រឹះស្ថានមីក្រូហិរញ្ញវត្ថុមានចំនួនប្រហាក់ប្រហែលនឹងឆ្នាំ២០១៦ដដែល។ ដោយឡែកអ្វីដែលប្រែប្រួលគឺ កម្ចីគ្រួសារឡើងមក៣៣,៨ភាគរយ ហើយកម្ចីវិស័យកសិកម្មធ្លាក់មក២៥,៥ភាគរយវិញ៕

អត្ថបទ៖ ទូច សុខា