Van der Sar មិនចាប់អារម្មណ៍នឹងតំណែងធំនៅអតីតក្លឹប

2018-09-10 11:10:49
ចំនួនមតិ 0 | ចំនួនចែករំលែក 0

ចន្លោះមិនឃើញ

វីរបុរសក្លឹប Manchester United អតីតអ្នកចាំទី Edwin Van der Sar ក្នុងថ្ងៃនេះ បានទាត់ចោលពាក្យចចាមអារ៉ាមដែលថា ខ្លួនចង់ទៅកាន់តួនាទីជានាយកផ្នែកបាល់ទាត់នៅក្លឹបបិសាចក្រហម។

Van der Sar ដែលសព្វថ្ងៃគឺជានាយកប្រតិបត្តិនៃក្លឹប Ajax បាននិយាយថា៖ "ខ្ញុំបានឮព័ត៌មានមួយចំនួនមួយរយៈចុងក្រោយនេះ។ ពាក្យចចាមអារ៉ាមដែលថាខ្ញុំនឹងទៅចូលរួម Manchester United គឺមិនពិតទាល់តែសោះ។ ខ្ញុំមានកុងត្រារយៈពេល ២ ឆ្នាំទៀតនៅ Ajax។ ក្លឹបមួយនេះ គឺជាក្លឹបរបស់ខ្ញុំ។ ខ្ញុំចង់បន្តរួមរស់នៅទីនេះ យូរឆ្នាំទៅមុខទៀត។ ខ្ញុំចង់ឲ្យក្លឹបមួយនេះបន្តលូតលាស់ និងជោគជ័យ"។

សូមបញ្ជាក់ផងដែរថា Van der Sar បានលេងឲ្យក្លឹបបិសាចក្រហមពីឆ្នាំ ២០០៥ ដល់ ២០១១។ អតីតកីឡាករត្រូវបានមជ្ឈដ្ឋានជាច្រើននៅក្នុងក្លឹបមួយនេះ ចាត់ទុកថាជាវីរបុរស ដោយសារទម្រង់លេងយ៉ាងល្អរបស់អតីតអ្នកចាំទី ក្នុងអំឡុងពេលលេងឲ្យក្លឹប។ ក្នុងរយៈពេល ៦ ឆ្នាំ លេងឲ្យក្លឹប Van der Sar លេងបានសរុប ២៦៦ ប្រកួត ឈ្នះពាន Premier League ៤ លើក និង Champions League ១ លើក។

ទោះជាយ៉ាងណា អតីតអ្នកចាំទីក៏មានប្រវត្តិយូរលង់ជាមួយក្លឹបហុល្លង់ Ajax ផងដែរ។ កីឡាករបានចាប់អាជីពលេងក្នុងឈុតធំដំបូងឲ្យក្លឹបមួយនេះ ពីឆ្នាំ ១៩៩០ ដល់ ១៩៩៩ (លេងសរុបបាន ៣១២ ប្រកួត)។ នៅឆ្នាំ ២០១២ ពោលគឺមួយឆ្នាំក្រោយអតីតកីឡាករចូលនិវត្តន៍ ក្លឹប Ajax បានផ្ដល់តួនាទីនាយកផ្នែកទីផ្សារឲ្យ Van der Sar។ ៤ ឆ្នាំក្រោយមក អតីតកីឡាករត្រូវបានដំឡើងជានាយកប្រតិបត្តិរបស់ក្លឹប៕

ប្រភព៖ Goal អត្ថបទ៖ សេរី មង្គល