អាណិត លាង ឧត្តម ទៅច្រៀងការគេត្រូវចោរធ្វើស៊ីអស់ទ្រព្យជាប់ខ្លួនយ៉ាងច្រើន!

2018-11-06 03:32:39
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក លាង ឧត្តម បានពោលពាក្យសោកស្ដាយខ្លាំង ក្រោយពីទ្រព្យជាប់ខ្លួនមួយចំនួនធំ ត្រូវបានចោរ ធ្វើស៊ីលោកយកអស់ ក្នុងពេលលោកទៅបំពេញការងារ ច្រៀងការគេនៅទីក្រុងកោះពេជ្រ។

សាមីខ្លួន បានបញ្ជាក់ថា ហេតុការណ៍បានកើតឡើងកាលពីថ្ងៃទី ២ ខែវិច្ឆិកា ពេលដែលលោកបានទៅច្រៀងការគេនៅទីក្រុងកោះពេជ្រ និងបានចតរថយន្តនៅខាងក្រៅ។ ស្រាប់តែពេលចេញមកវិញ រថយន្តរបស់លោកត្រូវបានចោរគាស់ យកឥវ៉ាន់នៅក្នុងឡាន។ "ខ្ញុំមកទាន់ដែរ តែខ្ញុំអត់ហ៊ានសុំឆែកបេ(ការុង)វាមើល ព្រោះវាមានគ្នាច្រើនពេក!"។

របស់ទ្រព្យដែលបាត់មានដូចជា សំលៀកបំពាក់មួយចំនួនធំ ចិញ្ជៀន កាបូបល្អៗ វ៉ែនតា ទឹកអប់ និងទូរសព្ទដៃជាដើម។ “ហ៊ឺ...សោកស្ដាយណាស់បង...និយាយទៅ គឺអស់ច្រើនតែម្ដង បាត់អស់ច្រើនជាងគេ គឺខោអាវ ដែលទុកសម្រាប់ស្លៀកចេញធ្វើការ គឺអស់ច្រើន...និយាយទៅស៊យណាស់បងអើយ ស៊យណាស់ខែហ្នឹង!”។ លាង ឧត្តម ថ្លែង។

លាង ឧត្តម បានជួបរឿងមិនសមប្រកបជាច្រើន ក្នុង១ខែចុងក្រោយនេះ ក្នុងនោះ មុនមកជួបករណីចោរកម្មរបស់ទ្រព្យយ៉ាងច្រើនខាងលើ លោកក៏ទើបបានជួបគ្រោះថ្នាក់ចរាចរណ៍ដែរ ដោយមានម៉ូតូអ្នកដំណើរបើកបរដោយស្ត្រីមានគភ៌មកបុកជាមួយរថយន្តរបស់លោក បណ្ដាលឲ្យបែកអស់ស្ដុបមុខមួយ។ "គាត់ជិះម៉ូតូ ហើយព្យាយាមគេចពីប៉ូលិសហៅគាត់ គាត់ក៏បត់ម៉ូតូមកបុកជាមួយយើងតែម្ដង...ដល់ចុះទៅឃើញគាត់ពោះធំអីចឹង ខ្ញុំក៏ខ្ជិលវែងឆ្ងាយទៅ!”។

នៅមួយករណីទៀត គឺលោកទើបនឹងជួបរឿងរ៉ាវប្រេះឆាចំណងស្នេហ៍ផង យ៉ាងណា លោកសុំមិននិយាយលម្អិតពីករណីនេះ។ វិលទៅករណី ចោរកម្មខាងលើវិញ លាង ឧត្តម បញ្ជាក់ថា លោកសុខចិត្ត ឲ្យទ្រព្យបង់ទៅចុះ មិនបានដាក់ពាក្យបណ្ដឹងពឹងសមត្ថកិច្ចអ្វីនោះទេ។ លោកចាត់ទុកថា អ្វីដែលកើតឡើង គឺជាគ្រោះរបស់លោក នឹងសង្ឃឹមថា គ្រោះអាក្រក់ ចង្រៃឧបទ្រពទាំងឡាយទាំងពួង នឹងចាកចេញទៅឲ្យឆ្ងាយពីលោកចាប់ពីពេលនេះតទៅ។

“ណ្ហើយ...ទៅដាក់ប្ដឹងអីទេបងអើយ...បងឯងដឹងហើយ ជួនអស់តែលុយថែមហ្នឹង...សង្ឃឹមថា អាគ្រោះចង្រៃហ្នឹង វាអស់ត្រឹមហ្នឹង ចេញឲ្យឆ្ងាយពីខ្ញុំរហូតទៅ...ព្រោះវាដូចជា ស៊យពេកហើយ!”៕

អត្ថបទ៖ ទារិកា