មកដឹងរឿងពិតពីក្រោយ បាតដៃយក្សដុះកណ្តាលវាលខ្សាច់ នៅប្រទេសឈីលី

2018-11-16 02:57:01
ចំនួនមតិ 0 | ចំនួនចែករំលែក 0

ចន្លោះមិនឃើញ

វាលខ្សាច់ Atacama នៅក្នុងប្រទេសឈីលី គឺជាវាលខ្សាច់ស្ងួតហួតហែងបំផុតលើពិភពលោក ដែលស្ថិតនៅខាងក្រៅតំបន់ប៉ូល ហើយលាតសន្ធឹងដាច់កន្ទុយភ្នែកលើផ្ទៃដីសរុប ១០៥ ០០០គីឡូម៉ែត្រការ៉េឯណោះ។

ជាមួយគ្នានេះ វាលខ្សាច់ដ៏ធំល្វឹងល្វើយខាងលើបានបង្កប់រូបចម្លាក់បាតដៃយក្សដ៏ធំមួយ ដែលអ្នកធ្វើដំណើរទៅដល់ដំបូងអាចយល់ច្រលំ ថាជាការបំភាន់ភ្នែក ឬអ្វីផ្សេង។ ផ្ទុយទៅវិញ នៅពេលដែលចូលទៅពិនិត្យមើលឲ្យច្បាស់ រូបចម្លាក់ «Mano del Desierto» ឬ «Hand of the Desert» នោះ គឺជាការពិត។

បើមើលតាមរូបចម្លាក់បង្ហាញឲ្យឃើញ បាតដៃដុះចេញពីដីខ្សាច់ឡើងមកលើ ហាក់បីដូចជាកំពុងលើកដៃសុំជំនួយអីចឹង។ រូបចម្លាក់បាតដៃ Hand of the Desert នោះមានកម្ពស់រហូតដល់ទៅ ១១ម៉ែត្រ។

គួរឲ្យដឹងថា វាត្រូវបង្កើតឡើងដោយជាងចម្លាក់ឈីលី ឈ្មោះ Mario Irarrázabal។ ជាងចម្លាក់នោះបានសាងសង់ចម្លាក់ «Hand of the Desert» នៅក្នុងឆ្នាំ១៩៩២ ដោយប្រើបេតុង និងដែក ហើយទទួលបានជំនួយហិរញ្ញប្បទានពីអង្គការក្នុងស្រុក ឈ្មោះ Corporación Pro Antofagasta។

ទោះបីជាយ៉ាងណា គោលបំណងក្នុងការបង្កើតវា មិនត្រូវបានគេដឹងច្បាស់ឡើយ។ ប៉ុន្តែមនុស្សមួយចំនួននិយាយថា វាមានបំណងរំលឹកដល់មនុស្សថា គួរតែបន្ទាបខ្លួនតាមធម្មជាតិ។ ចំណែកឯអ្នកខ្លះទៀតជឿជាក់ថា វាជាការបង្ហាញរបស់មនុស្សក្នុងការប្រឆាំងនឹងភាពមិនស្មើគ្នា៕

ចុចអាន៖