កប់! សាលី អ៊ូមើត ម្ចាស់មេដាយមាសលំដាប់ពិភពលោកដ៏ល្បី មកប្រកួតម៉ូតូទឹកនៅកោះកុង

2018-12-14 09:29:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ចាស់មេដាយមាសកីឡាទ្វីបអាស៊ីរបស់កម្ពុជា សាលី អ៊ូមើត ទើបតែពីការប្រកួតកីឡាម៉ូតូទឹកពានរង្វាន់ស្តេចថៃ ដែលជាពានរង្វាន់កម្រិតពិភពលោក កាលពីថ្ងៃទី៩ ខែធ្នូ ឆ្នាំ២០១៨ កន្លងទៅនេះ បានបង្ហាញវត្តមានលើទឹកដីខេត្តកោះកុង ក្នុងពិធីបុណ្យសមុទ្រលើកទី៧នេះ ដើម្បីចូលរួមប្រកួតកីឡាម៉ូតូទឹក (Jet Ski)។

លោក សាលី អ៊ូមើត បានប្រាប់ Sabay ថានេះជាលើកទី១ហើយដែលលោកមកចូលរួមប្រកួតក្នុងពិធីបុណ្យសមុទ្រ ចាប់តាំងពីសហព័ន្ធម៉ូតូទឹកកម្ពុជាបានបង្កើតឡើង។ លោកថា ការចូលរួមប្រកួតនេះ គោលបំណងសំខាន់ គឺចង់បង្ហាញខ្លួនឲ្យបងប្អូនខ្មែរ បានឃើញវត្តមានលោក ជាកីឡាករជម្រើសជាតិ លំដាប់មេដាយមាសពិភពលោក។ ក្នុងនោះដែរ លោកថានឹងខំប្រឹងប្រែងយកលេខ១ ឲ្យប្រទេសកម្ពុជាបន្តទៀត ព្រោះថានេះជាការប្រកួតមិត្តភាពអន្តរជាតិ ដែលមានការចូលរួមពីប្រទេសថៃ និងម៉ាឡេស៊ី។

ម្ចាស់មេដាយទ្វីបអាស៊ីឆ្នាំ២០១៨ ក៏បានឲ្យដឹងដែរថា ការប្រកួតក្នុងពិធីបុណ្យសមុទ្រនេះ គឺមាន៣វិញ្ញាសា ដែលវិញ្ញាសានីមួយៗ មានកីឡាករ៩រូប ពេញៗទាំងអស់។ ដូច្នេះសរុបទាំងអស់ មានកីឡាករចូលរួមប្រកួតមិនតិចជាង៣០នាក់ឡើយ។

ឆ្លៀតក្នុងឱកាសនេះដែរ លោក សាលី អ៊ូមើត បានរំលឹកពីការប្រកួតពានរង្វាន់ស្ដេចថៃ ដែលទើបតែឈ្នះមេដាយមាសថា លោកបានខិតខំហ្វឹកហាត់យ៉ាងខ្លាំង បន្ទាប់ពីលោកបានសម្រាកអស់រយៈពេល៤ឆ្នាំ គិតចាប់តាំងពីឆ្នាំ២០១០ ដែលលោកជាម្ចាស់មេដាយមាស ក្នុងការប្រកួតពានរង្វាន់ស្ដេចថៃនេះ។ កីឡាករម៉ូតូទឹកវ័យ២៦ឆ្នាំរូបនេះ បន្តថា លោកបានរំពឹងថា នឹងដណ្ដើមយកមេដាយមាសជូនកម្ពុជា នៅទីបំផុតលោកក៏ធ្វើបានដូចការគិតទុកមែន។

លោក សាលី អ៊ូមើត នឹងធ្វើការប្រកួតម៉ូតូទឹក ទាំង៣វិញ្ញាសានៅថ្ងៃទី ១៥ ខែធ្នូ នេះហើយនៅមុខសាលាខេត្តកោះកុង។ ដូច្នេះសូមប្រជាពលរដ្ឋកុំភ្លេចចូលរួមទស្សនាឲ្យបានច្រើនកុះករ៕