OPPO ត្រៀមចាយលុយ ១,៤៣ ពាន់លានដុល្លារសិក្សាបច្ចេកវិទ្យា 5G និង AI

2019-01-04 07:48:00
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅក្នុងកម្មវិធីតាំងពិព័រណ៍បច្ចេកវិទ្យារបស់ក្រុមហ៊ុន OPPO នៅទីក្រុងសិនជិន កាលពីថ្មីៗនេះ Oppo បានប្រកាសជាផ្លូវការ បានត្រៀមរួចជាស្រេចក្នុងការវិនិយោគទឹកប្រាក់ប្រមាណ ១.៤៣ ពាន់លានដុល្លារអាមេរិកក្នុង គម្រោងសិក្សាស្រាវជ្រាវ និងអភិវឌ្ឍន៍(R&D)ទៅលើផលិតផលបច្ចេកវិទ្យាដែលមានដូចជា បច្ចេកវិទ្យា 5G, បច្ចេកវិទ្យាឆ្លាតវៃ AI និងឧបករណ៍ឆ្លាតវៃជាច្រើនសម្រាប់ឆ្នាំ ២០១៩ ។

លោក Tony Chen ដែលជាស្ថាបនិក និងជានាយកប្រតិបត្តិរបស់ក្រុមហ៊ុន OPPO បានប្រកាសជាផ្លូវការថា ចំនួនទឹកប្រាក់ក្រុមហ៊ុនរបស់លោក បានកើនឡើងរហូតដល់ ១៥០ ភាគរយជាបន្តបន្ទាប់បើធៀបនឹងឆ្នាំកន្លងៗមក ។

ជាមួយនឹងការកើនឡើងនៃទឹកប្រាក់សម្រាប់ប្រើប្រាស់ក្នុងគម្រោងនេះ OPPO នឹងធ្វើការអភិវឌ្ឍន៍រួមបញ្ចូលនូវផ្នែកផ្គត់ផ្គង់ ដោយបង្កើនឡើងនូវក្រុមជំនាញពិសេសៗក្នុងការធ្វើឲ្យប្រសើរឡើង ដើម្បីអភិវឌ្ឍន៍សមត្ថភាពខាងផ្នែកបច្ចេកវិទ្យា។

OPPO 5G

#ចំណុចធំៗ ៣ដែលបានលើកឡើងនៅក្នុងគម្រោង មានដូចជា៖

- យកចិត្តទុកដាក់លើបច្ចេកវិទ្យា 5G

OPPO នឹងខិតខំប្រឹងប្រែងដើម្បីក្លាយខ្លួនជាក្រុមហ៊ុនផលិតស្មាតហ្វូនដែលអាចប្រើប្រាស់ប្រព័ន្ធ 5G ដំបូងគេបង្អស់។ ក្រុមហ៊ុន OPPO បានសិក្សាស្វែងរក App ដែលប្រើប្រាស់នៅក្នុងជំនាន់ 5G + ហើយចុងក្រោយនឹងកំណត់ពីតម្លៃនៃ 5G រួមទាំងបញ្ចូលប្រព័ន្ធ 5G យ៉ាងពេញលេញជាមួយកម្មវិធី និងការយល់ដឹងរបស់អ្នកប្រើប្រាស់។

- យកចិត្តទុកដាក់លើបច្ចេកវិទ្យា AI

ក្នុងសម័យប្រព័ន្ធ 5G ក្រុមហ៊ុន OPPO នឹងអនុវត្តបច្ចេកវិទ្យា AI នៅទូទាំងកម្មវិធីជាច្រើន រួមមានដូចជា ការថតរូបភាព បច្ចេកវិទ្យាដោះសោរតាមផ្ទៃមុខ និងតាមរយៈស្នាមក្រយៅដៃ ដែលត្រូវភ្ជាប់ជាមួយកម្មវិធី AI ដែលមកជាមួយនឹងកម្មវិធី Beauty Camera កម្មវិធីកែពន្លឺរូបថត 3D និងកម្មវិធីឆ្លាតវៃជាច្រើនទៀត ។ អត្ថប្រយោជន៍ដែលបានមកពីបច្ចេកវិទ្យា AI នឹងទទួលបានពិតប្រាកដនៅក្នុងសម័យប្រព័ន្ធ 5G។

- យកចិត្តទុកដាក់លើបច្ចេកវិទ្យាលើ ឧបករណ៍ឆ្លាតវៃសម្រាប់ប្រើក្នុងផ្ទះ

ជាចុងក្រោយលោក Tony Chen បានលើកឡើងថា ក្រុមហ៊ុន OPPO បានប្ដេជ្ញាថានឹង ក្លាយជាអ្នកដឹកនាំនៅក្នុងសម័យមួយដែលបច្ចេកវិទ្យា 5G, AI និង IoT ត្រូវបានអនុវត្តទូលំទូលាយ។

មិនតែប៉ុណ្ណោះ OPPO នឹងធ្វើការអភិវឌ្ឍន៍បន្ថែមនូវបច្ចេកវិទ្យា AI ទៅលើផលិតផល ស្មាតហ្វូនរបស់ខ្លួនក៏ដូចជា នាឡិកា វៃឆ្លាត (Smart watch) និងគ្រឿងបច្ចេកវិទ្យា សម្រាប់ប្រើក្នុងផ្ទះ (Smart Home) ដើម្បីឆ្លើយតបនឹងតម្រូវការកើនឡើងរបស់អតិថិជន នៅក្នុងយុគសម័យបច្ចេកវិទ្យា (IOT) ។

ជាងនេះទៀត ពិព័រណ៍បច្ចេកវិទ្យា OPPO រយៈពេល ២ ថ្ងៃរួមមានវេទិកាចំនួន ៤ សំខាន់ៗគឺ AI, Big Data, Cloud+ IoT, 5G និងកន្លែងពិព័រណ៍ចំនួន ១២ ដែលគ្របដណ្ដប់លើគម្រោងជាង ៨០ ទៀតផងដែរ៕