រំភើបជំនួស! សូជីអូ បញ្ចេញសម្ដីចាក់ដោត ជូនសារជាពិសេសដល់ប្រពន្ធ និងកូន

2019-01-08 03:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មិនខុសពីបុរសជាច្រើនទៀតទេ សម្រាប់ Dingdong Dantes ឬសូជីអូ គ្រួសារពិតជាមានន័យសំខាន់បំផុតចំពោះលោក។ សម្ដីគ្រប់ម៉ាត់ចេញពីមាត់របស់លោកពិតជាបង្កប់ទៅដោយក្ដីស្រឡាញ់គ្មានដែនកំណត់ចំពោះប្រពន្ធ និងកូន។

និយាយក្នុងកម្មវិធី Magandang Buhay របស់ទូរទស្សន៍ ABS-CBN តារាសម្ដែងស្វាមីរបស់ម៉ារីម៉ានេះ បានផ្ញើសារដល់ទៅ ៣សំខាន់ៗដល់ប្រពន្ធ និងកូនជាទីស្រឡាញ់។

ជូនដល់កូនប្រុសដែលនឹងមកឃើញពន្លឺថ្ងៃក្នុងពេលឆាប់ៗនេះ Dingdong បាននិយាយថា៖ "ប៉ាមិនទាន់ដឹងថាគួរដាក់ឈ្មោះអ្វីឲ្យកូនទេ តែយ៉ាងណាមិនថ្វី ព្រោះថាពិភពលោកដែលកូនជិតចូលមកនៅនេះ នឹងពោរពេញទៅដោយភាពរីករាយ ហើយតែងពេញទៅដោយរឿងអស្ចារ្យក្នុងជីវិត។ ព្រោះថា ប្រសិននោះជាអ្វីដែលកូនគិតក្នុងចិត្ត កូននឹងជួបរឿងល្អៗដូចគ្នាក្នុងជីវិតកូន”។

ចំពោះកូនស្រី Zia វិញ លោកប៉ារូបនេះនិយាយថា៖ "កុំមានអារម្មណ៍ថាអផ្សុកពេកណាកូន ព្រោះថាដៃគូលេងជាមួយកូន នឹងមកដល់ឆាប់ៗនេះហើយ”។

សម្រាប់ភរិយាសំណព្វចិត្ត Marian Rivera វិញ Dingdong និយាយថា៖ "នៅពេលនេះ នាងកំពុងពពោះ ខ្ញុំអាចដឹងច្បាស់តើអ្វី ដែលនាងប៉ងប្រាថ្នាក្នុងជីវិត។ ប្រហែលមកពីជាតារាដូចគ្នា ទើបបណ្ដាលឲ្យខ្ញុំជួបនាង រហូតទាក់ទងបានរៀបការជាមួយគ្នា។ ប៉ុន្តែអ្វីដែលនាងចង់បាននោះ គឺក្ដីសុខក្នុងគ្រួសារផ្ទាល់ខ្លួនតូចនេះ មានន័យថានាងចង់បានកូន។ កាតព្វកិច្ចជាម្ដាយ នាងធ្វើបានយ៉ាងល្អ ខ្ញុំពិតជាសរសើរនឹងអ្វីដែលនាងបានគិតគូរ ចាត់ចែងទាំងនេះណាស់។ បងនឹងគាំទ្រអូនគ្រប់កាលៈទេសៈ មិនថាល្អ ឬអាក្រក់ ហើយបងស្រឡាញ់អូនរហូតតទៅ”។

សម្ដីចាក់ដោតទាំងប៉ុន្មាននេះ ពិតជាស្ដែងបញ្ជាក់ពីទឹកចិត្តក្នុងនាមជាស្វាមី និងឪពុកដ៏ល្អ។ យ៉ាងណាក្ដីទោះបីមិនបានបង្ហាញសម្ដីទាំងនេះ ក៏អ្នកគាំទ្រជាច្រើនលើសលប់ដឹងច្បាស់ពីជម្រៅចិត្ត Dingdong តាមរយៈកាយវិការ ការមើលថែគ្រួសារខ្លួនគ្រប់ពេល៕

ប្រភព៖ Team Dantes ប្រែសម្រួល៖ យី សុធារី