ផ្អែកតាមស្ថានភាពបច្ចុប្បន្ន តើ«បាល់ទាត់ និងប្រដាល់»មួយណាល្បីជាង?

2019-05-02 23:17:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សភាគច្រើនបាននិយាយថា កីឡាបាល់ទាត់មានប្រជាប្រិយភាពលំដាប់ទី១នៅក្នុងប្រទេសកម្ពុជា ខណៈកីឡាប្រដាល់ក្បាច់គុនបុរាណខ្មែរអាចស្ថិតនៅលំដាប់ទី២។ យ៉ាងណា ប្រហែលជាពីរបីឆ្នាំចុងក្រោយនេះ សង្កេតឃើញថា កីឡាប្រដាល់មានសន្ទុះអ្នកគាំទ្រខ្លាំងមិនចាញ់បាល់ទាត់ឡើយទាំងនៅទីក្រុង និងជនបទ។

អ្នកគាំទ្របាល់ទាត់មានសន្ទុះខ្លាំង

អ្នកគាំទ្រកីឡាបាល់ទាត់ក្នុងប្រទេសកម្ពុជាស្តែងចេញជារូបរាងគួរឲ្យចាប់អារម្មណ៍បំផុតនៅពេលដែលក្រុមបាល់ទាត់ជម្រើសជាតិកម្ពុជាប្រកួតជម្រុះ 2018 World Cup កាលពីឆ្នាំ២០១៥ទល់នឹងក្រុមភ្ញៀវម៉ាកាវ នៅស្តាតចាស់។ ប្រកួតថ្ងៃទី១២ មីនា ២០១៥ អ្នកគាំទ្រយ៉ាងច្រើនកុះករបានចូលទស្សនាពេញស្តាតចាស់គឺមានចំនួនជាង៨ពាន់នាក់។ សរុបទាំងពីរជើង កម្ពុជា ឈ្នះម៉ាកាវ ៤-១ ឡើងជុំទី២វគ្គជម្រុះ។

អ្នកគាំទ្រខ្មែរពេលកម្ពុជាប្រកួតជាមួយម៉ាកាវនៅស្តាតចាស់

វគ្គជម្រុះជុំទី២ 2018 FIFA World Cup qualification – AFC Second Round ពូល E គឺ៤ប្រកួតនៅពហុកីឡដ្ឋានជាតិរបស់ក្រុមជម្រើសជាតិកម្ពុជាមានអ្នកគាំទ្ររាប់ម៉ឺននាក់។ កម្ពុជាចាញ់សិង្ហបុរី ០-៤ ថ្ងៃទី១១ មិថុនា ២០១៥ មានអ្នកគាំទ្រចំនួន៦ ៣០០០នាក់។ កម្ពុជាចាញ់អាហ្វហ្គានីស្ថាន ០-១ ថ្ងៃទី១៦ មិថុនា ២០១៥ មានអ្នកគាំទ្រ ៥ ៥០០០នាក់។ កម្ពុជាចាញ់ស៊ីរី ០-៦ ថ្ងៃទី៨ កញ្ញា ២០១៥មានអ្នកគាំទ្រ ៣ ៥០០០ នាក់។ កម្ពុជាចាញ់ជប៉ុន ០-២ ថ្ងៃទី១៧ វិច្ឆិកា ២០១៥ មានអ្នកគាំទ្រ ២៩ ៨៧១នាក់។

ទិដ្ឋភាពអ្នកគាំទ្របាល់ទាត់កម្ពុជា

សូម្បីការប្រកួតមិត្តភាពអន្តរជាតិរបស់ជម្រើសជាតិកម្ពុជាក្រុមធំ និងពានរង្វាន់យុវជនកម្រិតអាស៊ី អាស៊ានចន្លោះឆ្នាំ២០១៥-២០១៦ នៅទឹកដីកម្ពុជាក៏មានសន្ទុះអ្នកគាំទ្រខ្លាំង។ មិនត្រឹមតែប៉ុណ្ណោះពេលនោះ ការប្រកួតលីគកម្ពុជាក៏មានសន្ទុះអ្នកគាំទ្រច្រើនដែរនៅពេលក្លឹបធំៗប៉ះគ្នានៅអូឡាំពិក ដូចជាភ្នំពេញជួបបឹងកេតជាដើម។ លើសពីនេះទៀត ការប្រកួតពានរង្វាន់ Toyota Mekong Cup ដែលបឹងកេតឡើងដល់វគ្គផ្តាច់ព្រ័ត្រក៏មានអ្នកគាំទ្រច្រើនដែរ។

អ្នកគាំទ្របាល់ទាត់មានសន្ទុះថយចុះ

ប្រហែលជាពីរបីឆ្នាំចុងក្រោយនេះ អ្នកគាំទ្របាល់ទាត់បានថយចុះជាបណ្តើរៗ ទោះជាការប្រកួតអន្តរជាតិរបស់ក្រុមជម្រើសជាតិក្រុមធំ ក្រុមយុវជន ឬពានរង្វាន់កម្រិតអាស៊ាន ឬអាស៊ីជាច្រើន។ ចំនួនដែលធ្លាប់ទស្សនារាប់ម៉ឺននាក់បែរជាថយចុះស្ទើរតែពាក់កណ្តាល។ ចំពោះការប្រកួតលីគកម្ពុជា២រដូវកាលចុងក្រោយ ឬការប្រកួតជម្រុះពានរង្វាន់ AFC Cup ជាដើមក៏កាន់តែខ្សត់ខ្សោយអ្នកគាំទ្រ។

ចាន់ វឌ្ឍនាកា ថតជាមួយអ្នកគាំទ្រ

បញ្ហាដែលមានឥទ្ធិពលលើទឹកចិត្តអ្នកគាំទ្រធ្វើឲ្យថយចុះអាចបណ្តាលមកពីលទ្ធផលនៃការប្រកួតរបស់ក្រុមជម្រើសជាតិកម្ពុជាមិនសូវទទួលបានគាប់ប្រសើរគិតចាប់ពីជម្រុះ 2018 FIFA World Cup qualification – AFC Second Round។ ចំណែកការប្រកួតក្នុងលីគរឹតតែគ្មានអ្វីដែលទាក់ចិត្តអ្នកគាំទ្រដោយសារតែកម្រិតបច្ចេកទេស និងគុណភាពរបស់ក្រុមក្នុងលីគ បើធៀបនឹងក្រុមរបស់ប្រទេសក្នុងតំបន់។

លើសពីនេះទៀត ក្រុមជាច្រើនក្នុងលីគកម្ពុជាបាន និងកំពុងកសាងបណ្តាញអ្នកគាំទ្ររៀងៗនៅពេលដែលពួកគេបានធ្វើទីលានផ្ទាល់ខ្លួនទាំងនៅរាជធានីភ្នំពេញ និងតាមខេត្ត។ ដំណាក់កាលនេះជាពេលកំពុងរៀបចំហេដ្ឋារចនាសម្ពន្ធសម្ព័ន្ធ ហើយទីលានខ្លះមិនទាន់រួចរាល់ ដូច្នេះនៅមិនទាន់មានលក្ខណៈសម្បត្តិគ្រប់គ្រាន់ដើម្បីស្រូបយកអ្នកគាំទ្រនៅឡើយ។ បើនិយាយពីការប្រកួតពានរង្វាន់ Hun Sen Cup ក៏មិនមានអ្នកគាំទ្រច្រើនគួរឲ្យកត់សំគាល់ដែរ។

សកម្មភាពប្រកួតលីគកម្ពុជារវាងវិសាខា និងអគ្គិសនីកម្ពុជា

អ្នកគាំទ្រកីឡាប្រដាល់

កាលពីប៉ុន្មានឆ្នាំមុន កីឡាប្រដាល់ប្រចាំសប្តាហ៍ភាគច្រើនប្រកួតតែកីឡាករខ្មែរប៉ះខ្មែរប៉ុណ្ណោះ ខណៈការប្រកួតអន្តរជាតិភាគច្រើនធ្វើឡើង៣ខែម្តង ឬសង្វៀនខ្លះរៀបចំការប្រកួតអន្តរជាតិ១ដង ឬ២ដងប៉ុណ្ណោះក្នុងមួយឆ្នាំ។ ការប្រកួតលក្ខណៈកីឡាករខ្មែរប៉ះខ្មែរក៏មានមនុស្សចូលមើលច្រើនដែរ។ ប៉ុន្តែសម្រាប់ការប្រកួតអន្តរជាតិវិញពិតជាទទួលអ្នកគាំទ្រណាស់ ស្ទើរពេញសង្វៀនរាល់ប្រកួតម្តងៗ។ ពេលនោះប្រមុខរាជរដ្ឋាភិបាលកម្ពុជាបានឧបត្ថម្ភប្រាក់លើកទឹកចិត្តដល់កីឡាករខ្មែរដែលប្រកួតអន្តរជាតិទៀតផង។

ក្រោយមកការប្រកួតមិត្តភាពអន្តរជាតិក៏បានរៀបចំជារៀងរាល់សប្តាហ៍ដោយស្ទើរតែគ្មានសង្វៀនណាដែលមានការប្រកួតគូជាតិទាំងអស់នោះទេ។ ជាមួយគ្នាការប្រកួតដណ្តើមខ្សែក្រវាត់ដែលមានកីឡាករបរទេសចូលរួមប្រកួតថែមទៀត។ ចំពោះអ្នកគាំទ្រនៅតែមានច្រើនស្ទើរពេញៗសង្វៀនដូចសម័យកាលដែលប្រកួត៣ខែម្តងក្នុងមួយឆ្នាំ ឬមួយឬពីរដងក្នុងមួយឆ្នាំ។

អ្នកគាំទ្រកីឡាប្រដាល់

យ៉ាងណា សង្វៀនដែលមានអ្នកគាំទ្រច្រើនស្ទើរពេញៗរាល់សប្តាហ៍គឺបណ្តាលមកពីទីកន្លែងជិតទីប្រជុំជន ឬតំបន់រោងចក្រដែលសំបូរអ្នកមកពីខេត្តច្រើន។ ចំពោះសង្វៀនខ្លះដែលមិនស្ថិតនៅជិតទីប្រជុំជន ឬរោងចក្រកាន់តែខ្សត់អ្នកគាំទ្រ ហើយខ្លះឈានដល់បិទក៏មាន។

អ្នកគាំទ្រច្រើនបំផុតគឺការប្រកួតប្រដាល់គោជល់របស់សង្វៀន CNC ដែលរៀបចំនៅតាមខេត្ត។ បន្ទាប់ជោគជ័យរៀបចំការប្រកួតនៅខេត្តបាត់ដំបង និងកំពង់ស្ពឺ គឺការប្រកួតនៅខេត្តកំពង់ធំកាលពីថ្ងៃសៅរ៍ ទី២៧ ខែមេសា ឆ្នាំ២០១៩កន្លងទៅមានអ្នកគាំទ្រច្រើនបំផុតមិនធ្លាប់មាន។ តំណាងរៀបចំកម្ពុជាបានប្រកាសថា អ្នកគាំទ្រចូលរួមទស្សនាពេញសង្វៀនដែលមានចំនួនជាង១ម៉ឺននាក់ដែលនេះជាចំនួនច្រើនមិនធ្លាប់មាន។ តាមការឲ្យដឹងពីអ្នកខេត្តកំពង់ធំថា អ្នកទៅមើលផ្ទាល់មិនត្រឹមតែអ្នកនៅទីរួមខេត្តប៉ុណ្ណោះទេ ប៉ុន្តែជាអ្នកមកពីស្រុកផ្សេងៗទូទាំងខេត្តកំពង់ធំដែលអ្នកខ្លះស្ទើរដំណើរចម្ងាយ៣០ទៅ៤០គីឡូម៉ែត្រដើម្បីបានមើលការប្រកួតនេះ។

កត្តាដែលប្រដាល់នៅតែល្បី

ការប្រកួតអន្តរជាតិក្នុងស្រុក៖ អ្នកគាំទ្រដឹងហើយ រាល់ចុងសប្តាហ៍មានការប្រកួតមិត្តភាពអន្តរជាតិជាមួយកីឡាករបរទេសដែលធ្វើឲ្យអ្នកគាំទ្រតាមដានជាប្រចាំ។ មិនត្រឹមប៉ុណ្ណោះ ការប្រកួតដណ្តើមខ្សែក្រវាត់រឹតតែធ្វើឲ្យអ្នកគាំទ្រតាមដានខ្លាំងឡើយ។

ទិដ្ឋភាពអ្នកទស្សនាប្រដាល់របស់ CNC នៅខេត្តកំពង់ធំ (រូពថត៖ Red Bull)

ការប្រកួតអន្តរជាតិក្រៅស្រុក៖ ទន្ទឹមនេះ កីឡាករ កីឡាការិនីខ្មែរជាច្រើនទទួលបានឱកាសទៅប្រកួតនៅក្រៅប្រទេស ហើយពួកគេមួយចំនួនក៏ទទួលបានលទ្ធផលល្អប្រសើរដែរ។ ទាំងនេះជាផ្នែកសំខាន់មួយឲ្យជំរុញវិស័យគុនខ្មែរកាន់តែល្បី។

ការប្រកួតក្នុងព្រឹត្តិការណ៍ផ្លូវការ៖ កីឡាប្រដាល់គុនខ្មែរមានមុខក្នុងកីឡាស៊ីហ្គេមកាលពីឆ្នាំ២០១៧ដែលអ្នកលេងគុនខ្មែរ ឃុន ឌីម៉ា ឈ្នះមេដាយមាសដែលក៏ជាឥទ្ធិពលផ្សព្វផ្សាយដ៏ល្អមួយ។

ឃុន ឌីម៉ា ឈ្នះមេដាយមាសស៊ីហ្គេម២០១៧

អ្នកមើលតាមផេកផ្សាយផ្ទាល់

ចំនួនអ្នកទស្សនាតាមផេកដែលផ្សាយចេញពីទូរទស្សន៍ក៏ខុសប្លែកគ្នា។ ផេក BTV Cambodia ដែលផ្សាយផ្ទាល់ពីការប្រកួតលីគកំពូលកម្ពុជាជាមធ្យមមានអ្នកគាំទ្រមើល 1K ឬច្រើនជាងនេះពេលគូសំខាន់ប្រចាំសប្តាហ៍។ ការប្រកួត Hun Sen Cup នៅតាមខេត្តដែលទូរទស្សន៍នេះផ្សាយផ្ទាល់ក៏មិនសូវមានច្រើនដែរ។ លើកលែងតែការប្រកួតរបស់ក្រុមបាល់ទាត់ជម្រើសជាតិកម្ពុជាទើបមានអ្នកគាំទ្រច្រើនចាប់ពី 2K ឡើង។

ផ្ទុយទៅឃើញថា អ្នកមើលច្រើនរាប់ K នៅពេលវ៉ៃគូអន្តរជាតិសំខាន់ៗ ប៉ុន្តែគូជាតិមិនសូវសំខាន់ ក៏ពុំមានមើលច្រើនរាប់ K ដែរ។ ទោះជាយ៉ាងណា បើធៀបជាមួយបាល់ទាត់ អ្នកមើលប្រដាល់ច្រើនជាង។ ភាពខុសគ្នានៃការចូលមើលគឺថា កីឡាប្រដាល់ចូលមើលដោយសេរី ប៉ុន្តែបាល់ទាត់ទិញសំបុត្រទើបចូលបាន។

លក់សំបុត្រចូលទស្សនា

ការប្រកួតពានរង្វាន់អន្តរជាតិ មិត្តភាពអន្តរជាតិរបស់ក្រុមជម្រើសជាតិកម្ពុជាក្រុមធំ និងយុវជនតាំងពីដើមមកគឺលក់សំបុត្រ។ កាលពីឆ្នាំ២០១៥ អ្នកគាំទ្រទិញសំបុត្រស្ទើរគ្មានសល់ចូលទស្សនា ប៉ុន្តែមួយរយៈពេលចុងក្រោយនេះមិនសូវកកកុញគ្នាដើម្បីទិញសំបុត្រឡើយ។

ក្រុមបាល់ទាត់កម្ពុជា

ចំណែកការប្រកួតលីគកម្ពុជា និង Hun Sen Cup រឹតតែងាយស្រួលក្នុងការទិញសំបុត្រ។ បើទោះជាបីជាតម្លៃសំបុត្រ៤ពានរៀលសម្រាប់កន្លែងធម្មតា ឬ៨ពាន់រៀលសម្រាប់កន្លែងពិសេសក៏មិនបានស្វែងរកទិញសំបុត្រឡើយ។

បើនិយាយពីប្រដាល់វិញ គ្រប់សង្វៀនប្រដាល់នៅរាជធានីភ្នំពេញគ្មានលក់សំបុត្រឡើយពោលគឺចូលមើលដោយឥតគិតថ្លៃ។ ដូច្នេះការមិនលក់សំបុត្រអាចជាផ្នែកមួយដ៏សំខាន់ដែលជំរុញឲ្យប្រដាល់មានអ្នកមើលផ្ទាល់ច្រើន និងកាន់តែល្បីជាលំដាប់។

យ៉ាងណា សង្វៀនទើបបើកថ្មីគឺសង្វៀនឯកភ្នំនៅខេត្តបាត់ដំបងដែលលក់សំបុត្រសម្រាប់អ្នកចូល ទស្សនា។ កន្លែងអង្គុយធម្មតាសម្រាប់ខ្មែរសំបុត្រ១តម្លៃ ១៥ ០០០រៀល និង VIP សំបុត្រ១តម្លៃ២៥ ០០០រៀល ខណៈបរទេសតម្លៃ ២៥ ០០០រៀលសម្រាប់កន្លែងធម្មតា និងតម្លៃ ៣៥ ០០០ រៀលសម្រាប់ VIP។ តាមការឲ្យដឹងពីប្រភពនៅខេត្តបាត់ដំបងថា ទោះជាលក់សំបុត្រ ក៏មានអ្នកចូលទស្សនាដែរដូចជាប្រកួតសំខាន់ដែលមាន កែវ រំចង់ វ៉ៃគឺមានអ្នកទិញសំបុត្រចូលទស្សនាជាង២ពាន់នាក់ ប៉ុន្តែពេលមិនសូវមានកីឡាករល្អៗវ៉ៃក៏មានមនុស្សចូលទស្សនាតិចដែរ៕

អត្ថបទ៖ ជាន ចាន់រ៉ា