ម្ចាស់នាឡិកាតម្លៃជាង ២៣លានដុល្លារស្លាប់ អាចជាបណ្ដាសា?

2014-11-17 23:54:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តប្រាកដជាធ្លាប់ឭពីរឿងបណ្ដាសា ឬទំនាយដែលធ្វើឲ្យមនុស្សស្លាប់ ប្រសិនបើហ៊ានបំពាន ដោយជៀសមិនបាន។ ការពីពេលថ្មីៗនេះ ម្ចាស់នាឡិកាតម្លៃកប់ពពកម្នាក់បានបាត់បង់ជីវិតមុនដាក់ដេញថ្លៃនាឡិកានោះ ២ថ្ងៃប៉ុណ្ណោះ។

ព្រះអង្គម្ចាស់ Sheikh Saud bin Mohammed Al-Thani និងនាឡិកា

នាឡិកាដែលមានតម្លៃដ៏ថ្លៃនេះ ត្រូវបានគេចាត់ទុកថាជានាឡិកាស្អាតដាច់គេលើលោក ប៉ុន្តែអ្នកដែលក្លាយជាម្ចាស់របស់វា សុទ្ធតែជួបបញ្ហាមិនចេះស្រាកស្រាន្ត។ ព្រះអង្គម្ចាស់ Sheikh Saud bin Mohammed Al-Thani គឺជាម្ចាស់នាឡិកានេះចុងក្រោយគេ បានចូលទិវង្គតកាលពីសប្ដាហ៍មុន នៅក្នុងព្រះរាជដំណាក់របស់ព្រះអង្គនាទីក្រុងឡុងដុង។ មហាសេដ្ឋីត្រកូលក្សត្រព្រះជន្ម ៤៨ព្រះវស្សាអង្គនេះ ត្រូវបានគេស្គាល់ថា ជាអ្នកប្រមូលវត្ថុសិល្បៈដ៏ធំជាងគេមួយអង្គលើលោក។ ព្រះអង្គមានបំណងចង់លក់នាឡិកានោះ និងមានគម្រោងរៀបចំដាក់ឲ្យដេញថ្លៃនៅពីរថ្ងៃបន្ទាប់ ប៉ុន្តែមិនទាន់ដល់ពេលផង ព្រះអង្គក៏ត្រូវចូលទិវង្គតដោយសារបញ្ហាបេះដូង។

ម្ចាស់ទីមួយរបស់នាឡិកានេះ គឺលោក Henry Graves ដែលបានកុម្ម៉ង់ជាងច្នៃនាឡិកាដ៏ល្បីល្បាញម្នាក់ឈ្មោះ Patek Phillipe (ដាក់ជាឈ្មោះនាឡិកា) ឲ្យផលិតនាឡិកានេះឡើងក្នុងឆ្នាំ១៩២៥។ ជាងនាឡិកាជនជាតិស្វីស បានចំណាយពេល ៣ឆ្នាំដើម្បីស្រាវជ្រាវ និង ៥ឆ្នាំទៀតផលិតវាឡើង រហូតដល់ឆ្នាំ១៩៣៣ ទើបរួចរាល់។ នាឡិកាដ៏ពិសេសនេះត្រូវបានគេរចនាឡើង ដោយស្រោបមាស និងមានមុខងារច្រើនលើសពីនាឡិកាធម្មតា។

នាឡិកា Patek Phillipe តម្លៃជាង ២៣លានដុល្លារ

នៅក្នុងឆ្នាំ១៩៣៣ វាបាននាំមកនូវសោកនាដកម្ម និងជំងឺដល់ម្ចាស់ជាបន្តបន្ទាប់។ ៧ខែក្រោយពេល Graves ក្លាយជាម្ចាស់កម្មសិទ្ធិនាឡិកានេះ មិត្តដ៏ជិតស្និទ្ធបំផុតរបស់លោកបានស្លាប់ ហើយបន្តិចក្រោយមកកូនប្រុសឈ្មោះ George ក៏បានបាត់បង់ជីវិតនៅក្នុងគ្រោះថ្នាក់រថយន្តទៀត។ បន្ទាប់ពីមានរឿងហេតុសោកសង្រេងកើតឡើងមិនចេះចប់ នាឡិកានោះបានលក់ចេញពីម្ចាស់ដើម រួចលក់បន្តបន្ទាប់ និងចុងក្រោយគេក្នុងឆ្នាំ១៩៩៩ វាបានធ្លាក់ដល់ព្រះអង្គម្ចាស់នៃប្រទេសកាតារ ដែលទើបចូលទិវង្គតនេះ៕

ចុចអាន៖ រឿងរ៉ាវទាក់ទងនឹងជំនឿអរូបិយជាច្រើនទៀត

ប្រែសម្រួល៖ គង់ វិសាល

ប្រភព៖ mirror