អ្នកជំនាញពិភាក្សាផុលផុសពីបដិវត្តឧស្សាហកម្ម៤.០
- 2019-06-28 03:14:08
- ចំនួនមតិ 0 | ចំនួនចែករំលែក 0
អ្នកជំនាញពិភាក្សាផុលផុសពីបដិវត្តឧស្សាហកម្ម៤.០
ចន្លោះមិនឃើញ
គិតចាប់ពីមានបដិវត្តឧស្សាហកម្មលើដំបូងឬហៅថាបដិវត្តឧស្សាហកម្មជំនាក់ទីមួយ១.០នៅអំឡុងទសវត្សរ៍ឆ្នាំ១៨០០មក វិស័យឧស្សាហកម្មបានរីកចម្រើនជាបន្តបន្ទាប់រហូតដល់បច្ចុប្បន្នឈានដល់បដិវត្តឧស្សាហកម្មជំនាន់ទី៤ ឬ៤.០។
បដិវត្តឧស្សាហកម្ម១.០ កើតឡើងនៅអំឡុងទសវត្សរ៍ឆ្នាំ១៨០០ ដែលពេលនោះមនុស្សរកឃើញការប្រើប្រាស់ចំហាយទឹកជួយជំរុញវិស័យឧស្សាហកម្មរបស់ខ្លួនឲ្យកាន់តែរីកចម្រើន។ លុះដល់សតវត្សរ៍ទី២០ បដិវត្តឧស្សាហកម្មជំនាន់ទី២ ឬ២.០ បានលេចជារូបរាង ដោយមនុស្សបានយកអគ្គិសនីជាគ្រឹះសំខាន់ក្នុងវិស័យឧស្សាហកម្ម និងងាយស្រួលប្រើជាងចំហាយទឹក។
មិនបានប៉ុន្មានទសវត្សរ៍ផងបដិវត្ដឧស្សាហកម្មជំនាន់ទី៣ ឬ៣.០ បានលេចឡើងដែរក្នុងសតវត្សរ៍ទី២០ដដែលដោយពេលនោះមនុស្សចាប់ផ្ដើមបង្កើត និងផលិតឧបករណ៍អេឡិចត្រូវនិច បង្កើតឈីប និងបង្កើតHardware ដែលធ្វើឲ្យវិស័យឧស្សាហកម្មកាន់តែរីកចំរើន និងចំណាយថ្លៃដើមតិច។
រហូតមកដល់សតវត្សរ៍ទី២១ ប្រហែលជានៅឆ្នាំ២០១៥ ក៏មានការលើកឡើង និងនិយាយច្រើនពីបដិវត្ដន៍ឧស្សាកម្មជំនាន់ទី៤ ឬ៤.០។ មកដល់ពេលនេះប្រព័ន្ធអ៊ីនធឺណេត ចែករំលែកព័ត៌មានឆាប់រហ័ស វិភាគទិន្នន័យបានលឿន ដែលបានជួយជំរុញអ្វីដែលមានក្នុងបដិវត្ដ៣.០ ឲ្យកាន់តែប្រសើរ និងលឿនជាងមុន។
ចុះនៅកម្ពុជាវិញអ្នកជំនាញឲ្យនិយមន័យបែបណាលើបដិវត្ដឧស្សាហកម្ម៤.០?
លោកជំទាវ ចម និម្មល រដ្ឋលេខាធិការក្រសួងពាណិជ្ជកម្មថ្លែងក្នុងកម្មវិធី កិច្ចសន្ទនា កម្ពុជាឧស្សាហកម្ម៤.០ កាលពីម្សិលមិញថាជាផ្នត់គំនិតរបស់លោកជំទាវផ្ទាល់បដិវត្តឧស្សាហកម្ម៤.០ គឺការតភ្ជាប់ប្រព័ន្ធកុំព្យូទ័រ ដូចជាល្បឿន ការគ្របដណ្ដប់បានធំទូលាយ។ លោកជំទាវឧទាហរណ៍បញ្ជាក់ថាពីមុនចង់ផ្ដល់ព័ត៌មានទៅអតិថិជន១០០លាននាក់ ប្រើទូរសព្ទស៊ីពេល៧៥ឆ្នាំ តាមបណ្ដាញអ៊ីនធឺណេត៧ឆ្នាំ ហ្វេសប៊ុកស៊ីពេល៤ឆ្នាំ Instagram ស៊ីពេល២ឆ្នាំ និងPokemin Goស៊ីពេលតែបីខែប៉ុណ្ណោះ។
បើនិយាយពីកម្ពុជាវិញថាកំពុងនៅចំណុចណាក្នុងបដិវត្តន៍៤.០ លោកជំទាវផ្ដល់ជារង្វាស់ពី១ទៅ១០ ហើយថាកម្ពុជាអាចកំពុងនៅចន្លោះលេខ៣និងលេខ៤។
សម្រាប់លោក ជី សិលា នាយកប្រតិបត្តិ និងស្ថាបនិកក្រុមហ៊ុនសប្បាយឌិជីថល ថ្លែងថាតាមគំនិតលោកបដិវត្តឧស្សាហកម្ម៤.០ ជាការអភិវឌ្ឍន៍វិស័យបច្ចេកវិទ្យាទំនាក់ទំនងឲ្យកាន់តែទំនើប និងកាន់តែស្រួលសម្រាប់មនុស្ស។ លោកមានប្រសាសន៍ថា៖ «យើងឃើញការប្រើប្រាស់ឧបករណ៍អេឡិចត្រូវនិចទូរសព្ទពីធំមកតូច ពីតូចទៅធំវិញរហូតដល់ថ្នាក់ពីចុចរហូតដល់Touch Screen រហូតដល់ឥឡូវយើងនិយាយ តិចទៀតប្រហែលជាគ្រាន់តែយើងគិតយើងដល់តែម្ដង និយមន័យខ្ញុំថាធ្វើឲ្យជិវិតមនុស្សកាន់តែស្រួល តែក៏អាចធ្វើឲ្យមនុស្សយើងខ្ជិលផងដែរ»។
តើអ្នកប្រកបអាជីវកម្មលើវិស័យឌីជីថលយល់ឃើញយ៉ាងម៉េចចំពោះបដិវត្តឧស្សាហកម្ម៤.០?
លោក ជី សិលា លើកឡើងថាវាជាឱកាសមួយដែលធ្វើឲ្យប្រជាពលរដ្ឋ ឬអ្នកធ្វើជាជីវកម្មបានទទួលបទពិសោធន៍ពីបដិវត្តមួយនេះ ពីនិន្នាការពិភពលោក និងបច្ចេកវិទ្យាថ្មីៗដែលមាន។ ប៉ុន្តែលោកថាក៏មានបញ្ហាប្រឈមដែរ ប្រឈមត្រង់ថាវាហាក់ថ្មីនៅឡើយសម្រាប់កម្ពុជា ដែលថាទើបតែមាននិយាយច្រើននៅអំឡុងឆ្នាំ២០១៧ ឬ២០១៨នេះប៉ុណ្ណោះ។
លោកបន្តថា៖ «យើងជួបបញ្ហាប្រឈមច្រើន តែក៏រៀនបានច្រើន អាជីវករមិនធ្វើការលើឌីជីថល ក៏ពួលគាត់នៅថ្មីៗដែរ អ៊ីចឹងយើងមិនទាន់មាននិន្នាអ្វីផ្ទាល់ខ្លូននៅឡើយទេ គួរតែមានការពិភាក្សាពីបដិវត្តន៍នេះឲ្យបានកាន់តែច្រើន»។
លោកបន្ថែមថា៖ «ធនធានមនុស្សក៏នៅខ្វះច្រើន អ្នកខ្លះរៀនបីឆ្នាំហើយតែនៅមិនត្រូវនឹងអ្វីដែលយើងចង់បាន បច្ចេកវិទ្យាប្រែប្រួលលឿនពេកបត់បែនអត់ទាន់...ឧទាហរណ៍ថាយើងចង់ធ្វើគំនូរជីវចលប្រភេទ3D មួយ...យើងត្រូវការពេលវេលា ជំនាញ និងសិល្បៈ ដែលអ្នកគូរហ្នឹងចេះប្រើកម្មវិធីបំលែងរូបភាពឲ្យចេះដើរ អ៊ីចឹងយើងត្រូវការពេលវេលា ចំណេះដឹង ហើយសិល្បៈទៀត សួរថាតើអ្នកគូរគំនូរគាត់ទៅរៀនកុំព្យូទ័រឲ្យត្រូវកម្មវិធីហ្នឹងអត់? វាជាបញ្ហាប្រឈម»។
សម្រាប់លោក Steven Path ស្ថាបនិក និងជានាយកក្រុមហ៊ុនPathmazing លើកឡើងដែរថាអ្នកមានជំនាញច្បាស់លាស់ខាងបច្ចេកវិទ្យាបានប្រាក់ខែខ្ពស់ និងឡើងច្រើនជាងប្រទេសជិតខាងដូចជាវៀតណាម និងភីលីពីនផង។ លោកថាការឡើងច្រើនបែបនេះដោយសារតែអ្នកមានទេពកោសល្យខាងបច្ចេកវិទ្យានៅកម្ពុជាមានតិច ហើយតម្រូវការរបស់ក្រុមហ៊ុនបរទេសនៅខ្មែរមានច្រើន។
ដើម្បីឲ្យចំនួនអ្នកមានជំនាញ និងទេពកោសល្យនេះមានកាន់តែច្រើននោះ លោក Steven Path លើកទឹកចិត្តឲ្យក្រុមហ៊ុនឯកជនគួរវិនិយោគជួយបណ្ដុះបណ្ដាលអ្នកទើបបញ្ចប់ការសិក្សាដែលមានទេពកោសល្យលើរឿងនេះ ទើបអាចពង្រីកចំនួនអ្នកជំនាញបែបនេះបានច្រើន៕