Klopp ថាកុំសង្ឃឹម Liverpool ទិញកីឡាករថ្លៃទៀត ព្រោះក្លឹបផ្ដោតលើការប្រើយុវជន
- 2019-07-12 03:23:53
- ចំនួនមតិ 0 | ចំនួនចែករំលែក 0
Klopp ថាកុំសង្ឃឹម Liverpool ទិញកីឡាករថ្លៃទៀត ព្រោះក្លឹបផ្ដោតលើការប្រើយុវជន
ចន្លោះមិនឃើញ
Jurgen Klopp មិនសង្ឃឹមថាទីផ្សារដោះដូរកីឡាកររបស់ Liverpool លើកនេះនឹងមមាញឹកដូចកាល២រដូវកាលកន្លងទៅ។
អ្នកចាត់ការសញ្ជាតិអាល្លឺម៉ង់បានចាយធំកាលពីឆ្នាំកន្លងទៅដូចជាការទិញយក Virgil van Dijk, Alisson និង Fabinho ដែលជាកម្លាំងសំខាន់ជួយក្លឹបឈ្នះ Champions League លើកទី៦។ ក្រៅពីពាន សមិទ្ធផលសំខាន់ផ្សេងទៀតសម្រាប់ Liverpool គឺរងជើងឯក Premier League ដែលដណ្ដើមពិន្ទុបានរហូត៩៧។
យ៉ាងណា Klopp គ្មានផែនការចាយលុយដូចក្រដាស ទៀតទេពោលគឺលោកផ្ដោតលើការប្រើយុវជនមានទេពកោសល្យដែលកំពុងស្រេកឃ្លានឱកាសក្នុងការបង្ហាញសមត្ថភាព។ Liverpool ទើបទិញបានខ្សែការពារកណ្ដាលវ័យ១៧ឆ្នាំម្នាក់ប៉ុណ្ណោះគិតមកទល់នឹងពេលនេះ។
“ពួកយើងបាននាំចូលកីឡាករថ្មីរួចហើយគ្រាន់តែអ្នកមិនចាប់អារម្មណ៍ប៉ុណ្ណោះ។ យុវជន Rhian Brewster, Chamberlain និងថ្នាលយើងជាច្រើនទៀតសុទ្ធតែជាសមាជិកថ្មីរដូវកាលនេះ។ វាពិតជារឿងដ៏ល្អសម្រាប់ Liverpool”។ បុរសវ័យ៥២ឆ្នាំនិយាយដូច្នេះ។
គួរបញ្ជាក់ថាទីផ្សារដោះដូរកីឡាករនៅអង់គ្លេស នឹងបិទទ្វារនៅថ្ងៃទី៨ ខែសីហា ខាងមុខ ខណៈ Liverpool ក៏ដូចជាក្លឹបអង់គ្លេសផ្សេងទៀតហាក់មិនសូវចំណាយធំគួរឲ្យកត់សម្គាល់ ដូច Real Madrid និង Barcelona នៅអេស្ប៉ាញនៅឡើយទេ៕