១០ ឆ្នាំមុន Taylor Swift ជួបរឿងអាម៉ាសបំផុតក្នុងជីវិត

2019-09-13 07:39:59
ចំនួនមតិ 0 | ចំនួនចែករំលែក 0

ចន្លោះមិនឃើញ

១៣ កញ្ញា ឆ្នាំ ២០០៩ គឺជាថ្ងៃដែលកម្មវិធី Video Music Awards បានប្រារព្ធឡើងនាពេលនោះ។ វាក៏ជាថ្ងៃដែលតារាចម្រៀងវ័យក្មេង Taylor Swift ជួបប្រទះនឹងរឿងអាម៉ាស់មុខបំផុតក្នុងប្រវត្តិសាស្ត្រផងដែរ។

នៅយប់នោះ Taylor Swift ដែលមានវ័យទើប ១៩ ឆ្នាំ បានយកឈ្នះ Beyoncé ដើម្បីបានពានរង្វាន់ Best Female Video សម្រាប់វីដេអូចម្រៀង "You Belong With Me” របស់ខ្លួន។ ហើយពេលនោះតារារ៉េប Kanye West បានលេចមុខលើឆាក និងបានបង្អាក់ដំណើរ Taylor ដែលបម្រុងថ្លែងអំណរគុណដល់អ្នកគាំទ្រ។

Kanye បានដណ្ដើមមេក្រូពីដៃ Taylor រួចបាននិយាយថា ៖ "យូ Taylor, ខ្ញុំសប្បាយចិត្តដែលអ្នកឈ្នះ ខ្ញុំនឹងឲ្យអ្នកនិយាយឲ្យចប់ ប៉ុន្តែ Beyoncé មានវីដេអូចម្រៀងល្អដាច់គេមួយ! គឺវីដេអូចម្រៀងល្អដាច់គេមួយ!” ។

ភ្លាមនោះ Beyoncé បង្ហាញទឹកមុខបែបមិនគួរឲ្យជឿ ចំណែក Taylor Swift វិញ មានការចុះផ្សាយថាបានដើរចេញពីឆាកទាំងយំ។ ប៉ុន្តែក្រោយមក នៅក្នុងកម្មវិធីដដែល Beyoncé បានអញ្ជើញ Taylor ឡើងលើឆាក ដើម្បីបង្ហើយការថ្លែងអំណរគុណរបស់ខ្លួន។ ក្នុងកម្មវិធី Jay Leno ពីរថ្ងៃក្រោយមក Kanye បានទទួលស្គាល់ថាខ្លួនរាងឈ្លើយមែន ហើយបានធ្វើការសុំទោសជាច្រើនលើក។

ឆ្នាំ ២០១០ ៖ Kanye ធ្វើការសុំទោស

ក្នុងសារ Twitter ក៏វែងអន្លាយនៅខែកញ្ញា ឆ្នាំ ២០១០ Kanye បានធ្វើការសុំទោសម្ដងទៀត និងនិយាយថាបានសរសេរចម្រៀងមួយបទសម្រាប់ Taylor។ ក្រោយមកតារារ៉េបរូបនេះ ក៏បានលុបគណនីរបស់ខ្លួនចោលបាត់។

ប៉ុន្តែប៉ុន្មានថ្ងៃក្រោយមក Taylor បានឡើងសម្ដែងបទចម្រៀង "Innocent” នៅលើឆាកកម្មវិធី VMA ឆ្នាំ ២០១០ ដែលបទចម្រៀងមានបញ្ចូលប៉ារូលបញ្ឆេះដល់ Kanye ថា ៖ “Thirty two and still growin' up now” ( ដែលមានន័យថា អាយុ ៣២ ឆ្នាំហើយ នៅមិនទាន់ដឹងក្ដីទៀត )។ គួរដឹងថាពេលកើតហេតុ Kanye គឺមានអាយុ ៣២ ឆ្នាំ។

ឆ្នាំ ២០១៥ ៖ ការផ្សះផ្សា

នៅត្រឹមឆ្នាំ ២០១៥ ទំនាស់ភាគីទាំងពីរ ហាក់ត្រូវបានសាបរលាប។ Kanye បានឲ្យតម្រុយដែរថាពួកគេអាចនឹងផលិតចម្រៀងជាមួយគ្នា ហើយ Kim Kardashian (ភរិយា Kanye) បានចូលរួមការប្រគំតន្ត្រីរបស់ Taylor នៅទីក្រុងឡុងដុងជាមួយបងប្អូនស្រីរបស់ខ្លួនទៀតផង។

នៅក្នុងកម្មវិធី VMA ឆ្នាំ ២០១៥ អ្នកទាំងបី (Taylor, Kanye និង Kim) ហាក់ដូចជាត្រូវគ្នាខ្លាំង ហើយ Taylor ថែមទាំងធ្វើការលេងសើចចំពោះការឡើងរំខានរបស់ Kanye នៅពេលដែលនាងឡើងប្រកាសពានរង្វាន់ Video Vanguard Award ដល់ Kanye ទៀតផង។

ឆ្នាំ ២០១៦ ៖ មានផ្កាភ្លើងរឿងទំនាស់ឡើងវិញ

គ្រប់យ៉ាងបានប្រែប្រួលនៅពេល Kanye បញ្ចេញចម្រៀង "Famous” នៅខែកុម្ភៈ ឆ្នាំ ២០១៦។ ចម្រៀងមានប៉ារូលថា ៖ "I feel like me and Taylor might still have sex// Why? I made that bitch famous” ( មានន័យថាខ្ញុំមានអារម្មណ៍ថាខ្ញុំ និង Taylor ប្រហែលនឹងនៅរួមភេទជាមួយគ្នា។ ហេតុអ្វី? គឺខ្ញុំធ្វើឲ្យនាងល្បី )។

បន្ទាប់ពីឃ្លានេះរងការរិះគន់ Kanye បានចេញមុខការពារប៉ារូលរបស់ខ្លួន ដោយនិយាយថាឃ្លានេះមានការយល់ព្រមពី Taylor រួចហើយ។ ប៉ុន្តែអ្នកតំណាង Taylor ឆ្លើយតប ដោយទទូចថានាងមិនបានប្រាប់អំពីឃ្លា "Bitch” នោះទេ។

ពេលដែល Taylor ឡើងទទួលពាន Grammy សម្រាប់ Album of the Year ក្រោយបញ្ចេញអាល់ប៊ុម "1989” បានប៉ុន្មានសប្ដាហ៍នោះ នាងបានបញ្ចេញសារដែលឌឺដងដល់ Kanye។

Taylor និយាយថា ៖ "នឹងមានមនុស្សនៅតាមផ្លូវ ដែលចង់បន្ទាបបន្ថោកភាពជោគជ័យរបស់អ្នក ឬចង់បានមុខមាត់សម្រាប់ជោគជ័យ ឬភាពល្បីឈ្មោះរបស់អ្នក។ ប៉ុន្តែបើអ្នកផ្ដោតតែលើការងារ និងមិនឲ្យគេបង្អាក់ដំណើរបាននោះ ថ្ងៃណាមួយនៅពេលអ្នកទៅដល់គោលដៅ អ្នកនឹងក្រឡេកមើលជុំវិញ ហើយអ្នកនឹងដឹងថាមានតែអ្នក និងមនុស្សដែលស្រឡាញ់អ្នកប៉ុណ្ណោះ ដែលជួយឲ្យអ្នកដល់គោលដៅ ហើយវានឹងជាអារម្មណ៍ល្អបំផុតមួយក្នុងលោក” ។

ក្រោយមកទៀតនៅខែកក្កដា ពេលជួបសម្ភាសន៍ជាមួយនឹងទស្សនាវដ្ដី GQ ភរិយារបស់ Kanye បានលើកឡើងថា Taylor ពិតជាបានអនុញ្ញាតឲ្យបញ្ចូលប៉ារូល "Bitch” នៅក្នុងបទ "Famous” ហើយថែមទាំងថាមានការថតសំឡេងសន្ទនាទូរសព្ទនៅពេលនោះទៀតផង ប៉ុន្តែអះអាងថាមេធាវី Taylor បានឲ្យ Kim និងប្ដី បំផ្លាញវាចោល។

បន្ទាប់មកទៀត Kanye បានបញ្ចេញវីដេអូចម្រៀងសម្រាប់បទ Famous ដែលកាន់តែធ្វើឲ្យកំហឹងផ្ទុះរឹតតែខ្លាំង។ វីដេអូមានបង្ហាញអំពីម៉ូដែល រូបរាងដូចជា Taylor ដេកអាក្រាតនៅលើគ្រែ ជាមួយបុគ្គលល្បីៗដទៃដូចជាលោក Donald Trump, Rihanna រួមនឹង Kanye, Kim និងអតីតគូស្នេហ៍របស់ប្ដីប្រពន្ធមួយនេះជាដើម។

នៅក្នុងសារ Twitter មួយ ដែលបានលុបចោលហើយនោះ Taylor បានប្រកែកថាមិនបានដឹងអំពីប៉ារូល "Bitch” ហើយចោទប្រកាន់ប្ដីប្រពន្ធ Kanye ថាជាតួអង្គឃាតកម្ម។ Taylor បានបញ្ចប់សាររបស់ខ្លួនដោយឃ្លាថា ៖ "I would very much like to be excluded from this narrative, one that I have never asked to be a part of, since 2009,"។ ដែលមានន័យថា "ខ្ញុំពិតជាចង់ដកខ្លួនពីរឿងនិទាននេះ រឿងនិទានដែលខ្ញុំមិនដែលសុំចូលរួមសម្ដែង តាំងពីឆ្នាំ ២០០៩ មក” ។

ឆ្នាំ ២០១៧ ៖ បទ "Look What You Made Me Do”

Taylor បានសម្អាតគណនី Instagram ខ្លួន មុនបញ្ចេញអាល់ប៊ុមចម្រៀងទី ៦ "Reputation” និងបានបញ្ចេញវីដេអូសត្វពស់ជាច្រើនវីដេអូ ហើយប្រើប្រាស់សត្វនេះក្នុងការផ្សព្វផ្សាយ និងការប្រគំតន្ត្រីរបស់ខ្លួនផងដែរ។

បទចម្រៀង "Look What You Made Me Do” របស់ Taylor បានប្រកាសអំពីការស្លាប់របស់ Taylor ពីមុន និងមានប៉ារូលដែលមនុស្សភាគច្រើនជឿថាសំដៅដល់ ជម្លោះជាមួយ Kanye។ វីដេអូសម្រាប់ចម្រៀងនេះ បានបំបែកកំណត់ត្រា YouTube ហើយវាមានបង្ហាញអំពី Taylor ស្លៀកពាក់ឈុតចូលរួម VMA ឆ្នាំ ២០០៩ និងបាននិយាយអំពីឃ្លា " I would very much like to be excluded from this narrative” ផងដែរ។

ខែមិថុនា ២០១៩ ៖ Taylor និយាយបើកចំហថា Kanye និង Kim ធ្វើបាបនិងមើលងាយខ្លួន

ក្រោយពី Taylor បានដឹងថា Scooter Braun ទិញអតីតផលិតកម្មចម្រៀងនាង នាងបានហៅ Scooter រួមនឹង Kanye និង Kim ដោយថា ពួកគេបានធ្វើបាបនាងរាប់ឆ្នាំ។ នៅលើ tumblr តារាចម្រៀងរូបនេះបានសរសេរថា ៖ "ការពិតគួរឲ្យចាប់អារម្មណ៍អំពីព័ត៌មានថ្ងៃនេះ គឺខ្ញុំទើបដឹងពីការទិញយកសិទ្ធនៃចម្រៀងដែលខ្ញុំផលិត ក្រោយពីវាបានប្រកាសចេញទៅពិភពលោក។ អ្វីដែលខ្ញុំគិតដល់គឺការធ្វើបាបឥតឈប់ឈរ ដែលខ្ញុំទទួលបានពីគាត់ (Scooter) ជាច្រើនឆ្នាំ។ ដូចជាពេលដែល Kim កែសម្រួលលើការសន្ទនាមួយ ធ្វើឲ្យវាលេចធ្លាយ រួចហើយ Scooter ឲ្យអតិថិជនរបស់ខ្លួនចំនួនពីរ ធ្វើបាបខ្ញុំតាមអនឡាញ។ ឬពេលដែលអតិថិជនរបស់គាត់ គឺ Kanye រៀបចំវីដេអូចម្រៀងអាសអាភាស ដែលបង្ហាញពីរូបរាងអាក្រាតរបស់ខ្ញុំ” ។

ថ្ងៃទី ២៥ សីហា ២០១៩ ៖ Taylor បញ្ចេញអាល់ប៊ុមទី ៧

ជាផ្នែកមួយនៃអាល់ប៊ុមចម្រៀងទី ៧ ប្រភេទ Deluxe របស់ខ្លួន Taylor បានបង្ហាញកំណត់ហេតុផ្ទាល់ខ្លួន ដែលមានមួយរៀបរាប់អំពីហេតុការណ៍នៅ VMA ឆ្នាំ ២០០៩។ "ប្រសិនបើអ្នកប្រាប់ខ្ញុំថា តារាល្បីម្នាក់គ្រោងនឹងឡើងលើឆាក និងប្រកាសអំពីការគិតរបស់ខ្លួន ថាខ្ញុំមិនគួរឈ្នះពាន នៅលើទូរទស្សន៍កំពុងផ្សាយផ្ទាល់នោះ ខ្ញុំអាចនឹងនិយាយថា «រឿងនោះ វាមិនកើតឡើងក្នុងជីវិតពិតនោះទេ»” ។