មកដឹងចំណុចខ្លាំងខ្លះៗរបស់ Huawei Mate 30 មុនប្រកាសយប់នេះ

2019-09-19 03:14:20
ចំនួនមតិ 0 | ចំនួនចែករំលែក 0

ចន្លោះមិនឃើញ

មកទល់ពេលនេះការបែកធ្លាយដំណឹងអំពីគ្រួសារត្រកូល Mate 30 មានច្រើនសន្ធឹកសន្ធាប់ ហើយនៅយប់នេះវេលាម៉ោង ៧ យប់ ទូរសព្ទត្រកូលនេះនឹងក្លាយជាផ្លូវការ។ ទាំងនេះជាលក្ខណៈសម្បត្តិមួយចំនួន ដែលមាននៅលើត្រកូល Mate30៖

ម៉ូដែល

Huawei Mate30 នឹងចែកចេញជា ៤ ម៉ូដែលផ្សេងៗគ្នា៖

Huawei Mate 30 Porsche Design
Huawei Mate 30 Pro
Huawei Mate 30
Huawei Mate 30 Lite

រចនាបថ

កាលពីប៉ុន្មានថ្ងៃមុន មានការលេចចេញអស់ទៅហើយអំពីរចនាបថទូរសព្ទទាំងនេះ។ Mate 30 និង Mate 30 Pro នឹងមានរូបរាងខុសពីត្រកូល P30 ដែល Mate 30 មានកាមេរ៉ា ៤ គ្រាប់ រចនាបថទាំងមូល នៅខាងមុខមានក្បាលឆកតូចនិងអេក្រង់រាប ចំណែក Mate 30 Pro មានរចនាបថកាមេរ៉ាដូចគ្នា ហើយមានអេក្រង់ទឹកធ្លាក់កោងដល់ទៅ ៨៨ ដឺក្រេ។ Mate 30 Porsche Design មានខ្នងស្បែកនឹងមានការឌីហ្សាញដូចទៅនឹងតែមឡានប្រណាំង រីឯ Mate 30 Lite មានកាមេរ៉ាទម្រង់ជ្រុងដូច Mate 20 ហើយអេក្រង់មុខមានកាមេរ៉ាមួយគ្រាប់មិនមានក្បាលឆកឡើយ។

លេចចេញរូបរាងទាំងដុលរបស់ Huawei Mate 30 ទាំង ៤ ម៉ូដែល មុនថ្ងៃប្រកាស

អេក្រង់

Mate 30 Pro និង 30 Porsche Design មានអេក្រង់ទឹកធ្លាក់កោងបាន ៨៨ ដឺក្រេ បង្ហាញក្នុងកម្រិត QHD+ ៩០Hz ។ Mate 30 មានអេក្រង់រាបបង្ហាញក្នុងកម្រិត FHD+ នឹងក្បាលឆកតូច។ គួរបញ្ជាក់ថាអេក្រង់របស់ Mate 30 Pro គឺអាចផលិតឡើងដោយ LG។

កម្លាំងម៉ាស៊ីន

Huawei Mate 30 និង Mate 30 Pro នឹងដំណើរការដោយបន្ទះឈីប Kirin 990 SoC ភ្ជាប់មកជាមួយរ៉េម ៨ ឬ ១២ GB និងមានជម្រើសអង្គផ្ទុកទិន្នន័យរហូតដល់ ៥១២GB។ Mate ទាំងពីរអាចមាន 5G ស្រាប់ ដោយសារ Kirin ជំនាន់ថ្មីនេះមានផ្ទុកបច្ចេកវិទ្យា 5G ក្នុងនោះរួចទៅហើយ។

កាមេរ៉ា

ចំណុចដ៏គួរឲ្យចាប់អារម្មណ៍បំផុតគឺកាមេរ៉ា។ Mate30/30 Pro នឹងមានកាមេរ៉ា ៤ គ្រាប់ដូចគ្នា ដែលថត super slow motion បានរហូតដល់ ៧៦៨០ fps ដែលយឺតជាង Note 10+ រហូតដល់ទៅ ៨ ដង។ កាមេរ៉ា ៤០ MP f/1.6 , ៨MP f/2.4 ប្រភេទ telephoto 3x optical zoom និង ៤០MP Ultrawide រួមទាំង 3D ToF ។ មិនតែប៉ុណ្ណោះមាន flash ប្រភេទ Xenon ផងដែរ។

ថ្ម

Huawei Mate 30 មានទំហំថ្ម ៤២០០ mAh ចំណែក Mate 30 Pro មានទំហំថ្ម ៤៥០០ mAh ។ ទូរសព្ទទាំងពីរអាចសាកថ្មបានដោយប្រើខ្សែក្នុងល្បឿន ៤០ W និងសាកដោយមិនប្រើខ្សែ (wireless) ក្នុងល្បឿន ២៧W ។

ចំពោះតម្លៃមិនទាន់មានដំណឹងនៅឡើយទេ ប៉ុន្តែវាអាចមានតម្លៃរហូតដល់ ១ ពាន់ដុល្លារ។ យ៉ាងណាមិញ ទាំងនេះគ្រាន់តែជាការប្រមូលផ្ដុំរាល់ការលេចចេញខ្លះៗ អំពីស៊េរីនេះប៉ុណ្ណោះ ដើម្បីឲ្យកាន់តែច្បាស់សូមរង់ចាំទស្សនាការប្រកាសជាផ្លូវការនៅយប់នេះ៕

ប្រភព៖ gizmochina ប្រែសម្រួល៖ អ៊ឹម ដេវីដ