ទៀតហើយ! គីម ជុងអ៊ុនបញ្ជាឲ្យធ្វើសមយុទ្ធកាំភ្លើងធំ នៅជិតព្រំដែនសមុទ្រមានជម្លោះ

2019-11-26 06:30:55
ចំនួនមតិ 0 | ចំនួនចែករំលែក 0

ចន្លោះមិនឃើញ

មេដឹកនាំកូរ៉េខាងជើង បានបញ្ជាឲ្យកងទ័ពរបស់ខ្លួនធ្វើសមយុទ្ធបាញ់កាំភ្លើងធំនៅជិតព្រំដែនសមុទ្រកំពុងមានជម្លោះជាមួយប្រទេសកូរ៉េខាងត្បូង។

យោងតាមសារព័ត៌មានរដ្ឋក្រុងព្យុងយ៉ាងឲ្យដឹងកាលពីថ្ងៃចន្ទថា នេះជាសញ្ញាចុងក្រោយនៃការលែងអត់ធ្មត់ពីលោកគីម ជុងអ៊ុន ចំពេលមានការព្រួយបារម្ភថារយៈពេលជិត ២ ឆ្នាំនៃការទូតរវាងអាមេរិកនិងកូរ៉េខាងជើងនឹងត្រូវបែកបាក់ប្រសិនបើក្រុងវ៉ាស៊ីនតោនមិនបានបំពេញតាមឱសានវាទបស់ក្រុងព្យុងយ៉ាងដើម្បីផ្តល់គំនិតផ្តួចផ្តើមថ្មីមួយក្នុងការដោះស្រាយបញ្ហាប្រឈមមុខដ៏យូរអង្វែងមកលើកម្មវិធីអាវុធនុយក្លេអ៊ែរ។ ការធ្វើសមយុទ្ធបាញ់កាំភ្លើងធំនេះ ត្រូវបានធ្វើឡើងអំឡុងពេលដែលមេដឹកនាំកូរ៉េខាងជើង ធ្វើដំណើរទស្សនកិច្ចទៅកាន់ឆ្នេរ Changrin Islet ខាងលិច។ យ៉ាងណាមិញ ប្រភពមិនបានបញ្ជាក់ពីពេលវេលាច្បាស់លាស់នៃដំណើរទស្សនកិច្ច និងប្រភេទកាំភ្លើងធំដែលបានប្រើប្រាស់សម្រាប់បាញ់នោះទេ។

ចំណែកឯក្រសួងបង្រួបបង្រួមជាតិកូរ៉េឲ្យដឹងថា នេះគឺជាដំណើរទៅកាន់ទ័ពជួរមុខលើកដំបូងហើយរបស់លោកគីម ជុងអ៊ុន គិតចាប់តាំងពីខែមេសាឆ្នាំមុនមក អំឡុងពេលដែលកូរ៉េខាងជើងចាប់ផ្ដើមទំនាក់ទំនងការទូតជាមួយសហរដ្ឋអាមេរិក។ កិច្ចចរចារវាងភាគីទាំងពីរ នៅជាប់គាំងនៅឡើយដែលជាហេតុធ្វើឲ្យកូរ៉េខាងជើងចាប់ផ្ដើមដាក់សម្ពាធលើក្រុងវ៉ាស៊ីនតោន ដើម្បីដកទណ្ឌកម្មអន្ដរជាតិ និងបោះបង់អ្វីដែលហៅថាគោលការណ៍ប្រឆាំងកូរ៉េខាងជើង។

គួរឲ្យដឹងថា កាលពីឆ្នាំ ២០១០កន្លងទៅ ទាហានក្រុងព្យុងយ៉ាង បានធ្វើការបាញ់កាំភ្លើងធំទៅលើកោះកូរ៉េខាងត្បូងនៅតំបន់កំពុងមានជម្លោះខាងលើ ដែលបណ្ដាលឲ្យមនុស្ស ៤នាក់ស្លាប់ផងដែរ៕

ប្រភព៖ Japantimes ប្រែសម្រួល៖ រ័ត្ន