ឡូយបាត់! តួឯកប្រុសស្រី ស្អាតៗក្នុងភាពយន្តភាគថ្មីចំនួន២រឿង មកប៉ះគ្នានៅថ្ងៃនេះ
- 2020-01-17 08:11:01
- ចំនួនមតិ 0 | ចំនួនចែករំលែក 0
ឡូយបាត់! តួឯកប្រុសស្រី ស្អាតៗក្នុងភាពយន្តភាគថ្មីចំនួន២រឿង មកប៉ះគ្នានៅថ្ងៃនេះ
ចន្លោះមិនឃើញ
តារាប្រុសស្រីស្អាត ២គូ ដែលជាតួឯកក្នុងខ្សែភាពយន្តភាគ២រឿងរបស់ទូរទស្សន៍ប៉ុស្តិ៍លេខ៥ បូករួមសិល្បករជាច្រើនទៀតប្រមាណជា ៣០នាក់ បានមកជួបជុំគ្នានៅព្រឹកមិញ ដើម្បីធ្វើពិធីបើកក្រុងពាលីស្ថានីយនៅព្រឹកនេះ។
តួឯកប្រុសស្រីនៃខ្សែភាពយន្តពីររឿងនេះមាន លោក ណា ខុន និងកញ្ញា រចនា រ៉ាវ៉ាឌី ជាតួឯកប្រុសស្រីក្នុងរឿង "មរតកកម្ម"។ ដោយឡែកលោក ជា លាងឈែ កញ្ញា ណាក់ ស្រីណា និងលោក បញ្ញា សិទ្ធិ គឺជាតួឯកក្នុងរឿង "ទាសករលុយ"។ ពួកគេបានមកជួបជុំគ្នាក្រុងពាលីភាពយន្តរបស់ពួកគេរៀងខ្លួន មុនពេលចេញថតប្រកបដោយភាពសុខសប្បាយ។
ចំណុចគួរចាប់អារម្មណ៍ តារាប្រុសទាំងពីររឿងសុទ្ធមិនធ្លាប់ជួបសម្ដែងជាតួឯកជាមួយគ្នាទេ ពីមុនមក។ ណាខុន ប្រាប់ថា នេះជាលើកទី១ ដែលលោកបានជួបសម្ដែងជាដៃគូក្នុងខ្សែភាពយន្តជាមួយកញ្ញា រចនា រ៉ាវ៉ាឌី។ ដូច្នេះហើយលោកមានអារម្មណ៍ខុសប្លែកខ្លះ ប៉ុន្តែនៅតែចិញ្ចឹមចិត្តប្រឹងសម្ដែងឲ្យបានល្អដើម្បីបន្ថែមទម្ងន់ទៅលើសាច់រឿង "មរតកកម្ម"។ ងាកមកកញ្ញា ណាក់ ស្រីណា និងលោក លាងឈែ និងបញ្ញាសិទ្ធិ ក៏ដូចគ្នា។
ពួកគេរីករាយចំពោះបទពិសោធន៍ថ្មីនេះ និងសង្ឃឹមថា ពួកគេអាចសម្រេចបានលទ្ធផលល្អជាមួយគ្នា។ កញ្ញា ណាក់ ស្រីណា បានបញ្ជាក់ថា មិនត្រឹមទើបជួបសម្ដែងជាមួយតារាប្រុសទាំងពីរខាងលើ ប៉ុន្តែសម្រាប់នាង គឺជាលើកទី១ទៀត ដែលនាងបានចូលរួមសម្ដែងជាមួយភាពយន្តភាគរបស់ទូរទស្សន៍លេខ ៥។ "និយាយចង់សម្ដែងយូរឲ្យប៉ុស្តិ៍លេខ ៥ ឥឡូវឆ្នាំថ្មីអាចសម្រេចបានហើយ ហើយក៏រីករាយខ្លាំងដែរ"។
នេះគឺជាភាពយន្តទី១ របស់ទូរទស្សន៍ក្នុងស្រុកខាងលើ ដែលទើបបានធ្វើពិធីប្រពៃណីមុនចេញថតក្នុងដើមឆ្នាំ ២០២០នេះ។ ប៉ុន្តែតាមប្រធានផលិតកម្មវិធីប្រចាំនៅប៉ុស្ដិ៍លេខ៥ លោក ហួង តារាមុនី បានឲ្យដឹងថា នេះគ្រាន់ជាការចាប់ផ្ដើមសម្រាប់ឆ្នាំថ្មី ប៉ុន្តែស្ថានីយរបស់លោកនៅមានរឿងជាច្រើនទៀតដែលស្ថិតក្នុងគម្រោងត្រូវផលិតក្នុងឆ្នាំ ២០២០។
កាលពីឆ្នាំចាស់ តាមប្រធានផលិតកម្មវិធីដដែលបញ្ជាក់នាពេលកន្លងមក ប៉ុស្តិ៍លេខ៥ ផលិតភាពយន្តភាគបានចំនួន ១៩រឿង។ ដោយឡែកនៅឆ្នាំថ្មីនេះ មានការប៉ាន់ប្រមាណថា តួលេខនៃការភាពយន្តភាគត្រូវផលិត គឺអាចនឹងមានចំនួនប្រហាក់ប្រហែលគ្នាដែរ៕