ភាពតានតឹងរវាងចិន និងសហរដ្ឋអាមេរិក បានធូរស្រាលបន្តិចហើយ ប៉ុន្តែវានៅតែមានខ្លះៗ។ នាពេលថ្មីៗនេះ ក្រសួងយុត្តិធម៌អាមេរិក បានព្រមានប្រាប់ទៅក្រុមហ៊ុនផលិតរថយន្តអាមេរិកថា ប្រយ័ត្នចិនលួចយកបច្ចេកវិទ្យាយានយន្តអគ្គិសនីរបស់ពួកគេ។

នៅក្នុងសន្និសីទមួយ នាយក FBI លោក Christopher Wray បាននិយាយថា រដ្ឋាភិបាលចិនកំពុងខំប្រឹងដើម្បីដណ្តើមយក ភាពជាអ្នកដឹកនាំទាំងផ្នែកសេដ្ឋកិច្ច និងបច្ចេកវិទ្យា។ ទោះជាយ៉ាងណា នាយក FBI រូបនេះអះអាងថា ពួកគេមិនធ្វើដោយការច្នៃប្រឌិតស្របច្បាប់ទេ ប៉ុន្តែពួកគេកំពុងលួចរបស់យើង។

"យើងឃើញក្រុមហ៊ុនចិនលួចកម្មសិទ្ធិបញ្ញារបស់អាមេរិក ដើម្បីចៀសវាងពីគំនិតច្នៃប្រឌិតថ្មី ហើយបន្ទាប់មកប្រើវាដើម្បីប្រកួតប្រជែង ជាមួយក្រុមហ៊ុនអាមេរិក ដែលវាជាការបន្លំដល់ទៅ២ដង”។ នេះបើតាមសម្តីលោក Way។

មិនតែប៉ុណ្ណោះ លោក Wray និយាយថា ប្រទេសចិនប្រើវិធីសាស្រ្តជាច្រើនដើម្បីលួចយកបច្ចេកវិទ្យាអាមេរិក និងបន្ថែមទៀតថា នេះគឺជាបញ្ហាដ៏ធំមួយ ខណៈ FBI កំពុងធ្វើការស៊ើបអង្កេតប្រហែល ១ ០០០ ករណី ចំពោះការប៉ុនប៉ងលួចបច្ចេកវិទ្យាសហរដ្ឋអាមេរិកនេះ៕

ប្រភព៖ carscoops   ប្រែ​សម្រួល៖ សេង ឡុង