ក្រៅពីលក់រោងចក្រនៅថៃ GM បន្តបិទក្រុមហ៊ុនឡាននៅអូស្ត្រាលីមួយទៀត
- 2020-02-28 02:30:09
- ចំនួនមតិ 0 | ចំនួនចែករំលែក 0
ក្រៅពីលក់រោងចក្រនៅថៃ GM បន្តបិទក្រុមហ៊ុនឡាននៅអូស្ត្រាលីមួយទៀត
ចន្លោះមិនឃើញ
ក្រោយពីបានប្រកាសអំពីការលក់រោងចក្រផលិតរថយន្ត Chevrolet ក្នុងខេត្តរ៉ាក់យ៉ងប្រទេសថៃ ក្រុមហ៊ុន General Motors បន្តប្រកាសពីការបញ្ចប់ប្រតិបត្តិការនៃម៉ាករថយន្ត Holden ក្នុងប្រទេសអូស្ត្រាលីត្រឹមឆ្នាំ ២០២១ ខាងមុខ។
គួរដឹងថាការសម្រេចចិត្តក្នុងការលក់ និងបិទក្រុមហ៊ុននេះ គឺជាផ្នែកមួយនៃផែនការបង្រួមមុខជំនួញដើម្បីកាត់បន្ថយការចំណាយរបស់ General Motors ដែលបានអនុវត្តន៍ចាប់តាំងពីពេលដែល Mary Barra ឡើងធ្វើជានាយកប្រតិបត្តិក្រុមហ៊ុនក្នុងឆ្នាំ ២០១៤។ General Motors បានដកខ្លួនពីទីផ្សារដែលខ្លួនមិនអាចរកប្រាក់ចំណេញបានជាច្រើនមកហើយ ក្នុងនោះរួមមានប្រទេសរុស្ស៊ី, អាហ្វ្រិកខាងត្បូង និងអឺរ៉ុប និងបានលក់ក្រុមហ៊ុន Opel-Vauxhall ទៅឲ្យក្រុមហ៊ុនបារាំង Groupe PSA កាលពី ៣ ឆ្នាំមុនទៀតផង។
ក្រោយពីប្រកាសលក់រោងចក្រនៅប្រទេសថៃ ក្រុមហ៊ុន Chevrolet ប្រទេសថៃ បានធ្វើការលក់បញ្ចុះតម្លៃរថយន្ត Chevrolet រហូតដល់រាប់សែនបាត ដែលស្មើខ្ទង់ម៉ឺនដុល្លារ ដើម្បីសម្អាតស្ដុកដែលនៅសេសសល់ឲ្យអស់។
ចំណែកនៅអូស្ត្រាលីវិញ Holden ក៏បានបញ្ចុះតម្លៃរថយន្តរបស់ខ្លួន ដោយមានការបញ្ចុះតម្លៃរហូតដល់ជាង ១១ ០០០ ដុល្លារ។ ខណៈពេលនេះអតិថិជនកំពុងសម្រុកទិញរថយន្ត Holden ដែលអាចនឹងលក់អស់ពីស្តុកលឿនជាងការរំពឹងទុក។
តំណាងចែកចាយរថយន្ត Holden មួយកន្លែងនៅទីក្រុង Melbourne ប្រទេសអូស្ត្រាលីបាននិយាយថា ៖ "វាដូចជាទសវត្សឆ្នាំ ១៩៩០ អ៊ីចឹង។ ប្រសិនបើយើងអាចលក់រថយន្តបានដាច់ដូចពេលនេះ យើងប្រហែលមិនត្រូវបិទនោះទេ។”
គួរដឹងថាក្នុងពេលដែលជោគជ័យបំផុត ហាងលក់រថយន្ត Holden នីមួយៗអាចលក់រថយន្តបានចន្លោះពី ១០០ ទៅ ១៥០ គ្រឿងក្នុងមួយខែ ប៉ុន្តែក្នុងរយៈពេល ២ ឆ្នាំចុងក្រោយនេះ ក្នុងមួយខែអាចលក់បានចន្លោះ ២០ ទៅ ៥០ គ្រឿងប៉ុណ្ណោះ៕