DMC នឹងរៀបចំពិធីសម្ពោធពិព័រណ៍រូបថតលើកទីពីររបស់ខ្លួននៅថ្ងៃទី២ ខែឧសភា ឆ្នាំ២០២០ខាងមុខនេះ ចាប់ពីម៉ោង ៨:៣០ព្រឹក ដល់ម៉ោង៥ល្ងាច នៅក្នុងបរិវេណ​ដេប៉ាតឺម៉ងប្រព័ន្ធផ្សព្វផ្សាយនិងសារគមនាគមន៍ ក្នុងសាកលវិទ្យាល័យភូមិន្ទភ្នំពេញ ដែលរៀបចំឡើងដោយនិស្សិតឆ្នាំទី២ ជំនាន់ទី១៨ ក្រោមការដឹកនាំរបស់លោក ផន ភារិទ្ធ (Miller) ជាគ្រូបង្រៀនថតរូប នៃដេប៉ាតឺម៉ងផ្ទាល់។

លោកផន ភារិទ្ធ បានឲ្យ​ដឹងថា ពិព័រណ៍​នេះរៀបចំឡើងដើម្បីដាក់តាំងបង្ហាញស្នាដៃនៃការថតរូបរបស់និស្សិត បន្ទាប់ពីពួកគេបានសិក្សាពីបច្ចេកទេសថតរូបមួយឆមាសរួចមក ។ ហើយគ្រប់រូបថតទាំងនោះ មិនត្រឹមតែឆ្លុះបញ្ជាំងពីការខិតខំប្រឹងប្រែងរបស់និស្សិតប៉ុណ្ណោះទេ ប៉ុន្តែវាបានឆ្លុះបញ្ជាំងពីស្ថានភាពសង្គមនាពេលបច្ចប្បន្នផងដែរ។

ចំណែកលោក អុងប៊ុនអ៊ី ប្រធានដេប៉ាតឺម៉ងប្រព័ន្ធផ្សព្វផ្សាយនិងសារគមនាគមន៏ បាននិយាយថា ការតាំងពីព័រណ៏នេះបានផ្សាភ្ជាប់ទ្រឹស្តីរបស់និស្សិតទៅនឹងការអនុវត្តជាក់ស្តែងក្នុងន័យលើកកំពស់ចំណេះដឹង និងចំណេះធ្វើរបស់និស្សិតDMCផ្ទាល់ ។ចង់ជំរុញឱ្យនិស្សិតយកឧិកាសនេះសិក្សាស្រាវជ្រាវពីបញ្ហាប្រឈមនានាក្នុងសង្គម ហើយយកមកឆ្លុះបញ្ជាំងតាមរយះជំនាញដែលខ្លួនបានសិក្សា ។

ពិព័រណ៏រូបថតលើកទី២នេះ ផ្តោតសំខាន់ទៅលើប្រធានបទចំនួន៩ ដែលខុសពីការរៀបចំកាលពីឆ្នាំកន្លងទៅដែលមានប្រមាណតែ៣ប្រធានបទតែប៉ុណ្ណោះ។ ប្រធានបទទាំង៩រូមមាន៖

១. ចំណែកមួយនៃទីក្រុង ប្រកបរបរនេសាទ

២. ឯកសណ្ឋានយើង អត្តសញ្ញាណយើង

៣. ម្ហូបយើងអត្តសញ្ញាណយើង

៤. ជីវិតបីសម័យកាល

៥. I Am Social Media

៦. ក្រោមលោកតែមួយ វាសនាខុសគ្នា

៧. តើសំរាមមកពីណា?

៨. នាដកាតូច

៩. គេចពីភពងងិត

សូមបញ្ជាក់ថា ការតាំងពិព័រណ៏នេះមានរយះពេល៣២ថ្ងៃ គិតចាប់ពីថ្ងៃទី២ខែឧសភា ដល់ថ្ងៃទី២ខែមិថុនាឆ្នាំ២០២០ និងបើកឱ្យចូលរួមទស្សនាដោយសេរីនៅក្នុងបរិវេនសាកលវិទ្យាល័យភូមិន្ទភ្នំពេញ។

អត្ថបទ៖ Tep Sovannmoly