រូបរាងដំបូងបំផុតនៃ Galaxy Note20

2020-05-19 06:58:44
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅសល់តែប្រមាណ ៣ ខែទៀតត្រកូល Galaxy Note20 នឹងត្រូវបង្ហាញមុខជាផ្លូវការ។ កាន់តែជិតដល់ពេលប្រកាសចេញ ព័ត៌មានបែកធ្លាយអំពីវាក៏ចាប់ផ្ដើមចេញមកជាហូរហែផងដែរ ដែលចុងក្រោយនេះគឺជាការលេចចេញរូបភាព Render នៃ Galaxy Note20។

មុននេះប៉ុន្មានម៉ោងគណនី Twitter ឈ្មោះ Ice Universe ដែលតែងបញ្ចេញព័ត៌មានបែកធ្លាយត្រូវៗជាច្រើននោះ បានបង្ហាញរូបភាពពីរសន្លឹកដែលអះអាងថាជារូបភាព Render នៃ Galaxy Note20។ រូបភាព Render នេះនៅមិនទាន់ជាផលិតផលសម្រេចនៅឡើយទេ ដែលរូបភាពសម្រេចអាចប្រែប្រួលខុសពីនេះ។

ប៉ុន្តែបើតាមរូបភាពអាចឲ្យគេឃើញថាផ្នែកខាងមុខរបស់ Galaxy Note20 គឺមិនខុសពី Galaxy Note10 នោះទេ នៅមានការចោះរន្ធកាមេរ៉ា Selfie នៅចំកណ្ដាល និងមានអេក្រង់លាតសន្ធឹង។ ចំណែកផ្នែកខាងក្រោយមានការតម្រៀបកាមេរ៉ាជារាងជាចតុកោណកែងស្រដៀងនឹងរចនាបថលើត្រកូល Galaxy S20។ កាមេរ៉ាក្រោយនេះដែរគឺមានចំនួន ៣ គ្រាប់ដែលគេមិនទាន់ដឹងអំពីលក្ខណៈសម្បត្តិរបស់វានៅឡើយទេ ប៉ុន្តែគេដឹងថាវាមិនមានបំពាក់កាមេរ៉ាមេទំហំ ១០៨MP នោះទេ ដោយកាមេរ៉ានេះនឹងមានសម្រាប់តែ Galaxy Note20+ ប៉ុណ្ណោះ។

ក្រោយពីរូបភាព Render ពីរខាងលើបានចេញផ្សាយក៏មានអ្នកបង្កើតនូវរូបភាព Render ច្បាស់មួយទៀត ដែលបង្ហាញអំពីរចនាបថកាមេរ៉ាលើ Galaxy Note20 ផងដែរ។