កូវីដ-១៩ ប្រល័យជីវិត អតីតចុងភៅធ្វើការនៅសេតវិមាន ជាង ៥០ឆ្នាំ

2020-05-24 00:08:58
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតចុងភៅនៃសេតវិមាន ធ្វើការឲ្យប្រធានាធិបតីចំនួន ១១រូប លោក Wilson Roosevelt Jermen បានបាត់បង់ជីវិត ដោយសារតែជំងឺកូវីដ-១៩ កាលពីសប្ដាហ៍មុននេះ ក្នុងជន្មាយុ ៩១ឆ្នាំ។

លោកបានបំពេញការងារដំបូងជាអ្នកបោសសម្អាតនៅសេតវិមានកាលពីឆ្នាំ១៩៥៧ តែនៅអាណត្តិលោក John F. Kennedy លោកជំទាវទី១ Jackie បានតែងតាំងលោកជាចុងភៅ។

បើតាមសំដីចៅស្រីរបស់លោក តាមពិតអាយុលោកត្រូវចូលនិវត្តកាលពីឆ្នាំ១៩៩៧ តែលោកត្រលប់មកបម្រើការងារនៅសេតវិមានវិញ កាលពីឆ្នាំ២០០៣ ហើយបានចាកចេញកាលពីឆ្នាំ២០១២ ក្នុងឋានៈជាអ្នកចាត់ការទូទៅនៃសេតវិមាន (maître d') ។ នៅពេលលោកចាកចេញទៅ លោកទទួលបានមេដាយ និងរង្វាន់ជាច្រើនពីលោកប្រធានាធិបតី Barack Obama។

ចៅស្រីរបស់លោក យល់ឃើញថា លោកជាមនុស្សឯករាជ្យមួយ ដោយមិនប្រកាន់អ្នកមកពីគណបក្សសាធារណរដ្ឋ ឬ គណបក្សប្រជាធិបតេយ្យឡើយ។

ក្រោយពីឮដំណឹងមរណភាពរបស់លោក អតីតលោកជំទាវទី១ Michelle Obama បានចូលរួមរំលែកទុក្ខ ដោយបានថា គ្រួសារលោកស្រីមានសំណាងណាស់ ដែលបានគាត់មកបម្រើការ។ ក្រៅពីនេះ អតីតជំទាវទី១ Hillary Clinton ក៏ដូចជាកូនស្រីរបស់លោកប្រធានាធិបតី George W. Bush ក៏បានចូលរួមរំលែកទុក្ខដូចគ្នាដែរ៕