សិល្បកររាងសង្ហា១២ រូប ត្រៀមខ្លួនហាត់ល្ខោនខោលខ្មែរ នៅចុងសប្ដាហ៍នេះ

2020-06-02 06:53:58
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង និងដើរម៉ូដខ្មែរចំនួន១២រូប នឹងចូលរួមហាត់ និងអបអរសាទរក្នុងព្រឹត្តិការណ៍សម្ដែងល្ខោនខោលដ៏អស្ចារ្យឆ្នាំ២០២០ នៅរសៀលថ្ងៃទី៧ ខែមិថុនា នាពហុកីឡាដ្ឋានជាតិស្ដាតចាស់។

សិល្បករទាំងនោះរួមមាន៖ លោក អ៊ុន សិទ្ធា លោក សន ពិសិដ្ឋ លោក ឌី វ៉ាន់ដា លោក រស រាជ្ជសាល លោក ពង្ស ពុទ្ធិស័ក្ដ លោក ហៃ ប៉ោហុង លោក Thean Frshie លោក ចន ស័ក្ដ លោក ចន្ថា ដារ៉ា លោក នូ ឧសភា លោក ទី ទុំ ហៅនេនទុំ និងលោក ចន ស័ក្ដ។

តារាសម្ដែងសម្បូរសាច់ដុំ សន ពិសិដ្ឋ និយាយថា រូបលោកក៏ដូចជាសិល្បករផ្សេងទៀត មានសេចក្ដីរីករាយ និងត្រៀមខ្លួនចូលរួមក្នុងព្រឹត្តិការណ៍ដ៏អស្ចារ្យនេះ។ លោកពេញចិត្ត នឹងអ្វីដែលខ្លួនចាប់ផ្ដើមធ្វើនៅពេលនេះ ហើយសង្ឃឹមថាវាជាផ្នែកមួយជួយអភិរក្ស គាំទ្រ ថែរក្សា និងផ្សព្វផ្សាយសិល្បៈខ្មែរមួយប្រភេទនេះឲ្យកាន់តែល្បីសុះសាយ៖"ខ្ញុំនឹងទៅហាត់ល្ខោនខោលដែលជាមរតកសិល្បៈខ្មែរ"។

តាមគម្រោងរបស់ក្រុមការងាររៀបចំព្រឹត្តិការណ៍សម្ដែងល្ខោនខោលដ៏អស្ចារ្យឆ្នាំ២០២០ នឹងបើកឲ្យមហាជនចូលរួមទស្សនា និងហាត់រៀនដោយសេរីចាប់ពីម៉ោង១រសៀល រហូតដល់ម៉ោង៧យប់ នៅថ្ងៃទី៧ ខែមិថុនា ឆ្នាំ២០២០។

ព្រឹត្តិការណ៍ហាត់រៀន និងសម្ដែងល្ខោនខោលនេះ គឺធ្វើឡើងក្នុងគោលបំណងសំខាន់ៗដូចជា៖ ទាញចំណាប់អារម្មណ៍មហាជនឲ្យយល់ដឹងពីល្ខោនខោលខ្មែរ ផ្ដល់ឱកាសដល់បុគ្គលល្បីៗបានចូលរួមលើកកម្ពស់ល្ខោនខោល និងដើម្បីឲ្យតារាសម្ដែងបានដឹងពីបញ្ហាប្រឈមពិតប្រាកដរបស់ល្ខោនខោលខ្មែរ ព្រមទាំងបើកឱកាសឲ្យមហាជនចូលរួមបរិច្ចាគថវិកាតាមលទ្ធភាព ដើម្បីគាំទ្រដល់ព្រឹត្តិការណ៍សម្ដែងល្ខោនខោលឆ្នាំនេះបន្ថែមទៀត៕

អត្ថបទ៖ ជិន សុភ័ក្ដ្រ