ក្រុមហ៊ុនមួយផលិតបានសម្រេចនូវកាមេរ៉ា Selfie បង្កប់ខ្លួនលើអេក្រង់
- 2020-06-09 01:40:48
- ចំនួនមតិ 0 | ចំនួនចែករំលែក 0
ក្រុមហ៊ុនមួយផលិតបានសម្រេចនូវកាមេរ៉ា Selfie បង្កប់ខ្លួនលើអេក្រង់
ចន្លោះមិនឃើញ
Visionox ជាក្រុមហ៊ុនផលិតកញ្ចក់ OLED ធំមួយនៅក្នុងប្រទេសចិន មានផ្គត់ផ្គង់អេក្រង់ដល់ស្មាតហ្វូន Flagship ដូចជា Xiaomi Mi 10 និង Mi Note 10។ នាពេលនេះសារព័ត៌មានចិនបានចុះផ្សាយថា ក្រុមហ៊ុនបានត្រៀមខ្លួនរួចជាស្រេចក្នុងការផលិតជាលក្ខណៈទ្រង់ទ្រាយធំ នូវអេក្រង់ដែលមានបង្កប់កាមេរ៉ាពីក្រោម។
វាមិនមែនជាបច្ចេកវិទ្យាថ្មីនោះទេ ដោយ OPPO ធ្លាប់បានបង្ហាញបច្ចេកវិទ្យាបែបនេះនៅក្នុងកម្មវិធី MWC Shanghai ឆ្នាំ ២០១៩ រួចមកហើយ។ នាពេលនោះ OPPO បានឲ្យដឹងថា ក្រុមហ៊ុនផលិតបន្ទះអេក្រង់ត្រូវដោះស្រាយបញ្ហាលើកម្រិតពន្លឺ និងពណ៌ខុសគ្នា ដែលកើតមានដោយសារកាមេរ៉ាបង្កប់ក្រោមអេក្រង់នេះ។
Visionox អះអាងថាបញ្ហានេះអាចដោះស្រាយបានដោយប្រើហ្វីលពីរប្រភេទផ្សេងគ្នាសម្រាប់ដាក់ពីលើអេក្រង់ និងពីលើកាមេរ៉ា ដែលវាអាចឆ្លុះពន្លឺបានក្នុងកម្រិតខុសគ្នា បង្កើតឲ្យមានការបាញ់ចេញពន្លឺរួមស្មើគ្នា។ បន្ថែមពីនេះគេក៏ត្រូវការជំនួយពីផ្នែក Software ដើម្បីជួយដោះស្រាយបញ្ហាពន្លឺ, កម្រិតពណ៌ និងបំបាត់ចោលឲ្យបាននូវចំណាំងប្លាតដែលឃើញមានលើផលិតផលគំរូរបស់ OPPO ដែលបង្ហាញកាលពីឆ្នាំ ២០១៩។
ក្រុមហ៊ុនចិនខាងលើក៏បានបំបាត់នូវបញ្ហាទាក់ទងនឹងការថយចុះគុណភាពរូបភាពពេលថតចេញពីអេក្រង់ផងដែរ ដែលអាចឲ្យក្រុមហ៊ុនត្រៀមខ្លួនជាស្រេចក្នុងការផលិតអេក្រង់ប្រភេទនេះជាលក្ខណៈទ្រង់ទ្រាយធំ។ ជំហានចុងក្រោយមុននឹងឃើញវត្តមានអេក្រង់នេះលើស្មាតហ្វូនដែលលក់លើទីផ្សារ គឺអាស្រ័យលើការសម្រេចចិត្តរបស់ក្រុមហ៊ុនផលិតទូរសព្ទ។
គេរំពឹងថាស្មាតហ្វូនដែលមានបង្កប់កាមេរ៉ា Selfie ក្រោមអេក្រង់អាចនឹងបង្ហាញរូបរាងសាកល្បងនៅមុនដំណាច់ឆ្នាំនេះ ហើយមានការប្រកាសចេញជាផ្លូវការនៅត្រីមាសទី ១ ឆ្នាំ ២០២១ អាចនៅក្នុងកម្មវិធី CES ឬ MWC ក៏ថាបាន៕