ឡូយតើ! ខូវីដ១៩បើកផ្លូវ លាង ឧត្តម បើកទីផ្សារដែរ ក្រោយសម្ងំចាយលុយចាស់ចង់ដាច់ស្តុក

2020-09-22 08:17:53
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពី ខូវីដ ១៩ យាយីធ្វើឲ្យផ្អាកដំណើរការអាជីវកម្មនានា ធ្វើឲ្យប៉ះពាល់ដល់សេដ្ឋកិច្ចមិនថាសាមញ្ញជន ឬសិល្បករនោះ ឥឡូវនេះលោក លាង ឧត្តម បានបើកទីផ្សារថ្មីដែរហើយ ក្រោយការយាយីក្នុងស្រុកហាក់ត្រូវគ្រប់គ្រងបាន។

ឧត្ដម បានឲ្យដឹងថា ដូចគ្នាសិល្បករដទៃទៀតដែរ ដែលបានជួបប្រទះការលំបាកខាងផ្នែកសេដ្ឋកិច្ចអំឡុងខូវីដ១៩ គំរាមកំហែងខ្លាំងកាលពីប៉ុន្មានខែមុននោះ គឺលោកបានស្ថិតក្នុងសភាពស្ងាត់ឈឹង ស្របពេលការងារសិល្បៈទាំងឡាយត្រូវផ្អាកទាំងអស់ ធ្វើឲ្យដង្ហើមសេដ្ឋកិច្ចក៏ស្ទើរតែស្ទះដែរ។ “កាលមុនខូវីដ ការងារច្រើនដែរហ្នឹង គ្រាន់តែ ខូវីដ មកដល់ អាចាស់ផ្អាកអស់ អាថ្មីស្ងាត់ឈឹង ដល់អីចឹងមានអី មានតែដេកចាយលុយអាចាស់ហ្នឹងបង!”។

តារាប្រុសបានបញ្ជាក់ថា លោកបានយកប្រាក់ដែលបានសន្សំពីការងារចាស់ មកដោះស្រាយភាពទីទ័ល ហើយលុយនោះ ក៏របេះចង់អស់ដែរ។ លោកថា ប្រសិនបើអ្វីៗនៅតែមិនប្រសើរលោក ទំនងជាកាន់តែយ៉ាប់ជាងនេះ ស្របពេលដែលលោកមិនមានចំណូលអ្វីផ្សេងក្រៅពីការងារសិល្បៈនេះឡើយ។

យ៉ាងណាក៏ដោយ គិតមកត្រឹមពេលនេះ ការយាយីរបស់មេរោគសាហាវ ខូវីដ១៩ ត្រូវបានរាជរដ្ឋាភិបាលគ្រប់គ្រងបាន ។ គិតត្រឹមព្រឹក ថ្ងៃទី២២ ខែកញ្ញា ឆ្នាំ២០២០ នេះ ក្រសួងសុខាភិបាល បានអោយដឹងថា គ្មានករណីឆ្លងថ្មី ជំងឺកូវីដ១៩ ក្នុងប្រទេសកម្ពុជានោះទេ។ សព្វថ្ងៃនេះ កម្ពុជាមានអ្នកជំងឺកូវីដ១៩ តែម្នាក់ប៉ុណ្ណោះ ដែលបាន និងកំពុងសម្រាកព្យាបាល នៅក្នុងមន្ទីពេទ្យ មិត្តភាព ខ្មែរ-សូវៀត ហើយនោះជាករណីនាំចូល។

អំណោយផលពីការថមថយការគំរាមកំហែង ការងារសិល្បៈក៏វិលមកវិញ។ ឧត្ដម ប្រាប់ថា គ្រាន់ស្ថានភាពវិលមកល្អប្រសើរបន្តិចម្ដងៗ លោកក៏ចាប់ផ្ដើមបើកទីផ្សារវិញដែរ ដោយពេលនេះ លោក បាន និងកំពុងត្រៀមថតរឿងចំនួន២អោយទូរទស្សន៍ក្នុងស្រុក២ដែរ នោះគឺស្ថានីយទូរទស្សន៍ហង្សមាស "ខោល" និងរឿង "ធុងពេជ្រ" របស់ទូរទស្សន៍ប៉ុស្តិ៍លេខ ៥។ ក្រៅពីនេះ ក៏មានខ្សែរឿងខ្លះទៀត ក៏បានទាក់ទងលោកដែរ ដោយអ្វីៗកំពុងស្ថិតក្នុងការចរចាលក្ខខណ្ឌការងារជាមួយគ្នា។

លាង ឧត្តម ស្លៀកឯកសណ្ឋានប៉ូលីសក្នុងសាច់រឿង

តារាពេញនិយមសម្រាប់ភាពយន្ត បញ្ជាក់ថា លោកនឹងប្រឹងប្រែងរកប្រាក់ពីការងារសិល្បៈយកមកសន្សំបង្គ្រប់នូវអ្វីដែលបានដកចាយអំឡុងពេលសម្រាកពីការងារវិញ ព្រោះថា កញ្ចប់ថវិកាសន្សំដែលលោកមិនបានបញ្ចេញតួលេខលម្អិតនោះ គឺលោកមានបំណងយកទៅវិនិយោគលើអាជីវកម្មមួយ។ យ៉ាងណា សាមីខ្លួនក៏មិនបានបញ្ចេញឲ្យដឹងច្បាស់ទេថា លោកកំពុងគិតគម្រោងរកស៊ីអ្វីផ្សេងក្រៅពីការងារសិល្បៈ ខណៈកន្លងមក លោកក៏ធ្លាប់គេដឹងថា ធ្លាប់បើកអាជីវកម្មលក់ដូរទូរស័ព្ទនៅជម្ពូវ័ន្តដែរ៕