វ៉េត សុវណ្ណនាថ លេងឡើងខ្លាំងបំផុតគឺនៅអំឡុងឆ្នាំ២០១៣ បន្ទាប់ពីគេប្រឡង​បាក់ឌុបរួច ហើយ​អេគីប​បីរបស់គេមានម៉ាប់ឆ្វេង ថនប៉ះសេ និងរូបគេផ្ទាល់។

កីឡាកររហស្សនាមប្ដូរចង្កេះលើអកាស បានទម្លាយឱ្យដឹងថាអំឡុងពេលនោះ គេធ្លាប់តឱ្យលោកគ្រូ សោម ចំណាប់ ៣ ទល់ ៦នាក់ ដោយការប្រកួតមិត្តភាពក្រៅផ្លូវការនេះធ្វើឡើងនៅប៉ោយប៉ែត។ សិតទីមួយក្រុមសុវណ្ណនាថចាញ់ ប៉ុន្តែសិតទីពីរក្រុមរបស់លោកគ្រូចំណាប់ បានភ្លាត់ស្នៀតចាញ់ម្ដងវិញ ក្នុងលទ្ធផលពិន្ទុ ១៦-១៨។

បើតាមការបញ្ជាក់ពី សុវណ្ណនាថ នោះគឺជាការប្រកួតដ៏ស្វិតស្វាញ​ទីមួយ។ ក្រៅពីនេះដៃគូដ៏ល្អរបស់ម៉ាប់ឆ្វេង បានបង្ហើបឱ្យដឹងពីការប្រកួតមួយទៀត​ គឺលេងជាមួយទូចអង្គរក្សបីស្មើពេញសាច់ដូចគ្នា។ ការប្រកួតធ្វើឡើងនៅភ្នំពេញ។

វ៉េត សុវណ្ណនាថ បានបញ្ជាក់ថា ៖«លេងជាមួយបងទូច កាលហ្នឹងគាត់ពេញឡេីង​ ឈ្នះចាញ់ឈ្នះចាញ់ សុីគ្នាមិនដាច់ទេ»។

ការប្រកួតជាមួយទូចអង្គរក្សនេះដែរ សុវណ្ណនាថ ប្រើអេគីបដដែលគឺមានម៉ាប់ឆ្វេង និងថនប៉ះសេ ហើយពួកគេឈ្នះម្នាក់មួយសិត ដោយមួយសិតៗមានរយៈពេលយូរ។ ចំពោះលទ្ធផល​វិញ បើទោះការប្រកួតបញ្ចប់យូរ​ហើយក្ដី ប៉ុន្តែសុវណ្ណនាថថាបើតាមចាំសិតចុងទីពីរ ក្រុមរបស់គេបានយកឈ្នះក្រុមទូចអង្គរក្សដែលមាន ទុក, ឆាស៊ី ក្នុងលទ្ធផលពិន្ទុ ១៨ ទល់ ២០៕

អត្ថបទ៖ អ៊ុំ សុភក្តិ