លោក តាន់ គឹមសួរ ដែល​គេ​ឃើញ​​ចូល​រួម​ធ្វើ​កិច្ចការ​សង្គម​ហូរហែ​មក​នោះ ឥឡូវ​​នេះ​បាន​ផ្ដួចផ្ដើម​គំនិតចូល​រួម​សង្គម​ថ្មី​ទៀត ដោយ​បាន​កៀរគរ​សិល្បករ​ខ្មែរ​ល្បី​ៗ រៀប​ចំ “ព្រឹត្តិការណ៍​បៃតង​សង្ក្រាន្ត” ដើម្បី​រួម​ចំណែក​លើក​ស្ទួយវប្បធម៌ និង​អភិរក្ស​ព្រៃឈើ។

តាម​សន្នីសីទ​សារព័ត៌មាន​កាល​ពី​ចុង​សប្ដាហ៍​ ធ្វើ​ឡើង ក្នុង​ន័យ​ចូលរួម​អបអរសាទរ​ពិធី​បុណ្យ​ចូល​ឆ្នាំ​ថ្មី ប្រពៃណី​ជាតិ​ខ្មែរ​របស់​យើង​ផង។ ព្រឹត្តិការណ៍នេះ នឹងប្រព្រឹត្តទៅមួយសប្ដាហ៍ មុនពិធីបុណ្យចូលឆ្នាំថ្មីប្រពៃណីជាតិចាប់​ផ្ដើម ពោលគឺថ្ងៃទី៩ ដល់ថ្ងៃទី១១ ខែមេសា ឆ្នាំ២០២១ ខាង​មុខ​នេះ​នៅ​ឯ​ទំនប់​ពាមល្វា ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ។

លោក តាន់ គឹមសួរ ប្រធានគម្រោង “ព្រឹត្តិការណ៍បៃតងសង្ក្រាន្ត” មានប្រសាសន៍ថា ការថែរក្សាអត្តសញ្ញាណ​និង​ដួងព្រលឹងជាតិ​ខ្មែរ គឺជាកាតព្វកិច្ចរបស់មនុស្សខ្មែរគ្រប់រូប។ ព្រឹត្តិការណ៍បៃតងសង្ក្រាន្ត គឺជាចលនាមួយនៃការផ្សាភ្ជាប់រវាងមនុស្ស និងមនុស្ស មនុស្ស និងធម្មជាតិ មនុស្ស និងសិល្បៈ វប្បធម៌ ទំនៀមទម្លាប់ ប្រពៃណីខ្មែរ និងបណ្ដុះមនសិការយុវជនឱ្យចេះស្រឡាញ់ អភិរក្ស ថែរក្សា និងអភិវឌ្ឍន៍ សម្បត្តិធម្មជាតិ មរតកវប្បធម៌ជាតិ។ ព្រឹត្តិការណ៍បៃតងសង្ក្រាន្តនេះបានរួមចំណែកយ៉ាងសំខាន់ក្រោមហេតុផលជាច្រើនដូចជា៖​

• ទី១ ជាចំណែកមួយនៃការលើកស្ទួយវិស័យវប្បធម៌ខ្មែរយើង គាស់កកាយឡើងវិញនូវវប្បធម៌ដែលមិនសូវមានអ្នកស្គាល់
• ទី២ ជាចំណែកមួយនៃការបំផុសបំផុលឲ្យប្រជាជនយើងមានការយល់ដឹងអំពីសារប្រយោជន៍នៃព្រៃឈើ និងឈានឆ្ពោះទៅដល់ការកាត់បន្ថយនិងបញ្ឍប់ការកាប់បំផ្លាញព្រៃឈើនិងសម្លាប់សត្វព្រៃ។
• ទី៣ បង្កើនចំណូលដល់ប្រជាជននៅតំបន់ដែលកំពុងតែមានការកាប់ទន្ទ្រានព្រៃយ៉ាងអនាធិបតេយ្យ

កញ្ញា សាធ សូរ្យដានី អ្នកសម្របសម្រួលទូទៅ ព្រឹត្តិការណ៍បៃតងសង្ក្រាន្ត មានប្រសាសន៍បន្ថែមថា លើសពីនេះទៅទៀត ព្រឹត្តិការណ៍បៃតងសង្ក្រាន្ត ក៏នឹង​រួមចំណែកក្នុងការលើកកម្ពស់ស្ត្រី និងកុមារកម្ពុជា ក្នុងការចូលរួមការងារសង្គម លើកស្ទួយវប្បធម៌ និងអភិរក្សព្រៃឈើកម្ពុជាថែម​ទៀត។

គួរបញ្ជាក់ថា ព្រឹត្តិការណ៍បៃតងសង្ក្រាន្តនេះត្រូវបានដឹកនាំនិងរៀបចំឡើងដោយយុវជនស័្មគ្រចិត្តជួយសង្គម បៃតងវ៉ររៀរស៍ ហើយនេះមិនមែនជាកម្មវិធីទីមួយដែលយុវជនស័្មគ្រចិត្តជួយសង្គម បៃតងវ៉ររៀរស៍ បានរៀបចំឡើងនោះទេ គឺកម្មវិធីធំៗត្រូវបានរៀបចំឡើងជារៀងរាល់ឆ្នាំដើម្បីរួមចំណែកចំបងក្នុងការជួយទប់ស្កាត់ការកាប់បំផ្លាញព្រៃឈើ ស្ដារព្រៃឈើឡើងវិញ លើកស្ទួយវប្បធម៌ខ្មែរ ក៏ដូចជាការងារមនុស្សធម៌ដើម្បីជួយសង្គមផ្សេងៗទៀតដែរ។ ពោលកម្មវិធីធំៗប្រចាំឆ្នាំដែលបៃតងវ៉ររៀរស៍បានរៀបចំឡើងមានដូចជា៖

“កម្មវិធីប្រគំតន្ត្រីបៃតង” ធ្វើ​ឡើង​ក្នុងបុព្វហេតុការពារ អភិរក្សព្រៃឈើក្នុងដែនជម្រកសត្វព្រៃ «ភ្នំត្នោត-ភ្នំពក» ស្ថិតនៅ ខេត្តព្រះវិហារ។ កម្មវិធីដាំកូនឈើចំនួន (១០ម៉ឺន) ១០០,០០០ដើម ក្រោមប្រធានបទ «រួមគ្នាព្យាបាលដំបៅផែនដី» និង​សកម្មភាព ដឹកនាំការផលិតបាននូវជែលលាងដៃកម្ចាត់មេរោគជិត២០០,០០ដប និងម៉ាសចំនួន ៥០,000សន្លឹក ដើម្បីចែកជូនប្រជាជនយើងទូទាំងប្រទេសបញ្ចៀស​ ក៏​ដូច​ជា​ការពារ​ខ្លួន​ពី Covid-19 ជា​ដើម។

សកម្មភាព​នីមួយ​ៗ​របស់​ក្រុម​យុវជន​ខាង​លើ រមែង​មាន​ការ​ចូល​រួម​កុះករ​ដោយ​ក្រុម​សិល្បករ​ខ្មែរ​ល្បី​ៗ​ជា​ច្រើន៕

អត្ថបទ៖ ទារិកា