ស្ថាបនិកពុម្ពអក្សរខ្មែរយូនីកូដថាស្នាដៃ “កម្មវិធីត្រួតពិនិត្យអក្ខរាវិរុទ្ធខ្មែរ” មានគូប្រជែងថ្មីហើយ

2021-03-22 03:01:05
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះលោក ដាញ់ ហុង បានចេញមុខលើប្រធានបទ“កម្មវិធីត្រួតពិនិត្យអក្ខរាវិរុទ្ធខ្មែរ” ដោយបង្ហោះលើគណនីផ្ទាល់ខ្លួនថាស្នាដៃរបស់លោកមានគូប្រជែងថ្មីហើយ។

លោកលើកឡើងបែបនេះ បន្ទាប់ពីក្រសួងប្រៃសណីយ៍និងទូរគមនាគមន៍ សហការជាមួយក្រុមហ៊ុន Microsoft ចាប់ដៃគ្នាអភិវឌ្ឍឡើងនូវកម្មវិធីវាយអត្ថបទជាអក្សរខ្មែររហ័សឲ្យឈ្មោះថា (Khmer Fastype Tool) ដើម្បីសម្រួលដល់ការសរសេរអត្ថបទជាភាសាខ្មែរក្នុងកម្មវិធី Microsoft Office ព្រមជាមួយនឹងគម្រោងដែលភាគីទាំងពីរកំពុងសិក្សាពីលទ្ធភាពក្នុងការបញ្ចូល តួនាទីត្រួតពិនិត្យអក្ខរាវិរុទ្ធ (Spelling Check) ជាភាសាខ្មែរ ក្នុងកម្មវិធី Microsoft Office ផងដែរនៅជំហានបន្ទាប់ តែពេលនេះមិនទាន់ចេញផ្លូវការទេ។

ដូច្នេះ ប្រសិនណាបើជោគជ័យអាចប្រើប្រាស់បាន មានន័យថា កម្មវិធីត្រួតពិនិត្យអក្ខរាវិរុទ្ធខ្មែរ នឹងមាននៅលើកម្មវិធី Office លើកដំបូងបំផុតនៅពេលវាយអត្ថបទ ដែលពីមុនមកមានតែភាសាសាសន៍ដទៃប៉ុណ្ណោះ។ ឧទាហរណ៍៖ ភាសាអង់គ្លេស។ល។

ដាញ់ ហុង ស្ថាបនិកពុម្ពអក្សរខ្មែរយូនីកូដ

ចំណែកឯស្នាដៃស្រដៀងគ្នានេះរបស់លោក ដាញ់ ហុង ឈ្មោះថា [nexspell](http://api.nextspell.com/?fbclid=IwAR1AfIZGTInNdJj1vPMZ-GQ70WeeR0V8gwvrwcCEaqf9f-LNJgjfhwN3Ks0) **កម្មវិធីអក្ខរាវិរុទ្ធខ្មែរ ORC** មាននាទីជាកម្មវិធីត្រួតពិនិត្យអក្ខរាវិរុទ្ធខ្មែរដូចគ្នាដែរនោះ ប្រាកដជានឹងក្លាយជា គូប្រជែងមួយថ្មី។ នៅលើ nexspell មានមុខងារអាចកែដោយស្វ័យប្រវត្តិ ចំពោះកំហុសដែលកើតឡើងញឹកញាប់។ បញ្ជាក់៖ កម្មវិធីរបស់លោក ដាញ់ ហុង ជាវិបសាយមួយដាច់ផ្សេងដែលអ្នកអាចចូលទៅប្រើប្រាស់បានដោយមិនគិតថ្លៃទេ ប៉ុន្តែវាមិននៅក្នុងកម្មវិធី MS office នោះទេ។

លោក ដាញ់ ហុង ដូចដែលអ្នកទាំងអស់គ្នាបានស្គាល់តាមរយៈស្នាដៃបង្កើតពុម្ពអក្សរខ្មែរយូនីកូដ ជាអ្នកផ្តួចផ្តើមគំនិតក៏ដូចជាចូលរួមបង្កើតកម្មវិធីអក្ខរាវិរុទ្ធខ្មែរ ORC ឬ “កម្មវិធីត្រួតពិនិត្យវេយ្យាករណ៍ខ្មែរ”* ដោយបានប្រឹងប្រែងបង្កើតជាយូរឆ្នាំហើយ។

គោលបំណងរបស់លោកគឺចង់ឲ្យមាន Khmer Grammatical នៅពេលវាយអត្ថបទដើម្បីឲ្យប្រព័ន្ធអាចចងចាំពាក្យត្រូវ ឬខុសទៅតាមឯកសារយោងក្នុងវចនានុក្រមសម្ដេចព្រះសង្ឃរាជ ជួន ណាត។

ជម្រាបជូនផងដែរថា កិច្ចព្រមព្រៀងលើកិច្ចសហប្រតិបត្តិការរវាងក្រសួងប្រៃសណីយ៍និងទូរគមនាគមន៍ និងក្រុមហ៊ុន Brite Digital ក្នុងការអភិវឌ្ឃន៍ Software ”កម្មវិធីវាយអត្ថបទជាអក្សរខ្មែររហ័ស”។ បន្ទាប់ពីបញ្ចប់ការអភិវឌ្ឍរួចរាល់ហើយនោះអ្នកប្រើប្រាស់អាចតំឡើងកម្មវិធីនេះជាអនុកម្មវិធីនៅក្នុង Microsoft Office ដើម្បីជាជំនួយដល់ការសរសេរអត្ថបទភាសាខ្មែរក្នុងកិច្ចការរដ្ឋបាលប្រចាំខែឲ្យកាន់តែមានភាពត្រឹមត្រូវ ឆាប់រហ័ស ចំណេញពេលវេលាច្រើន តាមរយៈការប្រើបច្ចេកវិទ្យាបញ្ញាសិប្បនិម្មិត (AI) ដោយអាចស្នើពាក្យ ឬឃ្លាបន្ទាប់ដែលធ្លាប់បានប្រើប្រាស់ច្រើនកន្លងមក៕