សហព័ន្ធកីឡាកាយសម្ព័ន្ធកម្ពុជា៖ ស៊ីហ្គេម ឆ្នាំនេះនឹងបញ្ជូនកីឡាករ កីឡាការិនី ៦រូប

2021-05-19 04:18:28
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ណយ ផាន់ណា ថាស៊ីហ្គេម ចុងឆ្នាំនៅវៀតណាម សហព័ន្ធកីឡាកាយសម្ព័ន្ធកម្ពុជានឹងបញ្ជូនកីឡាករ កីឡាការិនី ៦រូប ដើម្បីប្រជែងមេដាយជូនកម្ពុជា។

លោក ណយ ផាន់ណា

លោក ណយ ផាន់ណា ដែលជាអគ្គលេខាធិការសហព័ន្ធខាងលើបានឲ្យដឹងថា ចំនួនកីឡាករ កីឡាការិនី ដែលនឹងបញ្ជូនទៅ ស៊ីហ្គេម ឆ្នាំនេះគឺរៀបចំរួចហើយសរុបរួមមាន ៦រូប ផ្នែកបុរស ៤រូប និងនារី ២រូប។

អ្នកជំនាញកាយសម្ព័ន្ធរូបនេះបន្ថែមទៀតថា ការបញ្ជូនទៅនេះបែងចែកជាពីរ ទី១ ផ្នែក Aerobic មាន៥រូប កីឡាករ ៣រូប និងកីឡាការិនី ២រូប។ ចំណែកផ្នែក Artistic គឺបញ្ជូនកីឡាករ ១រូបផងដែរ។ ទាក់ទងទៅនិងការត្រៀមប្រកួតនេះដែរ សហព័ន្ធបានជួលគ្រូម្នាក់ពីប្រទេសរុស្សី ដើម្បីមកបង្ហាត់បច្ចេកទេសកម្រិតខ្ពស់លើផ្នែក Aerobic ប៉ុន្តែដោយសារផ្ទុះកូវីដ ទើបគ្រូរូបនោះមិនទាន់អាចមកកម្ពុជាបាននៅពេលនេះ។ គម្រោងបង្ហាត់ទៀតសោតគឺរយៈពេលវែងដល់ឆ្នាំ ២០២៣ ឯណោះ។

កីឡាករផ្នែក Artistic

អគ្គលេខាធិការខាងលើក៏បង្ហាញក្ដីបារម្ភមួយចំនួនដែរនៅស៊ីហ្គេម លើកទី៣១ ខាងមុខ ព្រោះវេលាចេះតែកៀកទៅហើយ ខណៈការហ្វឹកហាត់មានផលលំបាកដោយសារផ្ទុះកូវីដអំឡុងពេលនេះ។ កីឡាករ កីឡាការិនី ត្រូវហ្វឹកហាត់នៅផ្ទះរៀងខ្លួន មិនអាចប្រមូលផ្ដុំដែលទាំងនេះហើយជាការលំបាកមួយ ប៉ុន្តែលោកក៏ដូចជាសហព័ន្ធប្រឹងប្រែងចូលរួមជាមួយរាជរដ្ឋាភិបាលក្នុងការទប់ស្កាត់ការរីករាលដាលជំងឺកាចសាហាវនេះផងដែរ។

កីឡាករផ្នែក Aerobic

រំលឹកដែរថា ស៊ីហ្គេម លើកទី៣១ ចុងឆ្នាំ ២០២១ នេះនឹងត្រូវធ្វើឡើងនៅឯប្រទេសវៀតណាម។ ចំពោះប្រទេសកម្ពុជា នឹងបញ្ជូន ៣២ប្រភេទកីឡាទៅចូលរួមដើម្បីប្រជែងមេដាយក្នុងព្រឹត្តិការណ៍កម្រិតអាស៊ានមួយនេះ៕

អត្ថបទ៖ នួន ស៊ីណា