Big Hit មិនប្រាប់ តែ Ed Sheeran ទម្លាយទាល់តែបានថាបទថ្មីរបស់ BTS ដឹងតែញាក់ផ្ដាំចាស់

2021-06-29 02:15:59
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង និងជាអ្នកនិពន្ធបទចម្រៀងដ៏មានទេពកោសល្យ Ed Sheeran ទើបតែបានទម្លាយពីបទថ្មីដែលលោកសរសេរសម្រាប់ BTS។

រំលងមិនយូរប៉ុន្មានពេល Ed Sheeran បង្ហើបក្នុងកម្មវិធី Most Requested Live ថាលោកបានសរសេរបទចម្រៀងសម្រាប់ BTS រួច ពេលនេះក៏ស្រាប់តែមានការភ្ញាក់ផ្អើលជាថ្មី ក្រោយតារាប្រុសរូបនេះទម្លាយព័ត៌មានមួយចំនួនដែលអ្នកគាំទ្រជាច្រើននាក់អន្ទះសារចង់ដឹង។

ពិតណាស់ផលិតកម្ម Big Hit Music ក៏បានបញ្ជាក់ប្រាប់វិបសាយ Newsen ដែរថា Ed Sheeran បានចូលរួមធ្វើបទថ្មីៗសម្រាប់ BTS ប៉ុន្តែមិនបានបកស្រាយក្បោះក្បាយទៅតាមអ្វីដែល Fan រំពឹងទេ។

ជាក់ស្ដែងកាលពីថ្ងៃទី២៨ ខែមិថុនា Ed Sheeran ក៏បានឆ្លើយសំណួរ Fan ជាច្រើនដែលបានសួរមកលោក ដោយចិត្តល្អ។ ក្នុងចំណោមសំណួរទាំងនោះ មានខ្លះសួរបញ្ជាក់ថាលោកពិតជាបានរួមការងារជាមួយ BTS មែនឬអត់? Ed តបថា៖ «ហ្នឹងហើយ! ប្រាកដមែន បទថ្មីជិតចេញហើយ»។

សំណួរបន្ទាប់ «តើបទរបស់ BTS មួយណាដែលអ្នកចូលចិត្ត?» Edឆ្លើយថា «ខ្ញុំចង់និយាយថា របស់ BTS ដែលខ្ញុំស្រឡាញ់ជាងគេ គឺបទថ្មី “Permission to Dance” ខ្ញុំជឿថា នេះគឺជាបទទោលថ្មីរបស់ពួកគេ ហើយជាបទញាក់សាហាវ»។

ភ្លាមៗ ដោយសារសន្ធឹកនៃក្ដីរំភើប អ្នកគាំទ្រក៏បាននាំគ្នាបង្ហោះ Post ហូរហែភ្ជាប់ជាមួយនឹងពាក្យ «PERMISSION TO DANCE IS COMING» ពេញ Twitter។

ងាកចូល Ed វិញ ពេលគេសួរថា តើសមាជិករូបណាដែលលោកពេញចិត្តជាងគេ? សាមីខ្លួនតបថា៖ «បាទ! ពួកគេទាំងអស់សុទ្ធតែ ឡូយៗម្យ៉ាងៗម្នាក់ ខ្ញុំមិនអាចនិយាយថាអ្នកណាឡូយជាងអ្នកណាទេ! ខ្ញុំគិតថាពួកគេសុទ្ធតែអស្ចារ្យទាំងអស់គ្នា»៕