នៅក្រោយភាពល្បីល្បាញរបស់ Tik Tok បច្ចុប្បន្ន ដឹងទេអ្នកណាបង្កើតឡើង និងមានប្រភពពីណា?

2021-07-27 07:37:22
ចំនួនមតិ 0 | ចំនួនចែករំលែក 0

ចន្លោះមិនឃើញ

Tik Tok ឬឲ្យឈ្មោះម្យ៉ាងទៀត Douyin ជាកម្មវិធីមាតិកាចម្រៀងនិងបណ្តាញសង្គមរបស់ប្រទេសចិន ដែលបានប្រកាសឲ្យប្រើប្រាស់នាខែកញ្ញា ឆ្នាំ ២០១៦ ដោយស្ថាបនិកក្រុមហ៊ុន Toutiao លោក Zhang Yiming ។ បុរសមានទ្រព្យសម្បត្តិ ៤ ពាន់លានដុល្លាររូបនេះ បានត្រួសត្រាយផ្លូវឲ្យកម្មវិធីរបស់ខ្លួន ទទួលបានភាពល្បីល្បាញខ្លាំងនៅប៉ែកអាស៊ី ពោលមានកំណើនអ្នកប្រើប្រាស់លឿនបំផុតនៃសហគមន៍វីដេអូជុំវិញពិភពលោក។

ចុច Subscribe ឆានែល Telegram របស់ Sabay ដើម្បីទទួលបានព័ត៌មានថ្មីៗទាន់ចិត្ត

រូបតំណាងលោក Zhang Yiming

គិតត្រឹមខែមិថុនា ឆ្នាំ ២០១៨ កម្មវិធី Tik Tok មានអ្នកប្រើប្រាស់ប្រចាំថ្ងៃ ១៥០ លាននាក់ និងប្រចាំខែដល់ ៥០០ លាននាក់ ជាប់ឈ្មោះជា App ទទួលបានការចុចទាញយកច្រើនបំផុតក្នុងត្រីមាសទី ១ ឆ្នាំ ២០១៨ ដល់ទៅ **៤៥,៨ លានដង**។ កម្មវិធីលើទូរសព្ទនេះអនុញ្ញាតឲ្យអ្នកប្រើអាចទស្សនាវីដេអូ ថតវីដេអូខ្លីៗនិងកែច្នៃ លាយឡំការបន្ថែម Effects ពិសេសជាច្រើន រហូតបង្កើតចេញជាវីដេអូកម្សាន្តអារម្មណ៍ដ៏ប្លែកភ្នែកមួយ។ ភាគច្រើននៃអ្នកលេងក្នុងស្រុក រមែងថតវីដេអូខ្លួនឯង ប៉ុន្តែបញ្ចូលសំឡេងចេញពីវីដេអូផ្សេង អាចមានជម្រើសចម្រៀងរាប់ពាន់ប្រភេទខុសពីគ្នា មានតាំងពី Hip-hop ដល់ Electronic ដោយឥទ្ធិពលនេះហើយបណ្តាលឲ្យផ្ទុះភាពល្បីល្បាញដល់តារាអ៊ីនធឺណិតជុំវិញសកលលោកមកចូលរួមនិងចែករំលែកការកម្សាន្តរួមគ្នា។

មុនការបង្កើតចេញជារូបរាង Tik Tok ទទួលការវិនិយោគដំបូងបង្អស់ពី Toutiao Group នូវទឹកប្រាក់រាប់លានដុល្លារ លុះចូលដល់ឆ្នាំ ២០១៧ ទើបពង្រីកទីផ្សារចូលប្រទេសឥណ្ឌូណេស៊ី បន្ទាប់ពីជោគជ័យចាប់ផ្តើមកើតមាន ជំរុញឲ្យក្រុមហ៊ុនមេ Beijing Bytedance Technology សម្រេចជះលុយទិញយក Musical.ly និង Modern Sky មកពង្រឹងគោលជំហរលើវិស័យតន្ត្រី។ Tik Tok ធ្លាប់ជាប់ឈ្មោះជា App លំដាប់ទី ១ លើ App Store កាលពីខែមករា ក្នុងប្រទេសថៃ។

យ៉ាងណាមិញក៏ធ្លាប់ជួបរឿងសៅហ្មងចិត្ត កាលពីថ្ងៃទី ៣ កក្កដា ឆ្នាំ ២០១៨ រដ្ឋាភិបាលឥណ្ឌូណេស៊ីបានប្រកាសបិទ Tik Tok ជាបណ្ដោះអាសន្នក្រោមហេតុផលចែកចាយមាតិកាអាសអាភាសនិងល្មើសច្បាប់ ប៉ុន្តែក្រោយការកែប្រែមួយសប្ដាហ៍បន្ទាប់ក៏បើកឲ្យប្រើប្រាស់ជាធម្មតាវិញ ប៉ុន្តែមានការពង្រឹងនិងយកចិត្តទុកដាក់ខ្លាំងជាងមុន៕

ប្រភព៖ Wikipedia ប្រែសម្រួល៖ កៅ រក្សា