ទៅលេងនៅប្រេស៊ីល Costa នឹងចាប់ដៃគូជាមួយខ្សែប្រយុទ្ធកម្លាំងយក្ស Hulk

2021-08-18 07:58:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹបបាល់ទាត់ Atletico Mineiro បានប្រកាសកាលពីពេលកន្លងទៅ ថាពួកគេចុះកុងត្រាយកខ្សែប្រយុទ្ធអេស្ប៉ាញ Diego Costa មករួមក្រុមហើយ។

ក្លឹបដែលមានទីតាំងនៅប្រេស៊ីលខាងលើ តែងតែទាក់ចិត្តកីឡាករឆ្នើមៗដែលមានវ័យជ្រេជានិច្ច ជាពិសេសមានសញ្ជាតិប្រេស៊ីលតែម្ដង។ ជាក់ស្ដែងកាលពីពេលកន្លងទៅ ពួកគេអាចយកបានអតីតកីឡាករ Gilberto Silva និង Ronaldinho ជាដើមឱ្យមកលេងឱ្យពួកគេ មុនចូលនិវត្តន៍។ រហូតមកដល់បច្ចុប្បន្ន Costa ក៏សម្រេចចិត្តបន្ដអាជីពនៅក្លឹបនេះទៀត។

ទៅលេងនៅប្រេស៊ីល អតីតកីឡាករ Chelsea ខាងលើនឹងចាប់ដៃគូប្រកួតជាមួយកីឡាករកម្លាំងយក្ស Hulk ផងដែរ។ Hulk នេះ ក្រោយពីចំណាយពេល៥ឆ្នាំនៅលីគចិន រូបគេក៏សម្រេចចិត្តទៅចូលរួមជាមួយក្រុម Atletico Mineiro ខាងលើ ដោយចូលរួមតាំងពីដើមឆ្នាំ២០២១។ ចាប់ផ្ដើមពីពេលនោះមក រូបគេរកឱ្យក្រុម Mineiro បាន១៦គ្រាប់ហើយ។

វត្តមានរបស់ Costa និង Hulk នឹងអាចធ្វើឱ្យអ្នកគាំទ្រក្លឹបធំនៅប្រេស៊ីលមួយនេះ សប្បាយចិត្តមិនខាន ព្រោះពួកគេទាំងពីរនាក់សុទ្ធតែជាកីឡាករឆ្នើម និងមានបទពិសោធច្រើនមែនទែន៕

ប្រភព៖ Marca អត្ថបទ៖ ប្រុស យុទ្ធ