ឡៅ ចន្ទ្រា អាចសងសឹក ថៃ រិទ្ធី បានទេថ្ងៃអាទិត្យនេះ...

2021-08-27 02:03:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ជើងខ្លាំងគុនខ្មែរមកពីឆត្រយោង ៩១១ ឡៅ ចន្ទ្រា នឹងត្រូវសងសឹកកីឡាករ ថៃ រិទ្ធី នៅសង្វៀនបាយ័ន ថ្ងៃអាទិត្យ ទី២៩ ខែសីហា ឆ្នាំ២០២១ ខណៈអ្នកឈ្នះទទួលបានប្រាក់២លានរៀលបន្ថែមទៀត។

ឡៅ ចន្ទ្រា ប្រកួតកន្លងទៅ

ការប្រកួតគឺកាន់តែជិតមកដល់ហើយម្នាក់ៗកំពុងសំងំហ្វឹកហាត់ និងព្យាយាមកែប្រែចំណុចខ្វះខាតដើម្បីស្វែងរកជ័យជម្នះរៀងៗខ្លួន។ យ៉ាងណាក៏គេបានឃើញទាំង ចន្ទ្រា និង រិទ្ធី បង្ហាញពីចំណាប់អារម្មណ៍ផ្ទាល់ខ្លួនតាមផេកនានាថាបានត្រៀមខ្លួនរួចរាល់ហើយ និងដាក់ក្ដីសង្ឃឹមឈ្នះរៀងខ្លួនផងដែរ។ ថៃ រិទ្ធី ក៏បង្ហើបថាសម្រាប់ការប្រកួតនៅថ្ងៃអាទិត្យនេះគឺមិនលាក់ក្បាច់អ្វីនោះទេ វ៉ៃអស់ៗតែម្ដង។ មួយវិញទៀតត្រៀមខ្លួនហើយដែរចំពោះការផ្លាស់ប្ដូរក្បាច់របស់ ឡៅ ចន្ទ្រា ។ ចំណែក ចន្ទ្រា វិញលើកឡើងថា ប៉ះគ្នាជាថ្មីនឹងខំប្រឹងប្រែងធ្វើឲ្យបានល្អ ចំពោះលទ្ធផលយ៉ាងណាមិនហ៊ាននិយាយមុននោះទេ ប៉ុន្តែនឹងវ៉ៃឲ្យអស់ពីសមត្ថភាព។

រូបភាពផេកបាយ័ន

រំលឹកដែរថា កីឡាករ ឡៅ ចន្ទ្រា ធ្លាប់ចាញ់សន្លប់ក្រោមថ្វីដៃអ្នកប្រដាល់ ថៃ រិទ្ធី កាលពីថ្ងៃទី២៦ ខែមិថុនា ២០២១ នៅសង្វៀនបាយ័ន។ ចំណែកថ្ងៃអាទិត្យ ទី២៩ ខែសីហា ២០២១ នេះនឹងប្រកួតជាមួយ ថៃ រិទ្ធី ជាថ្មីទៀតវេលាម៉ោង ៦ កម្មវិធីខារ៉ាបាវ អ្នកឈ្នះបាន២លានរៀលបន្ថែមពីលើប្រាក់តម្លៃខ្លួន៕

អត្ថបទ៖ នួន ស៊ីណា