កម្មវិធី Fit For Hope របស់ អេ អាយ អេ បន្តលើកកម្ពស់ការយល់ដឹងជំងឺមហារីកសុដន់
- 2021-10-25 10:49:01
- ចំនួនមតិ 0 | ចំនួនចែករំលែក 0
កម្មវិធី Fit For Hope របស់ អេ អាយ អេ បន្តលើកកម្ពស់ការយល់ដឹងជំងឺមហារីកសុដន់
ចន្លោះមិនឃើញ
ភ្នំពេញថ្ងៃទី ២២ តុលា ២០២១៖ ក្រុមហ៊ុនធានារ៉ាប់រងអាយុជីវិត អេ អាយ អេ (ខេមបូឌា) ឡាយហ្វ៍ អ៉ិនសួរេន ម.ក (អេ អាយ អាយ ខេមបូឌា) ទើបនឹងដំណើរការកម្មវិធី Fit For Hope ឆ្នាំ ២០២១ ដើម្បីបន្តការប្តេជ្ញាចិត្តរបស់ខ្លួនក្នុងការលើកកម្ពស់ការយល់ដឹងអំពីជំងឺមហារីកសុដន់ ហើយផ្តល់ការគាំទ្រដល់អ្នកជំងឺ ខណៈអំពាវនាវឲ្យសាធារណជនចូលរួមជាមួយក្រុមហ៊ុន និងមន្ទីរពេទ្យព្រះសីហនុមណ្ឌលនៃក្តីសង្ឃឹម (SHCH) ក្នុងការប្រយុទ្ធប្រឆាំងនឹងជំងឺដ៏សាហាវនេះ។
កម្មវិធីនេះប្រារព្ធឡើងនៅក្នុងគោលបំណងនៃការយល់ដឹងអំពីជំងឺមហារីកសុដន់អន្តរជាតិ។ កម្មវិធីនេះលើកទឹកចិត្តដល់ស្ត្រីក្នុងការស្វែងយល់អំពីជំងឺមហារីកសុដន់ ផលប៉ះពាល់ និងរបៀបក្នុងការរកឃើញរោគសញ្ញាបានទាន់ពេលវេលាដែលអាចជួយសង្គ្រោះជីវិតពួកគេបាន។ កម្មវិធីនេះលើកទឹកចិត្តឲ្យស្ត្រីកម្ពុជាយកចិត្តទុកដាក់បន្ថែមលើរាងកាយរបស់ពួកគាត់ ហើយដឹងពីដំណោះស្រាយខ្លះៗដោយខ្លួនឯង តាមរយៈការអានព័ត៌មានផ្សេងៗអំពីជំងឺនេះ ធ្វើការពិនិត្យខ្លួនឯង និងពិគ្រោះជាមួយវេជ្ជបណ្ឌិតប្រសិនបើមានសំណួរ ឬបញ្ហាណាមួយ។
ការចាប់ដៃគូសហការជាមួយមន្ទីរពេទ្យព្រះសីហនុមណ្ឌលនៃក្តីសង្ឃឹម (SHCH) តាមរយៈកម្មវិធី Fit For Hope របស់ អេ អាយ អេ បង្ហាញពីការប្តេជ្ញារបស់ក្រុមហ៊ុនក្នុងការជួយផ្សព្វផ្សាយ និងការគាំទ្រមន្ទីរពេទ្យនេះតាមរយៈផ្នែកហិរញ្ញវត្ថុផងដែរ។ ដើម្បីជាកិច្ចថ្លែងអំណរគុណចំពោះមន្ទីរពេទ្យ ក៏ដូចជាជួយឲ្យអតិថិជនរបស់ អេ អាយ អេ ទទួលបានទាំងការការពារហិរញ្ញវត្ថុ និងរួមចំណែកជួយសង្គមវិញ ក្រុមហ៊ុននឹងធ្វើការបរិច្ចាគទៅកាន់មន្ទីរពេទ្យនូវទឹកប្រាក់ចំនួន ៥% នៃចំនួនបុព្វលាភធានារ៉ាប់រងពីរាល់បណ្ណសន្យារ៉ាប់រងដែលបានទិញភ្ជាប់ជាមួយនឹងការធានារ៉ាប់រងជំងឺមហារីកចាប់ពីថ្ងៃទី ២១ ខែតុលាដល់ថ្ងៃទី ៣១ ខែធ្នូ ឆ្នាំ ២០២១។
អេ អាយ អេ ក៏សូមលើកទឹកចិត្តដល់សាធារណជនឲ្យចូលរួមបរិច្ចាគ ដើម្បីជួយឲ្យមន្ទីរពេទ្យព្រះសីហនុមណ្ឌលនៃក្តីសង្ឃឹមបន្តផ្តល់ការពិគ្រោះយោបល់ ការពិនិត្យ និងការព្យាបាលផ្សេងៗឥតគិតថ្លៃដល់ស្ត្រីដែលមិនមានលទ្ធភាពគ្រប់គ្រាន់។
ក្រៅពីនេះ អេ អាយ អេ ក៏មានការផ្តល់ជូនពិសេសសម្រាប់ស្ត្រីកម្ពុជារហូតដល់ ៣០០០ នាក់ជាមួយទឹកប្រាក់សំណង ១០០០ ដុល្លារឥតគិតថ្លៃក្នុងករណីរកឃើញថាមានជំងឺមហារីកសុដន់។ ដោយឡែកសម្រាប់អតិថិជនវិញ ក្រុមហ៊ុននឹងផ្តល់ការការពារទ្វេដងរយៈពេលពេញមួយឆ្នាំលើករណីជំងឺមហារីក ជំងឺធ្ងន់ធ្ងរផ្សេងទៀត រួមទាំងជំងឺមហារីកសុដន់ សម្រាប់រាល់ការទិញបណ្ណសន្យារ៉ាប់រងដែលមានភ្ជាប់អត្ថប្រយោជន៍ការពារជំងឺធ្ងន់ធ្ងរ (critical illness)។
លោក Andrew Loh អគ្គនាយកប្រតិបត្តិរបស់ អេ អាយ អេ ខេមបូឌា មានប្រសាសន៍ថា៖ «សព្វថ្ងៃនេះ ទោះបីជាមានការយកចិត្តទុកដាក់ខ្លាំងទៅលើជំងឺកូវីដ-១៩ តែយើងក៏ចង់រំលឹកដល់ស្ត្រីទាំងអស់ ជាពិសេសស្ត្រីមានអាយុលើសពី ៤០ឆ្នាំ ឬមានហានិភ័យខ្ពស់គួរយល់ដឹងអំពីជំងឺមហារីកសុដន់ និងផលវិបាករបស់វា។ ពួកគាត់គួរតែធ្វើតាមដំបូន្មានវេជ្ជសាស្រ្ត ហើយ អេ អាយ អេ ក៏មានការចែករំលែកព័ត៌មានសំខាន់ៗមួយចំនួននៅលើទំព័រហ្វេសប៊ុក និងមធ្យោបាយផ្សព្វផ្សាយផ្សេងៗរបស់យើង ព្រោះការរកឃើញជំងឺហារីកសុដន់ទាន់ពេលវេលា ធ្វើឲ្យមានភាពងាយស្រួលក្នុងការព្យាបាល និងមានឱកាសជាសះស្បើយខ្ពស់»។
លោកបានប្រាប់បន្តថា៖ «អេ អាយ អេ នឹងបន្តបង្កើនការយល់ដឹងដល់សាធារណជន ថាជំងឺមហារីកសុដន់គឺជាជំងឺមហារីកកើតច្រើនជាងគេលំដាប់ទី២ នៅកម្ពុជាបន្ទាប់ពីមហារីកមាត់ស្បូន។ អត្រាមរណភាពអាចនឹងកាត់បន្ថយ ប្រសិនបើស្ត្រីកម្ពុជាទទួលបានព័ត៌មានទាន់ពេលវេលា វិធានការណ៍បង្ការ ការពិនិត្យ ការប្រឹក្សា និងការព្យាបាលដោយឥតគិតថ្លៃផ្តល់ជូនដោយមន្ទីរពេទ្យព្រះសីហនុមណ្ឌលនៃក្តីសង្ឃឹម ជាមួយកម្មវិធីមហារីកសុដន់របស់មន្ទីរពេទ្យដែលជាកម្មវិធីមានរយៈពេលយូរបំផុតនៅក្នុងប្រទេស»។
មកដល់ពេលនេះកម្មវិធី Fit For Hope របស់ អេ អាយ អេ បានរៃអង្គាសប្រាក់បានជិត ៦០.០០០ ដុល្លារអាមេរិកសម្រាប់មន្ទីរពេទ្យព្រះសីហនុមណ្ឌលនៃក្តីសង្ឃឹម រួមជាមួយសកម្មភាពផ្សព្វផ្សាយពីជំងឺមហារីកសុដន់ក្រោមរូបភាពជាច្រើនដូចជា៖ កម្មវិធីអនឡាញ និងសកម្មផ្សេងៗដូជា វីដេអូអប់រំ ការពិនិត្យ ការពិគ្រោះយោបល់ដោយឥតគិតថ្លៃ និងការចេញបទចម្រៀងយុទ្ធនាការជាផ្លូវការ។
យោងតាមទីភ្នាក់ងារអន្តរជាតិសម្រាប់ការស្រាវជ្រាវលើជំងឺមហារីក (IARC) របស់អង្គការសុខភាពពិភពលោក ជំងឺមហារីកសុដន់បានក្លាយជាជំងឺមហារីកដែលត្រូវបានគេធ្វើរោគវិនិច្ឆ័យច្រើនបំផុតនៅលើពិភពលោកក្នុងឆ្នាំ ២០២០ និងជាមូលហេតុចំបងនៃការស្លាប់ដោយសារជំងឺមហារីកចំពោះស្ត្រី។ IARC និយាយថាករណីមហារីកចំនួន ១៨៧៧ ត្រូវបានរាយការណ៍នៅក្នុងប្រទេសកម្ពុជាកាលពីឆ្នាំមុនដែលមានចំនួន ១៨,៩% នៃករណីថ្មីទាំងអស់នៅក្នុងស្ត្រីកម្ពុជាគ្រប់វ័យ។
សម្រាប់ព័ត៌មានបន្ថែមអំពីកម្មវិធី Fit For Hope របស់ អេ អាយ អេ ខេមបូឌា និងការផ្តល់ជូនផ្សេងៗសូមទាក់ទងផ្នែកសេវាកម្មអតិថិជនរបស់ អេ អាយ អេ តាមរយៈលេខទូរស័ព្ទ 086 999 242 ឬចូលទៅកាន់គេហទំព័រ aia.com.kh៕
ទំនាក់ទំនងសារព័ត៌មាន
ម៉េង ដាណែត ប្រធានផ្នែកទំនាក់ទំនងសាធារណៈ អេ អាយ អេ (ខេមបូឌា) ឡាយហ្វ៍ អ៊ិនសួរេន ម.ក Daneth-d.Meng@aia.com